1950 جىلى كورەي تۇبەگىندە تۇتانعان سوعىسقا (1950-1953) قىتايدا بۇكىل ەل بويىنشا كومەك اتاۋ ناۋقانى باستالادى. سول كەزدە سوعىسقا ۇشاق اتاعان قازاقتى بىلەسىز بە؟ ول قازاقتان شىققان جومارت شۋاق باسباي شولاق ۇلى.
جۇڭگو ارحيۆىندە 1951 جىلى سولتۇستىك كورەياعا كومەككە اتاعان ۇشاققا كەتكەن باسباي بايدىڭ مالىنىڭ ءتىزىمى ساقتالعان. سول ارحيۆتە باسبايدىڭ 4 مىڭ قوي، 100 جىلقى، 100 سيىر، 100 تۇيە، 100 ءسارى التىن اتاعانى جازىلعان. ىرىسى شالقىعان بايدىڭ سول ۇشاق ساتىپ الۋعا كەتكەن شىعىنىنىڭ ورنى ءۇش جىلدىڭ ىشىندە قايتا تولىپتى. باسباي كورەياعا ۇشاقتى سىيلايتىن كەزدە، سوعىس ۇشاعى دەگەن نارسەنى ءوزى كوزىمەن كورمەكشى بولىپ اۋەجايعا كەلگەن سوڭ: «اتتەگەن-اي، مىناداي ەكەنىن بىلگەندە ەكەۋىن سىيلاسام بولعانداي ەكەن، قوس اققۋداي بىرگە ۇشىپ، بىرگە قوناتىن»، - دەپتى. سول جولى ميللياردتار ەلىنەن تەك ەكى ادام عانا ۇشاق اتاعان. ءبىرى - قازاقتىڭ بايى باسباي بولسا، ەكىنشىسى قىتايلىق باي كاسپكەر چاڭ شياڭيۋ.
1941 جىلى ەكىنشى دۇنيەجۇزىلىك سوعىس كەزىندە الدىڭعى شەپتە قان كەشىپ جاتقان قازاقستانداعى قازاق باۋىرلارىنا ارناپ، 500 اتتى ەر-تۇرمانىمەن جىبەردى. 1945–1947 جىلدارى قىتايداعى ءۇش ايماق ازاتتىق توڭكەرiسiنە 1000 قوي، 100 سيىر، 250 ات كومەك اتادى.
باسباي شولاق ۇلى 1889 جىلى قازىرگى جۇڭگو جەرىندەگى تارباعاتاي ايماعىنىڭ شاعانتوعاي اۋدانىندا تۋعان. 1953 جىلى 4 قاراشادا قىتايدىڭ ىشكى قالالارىن ارالاپ ءجۇرىپ توسىن ناۋقاستان حاڭجۋ قالاسىندا قايتىس بولعان.
باسبايدىڭ ارتىنا قالدىرعان ءبىر مۇراسى - باسباي قويى. ارقار-قۇلجامەن بۋدانداستىرىلعان بۇل قويدىڭ ەت ءتۇسىمى جوعارى، قىستا قاردىڭ ۇستىنە قوزىلاپ، قوزىسىن اياقتاندىرىپ كەتە بەرەدى. ەتى وتە ءدامدى. قوشقارلارىندا بىرنەشە ءمۇيىز بار.
6alash ۇسىنادى
