Aǵaıyndy eki jigittiń otbasy ózara tatý-tátti ómir súripti. Birde «Osy tatý-tátti turmystyń uıytqysy biz – er azamattarmyz», - dep maqtanypty aǵaıyndylardyń kishisi áıeline.
– Al bizdi – abysyndardyń eńbegin nege eskermeısiń? - deıdi jubaıy.
– Biz bas bolsaq, sender moıyn emessińder me. Endeshe bas qalaı qarasa, moıyn da solaı burylmaı ma?..
Áıeli buǵan salǵylaspaı, óz sharýasymen júre beredi.
Bir kúni olar jigittiń aǵasyn otbasymen qonaqqa shaqyrady. Qoı soıyp, et asyp, múshe-múshesimen dastarqanǵa qoıady.
Aǵaıyndylardyń úlkeni qoıdyń aldyńǵy sıraqtaryn óz balalaryna berip, artqy sıraqtaryn inisiniń balalaryna usynypty. Sonda kishisiniń áıeli kúıeýniń qulaǵyna: «Sıraqtardy qalaı bergenin kórdiń be? Aldyńǵy aıaqtaryn óz balalaryna, artqy sıraqtaryn seniń balalaryńa berdi. Iaǵnı, ol óz balalary alda, ozyq bolsyn, al seniń balalaryń artta, sońynda júrsin degeni ǵoı», - dep sybyrlaıdy.
Aǵasy inisiniń balalaryna julyn bergen edi, «Kórdiń be, seniń balalaryń julyndaı úzilsin degen oıyn», - dep qoıady. Aǵasy inisiniń balalaryna mı ustatqan edi, «Áne, ol balalaryńnyń aqyl-oıy mıdaı byljyraq, sý mı bolsyn dep berip jatqanyn túsindiń be?» - deıdi. Áıeliniń osy sózderinen keıin kishisi aǵasymen ursysyp, sózge kelip qalady. Sonda kishisiniń áıeli olardy qaıta tatýlastyryp, kúıeýiniń ótkendegi áńgimesin esine salady da, «Eki úıdiń bereke-yntymaǵy biz – abysyndarǵa da baılanysty, «abysyn tatý bolsa, as kóp, aǵaıyn tatý bolsa, at kóp» degen, - dep yntymaq-birlikke shaqyrady.
Iaǵnı, bul maqal aǵaıyn men aǵaıyn, abysyn men abysyn tatý, yntymaqty bolsa, úılerine bereke baılyq, molshylyq ta keledi degen oıdy beredi.
6alash usyndy
