Balyqtyń batasy
2010-jyly tamyz aıynda shınjáń uıǵyr avtonomıaly raıondyq saıası keńestiń burynǵy tóraǵasy janábil Symaǵul uly jubaıy Zupıra apamyzdy ertip shińgilge kelip, kezinde ózderimen birge qyzymet istegen kóne kóz saptastarynyń basyn qosypshaı beredi. Qonaqtar ortasyndaǵy ústelge qýyrmashtar kele bastaǵanda qasynda otyrǵan Qurmanbek aqynǵa el aǵasy jákeń: «Qane Qurmanbek, balyqqa bata jasashy»-deıdi tosynnan. Sonda orynynan kúle túregelgen qurekeń irkilmesten：
Baýyzdaýy ózinde,
Batasy qalaı balyqtyń.
Qolma-qol yǵyn taba almaı,
Tápbermede taryqtym.
Balyqtyń basy beri qarap,
Batasyn satyp alyppyn.
Bolaryn bilmeı qaýyptyń,
Bir áýreni taýyppyn.
Jazasyna daıynmyn,
Aıta almaǵan aıyptyń.
Bata qylǵan jerim bar,
Sıraǵyna taýyqtyń.
Balyqtyń joly úremke,
Batany júr taýyp kim.
Jákeń qurmet qylǵan soń,
Shaıǵa kelip qalyppyn.
Eń úlkeni sizge tán,
Ataq benen dańyqtyń.
Uzaq ómir kórińiz,
Baq juldyzyń janyp myń.
Tilegi osy men emes,
Qara ormandaı halyqtyń. -dep bata jasaıdy.
Eshqanda ıirkilissiz tógilip ketken aqynǵa otyrǵandar Qaıran qalady. Jákeń ózi de: «Seni az synaǵan joq edim, taǵy bir Emtıhannan irkilmeı óttiń, osyndaı ortalarda aıtqan óleńderiń dalada qalyp qoımasyn» . -dep ashyq Rızalyq bildiripti.
Jıynǵa bata
Saıası Másilıhat keńesi Altaı aımaqtyq qyzymet kómıtetini bir retki jıynyn Býyrshyn aýdanynyń úshtás jaılaýynda ótkizedi. Bul jıynǵa Shińgil aýdandyq saıası keńestiń sol kezdegi orynbasar tóraǵasy Qurmanbek Zeıtinǵazy uly da qatynasady. Jıyn bastalar aldynda kópke arnalǵan kók qasqa taıdyń batasyn jasaýǵa kópshilik aqyndy uıǵarady. Sonda qurekeń:
Berekeli halyqtyń,
Peıili teń kólmenen.
Aldyma ákep ustap tur,
Kók qasqa taıyn kóldeneń.
Ata jolyn attaıdy,
Buǵan bata bermegen.
Saıası keńes sabymyz,
Abyroıy órlegen.
Ar-namysta bir bolǵan,
Etene uıym elmenen.
Parasattyń qambasy,
Kenishi birdeı kenmenen.
Qadyry bar halyqqa,
Oryny tórge tórlegen.
Keledi júrip Qytaısha,
Sosıalıstyk jólmenen.
Eńsesi bıik elimniń,
Altaıdyń asqar taýyndaı.
Jurtymyz jigin ashpaǵan,
Tonnyń ishki baýyndaı.
Bólinbeıtin bir tulǵa,
Jarylmaǵan qaýyndaı.
Barlyq ulyt týysqan,
Aǵa menen baýyrdaı.
Ulytqa, dinge bólinbeı,
Kóp dep, az dep aıyrmaı.
Qoıyny qut qonysy,
Altaı menen saýyrdaı.
Mańdaı aldy is barma,
Halqymyzdyń qamyndaı.
Tań qaldyrǵan tabysy,
Endikpenen boılyqty.
Kimde yntymaq bereke,
Teńdik bolsa sol myqty.
Beıbit qoǵam quraıyq,
Berekeli ornyqty.
Qoǵam túgel qoldady,
Qadyrlep osy uıymdy.
Oılary da oryndy,
Usynysy syıymdy.
Alty aýdan, bir qaladan,
El aǵasy jıyldy.
Quttyqtaımyn qurmetpen,
Saltanatty jıyndy. -dep tógiltip bata bergen eken.
Aqyndar aıtysyna bata
Tarbaǵataı aımaǵynyń Sháýeshek qalasynda ótkizilgen aımaqtyń kezekti aqyndar aıtysyna Qurmanbek Zeıtinǵazy ulyn qurmetti qonaq retinde shaqyrady. Osy torqaly toıdyń batasyn jasaý jolyn Qurmanbek aqynǵa syılaıdy. Topty kórse arqasy qozatyn aqıyq aqyn sol maıdanda:
Asqar taýdyń aıbynyn bersin,
Tórt muhıttyń aıdynyn bersin.
Sarqylmaıtyn baılyǵyn bersin,
Qulystaıdyń qutyn bersin,
Qutyn berse bútin bersin.
Álemde bardyń barlyǵyn bersin!
Alty qurlyqtyń keńdigin bersin,
Terezeńniń teńdigin bersin.
Eńsesi bıik eldigin bersin,
Orqashardyń órligin bersin.
Basbaıdyń jomarttyǵyn bersin,
Demejanniń erligin bersin!
Dýbekteı bilim bersin,
Qaıraqbaıdyń kúıin bersin,
Kásimbaıdiń únin bersin.
Omarǵazynyń oıyn bersin,
Zadaqannyń tilin bersin.
Berdiqandaı bes aspap bolyńdar,
Jamalqannyń jyryn bersin!
Ániń áýeleı bersin,
Óreniń máýeleı bersin.
Óneriń órleı bersin,
Orynyń tórleı bersin.
Bıligi barlar bilikti bolsyn,
Bilimi barlar yryqty bolsyn.
Uldaryń rýhty bolsyn,
Qyzdaryń qylyqty bolsyn!
Eliń irgeli bolsyn,
Kórkeıip gúldene bersin.
İsteriń ilgeri bolsyn,
Aqyndaryń júldeli bolsyn! -dep aqtarylǵan eken.
Tilashar tileýge bata
Tileýimiz tilashar,
Ulttyń salty unasar.
Osy josyn bolmasa,
Balanyń tilin kim ashar.
Til ashar tileý bolǵanda,
Aǵaıyn basyn qurasar.
Úmitimiz úkili,
Úrpaqpenen ulasar.
Tilashar degen ne salt dep,
Sábıler bizden surasar.
Jıirenshe deı júıirik bol,
Sharshy topta synasar!
Balamyz baqytty bolsyn,
Baldan tátti bolsyn.
Bilimdi mıly bolsyn,
Tildy, jaqty bolsyn.
İsi bapty bolsyn,
Qadamy sátti bolsyn!
Sózi maıda bolsyn,
Armany aıda bolsyn.
Tilegen tilegine jetip,
Kóp toıy alda bolsyn!
Sózge sheber bolsyn.
İske shógel bolsyn.
Ómir bersin, óner bersin,
Ónegeli óren bolsyn.
Ulyhpannyń jasyn bersin,
Jasy ǵasyr bolsyn.
Talaby ústem bolsyn,
Muraty asyl bolsyn!
6alash usyndy
