AHMET ÚIİNDE ABAI KÚNİ

AHMET ÚIİNDE «ABAI – QAZAQTYŃ BAS AQYNY» ATTY İS-SHARA ÓTTİ

10 tamyz kúni Almaty qalasy mýzeıler birlestigi Ahmet Baıtursynuly mýzeı-úıinde Abaı Qunanbaıulynyń dúnıege kelgen kúnine oraı, «Qazaqtyń bas aqyny – Abaı» atty tanymdyq dáris ótti. Sharaǵa zıaly qaýym, ónerpazdar jáne Almaty qalasy mýzeıler birlestigine qarasty mýzeılerden kelgen qyzmetkerler qatysty. Shara bastalǵanǵa deıin kelýshilerge mýzeı-úı jádigerleri tanystyryldy. Tanystyrýdy Ahmet Baıtursynuly mýzeı-úıiniń ekskýrsovody Manatjan Ashırov júrgizdi.

Saǵat 11:00-de «Qazaqtyń bas aqyny – Abaı» atty tanymdyq dáris bastaldy. Ulttyń uly ustazynyń úıinde Uly tulǵanyń týǵan kúnine oraı ótkeli jatqan sharanyń shymyldyǵyn Almaty qalasy mýzeıler birlestiginiń ókili Tarybaev Qaırat Saǵynǵalıuly ashyp berdi.

Sharany mýzeı-úıiniń bólim meńgerýshisi, aqyn Ádilet Ahmetuly júrgizdi. Abaı atyndaǵy respýblıkalyq mamandandyrylǵan daryndy balalarǵa arnalǵan orta mektep-ınternatynyń túlegi, Ál-Farabı atyndaǵy QazUÝ-dyń 2-kýrs doktoranty, ónerpaz Abzal Jańabaı Shákárimniń «Bul án basqa ánnen ózgerek» atty ánin oryndap mereıli sáttiń saltanatyn asyrdy. Ahmet Baıtursynuly mýzeı-úıiniń jetekshisi, ahmettanýshy ǵalym Raıhan Sahybekqyzy «Abaı jáne Ahmet arasyndaǵy úndestik» atty tanymdyq dáris oqydy. Dáriste R.Sahybekqyzy Ahmet Baıtursynuly bastaǵan Alash zıalylary shyǵarǵan «Qazaq» gazeti kótergen júktiń mańyzy men ult taǵdyrynyń isine kelgende arystardyń judyryqtaı jumyla bilgenin, «Qazaqtyń bas aqyny – Abaı» atty turaqty tirkeske aınalǵan uly sózge Abaı danalyǵy men parasatyn teń syıdyrǵan Ahmettiń suńǵylalyǵyn tilge tıek etti.

Belgili kúıshi, Altaı, İle, Tarbaǵataı kúıshilik mektebiniń ókili, Qazaqstan kúıshiler odaǵynyń múshesi Sarqytbaı Qalıuly kúıshilik mekteptiń birnesheýin qamtyp kúıler oryndap berdi. Profesor, mýzeı-úıdiń ǵylymı qyzmetkeri Svetlana Smaǵulova hakim Abaıdyń qaıratkerlik qyryn tanystyryp ótti. Sóz tizginin ustaǵan Á. Ahmetuly óziniń hakim Abaı rýhyna arnap jazǵan «Jalǵyz» atty óleńin oqyp berdi. Ult ustazy taǵylym mektebin kórýge kelgen Jetisaı qalasy B.Momyshuly atyndaǵy mekteptiń oqýshylary, aǵaıyndy Ahylbek Islam men Ahylbek Nazym Abaı óleńderin jatqa oqyp, kópshilikti súıindirdi.

İssharanyń asa qundy jádigeri – Abaıdyń dombyrasyn Yqylas Dúkenuly atyndaǵy mýzykalyq aspaptar mýzeıi kópshilik kózaıymyna aınaldyryp, bul dombyranyń tarıhyn atalǵan mýzeıdiń ǵylymı qyzmetkeri Raýshan Aıbolqyzy tanystyrdy. Al, Ahmet dombyrasynyń tabylý tarıhyn Raıhan Imahanbet túsindirip ótti.