الماتى وبلىسىنا قاراستى شوقان ءۋاليحانوۆتىڭ «التىنەمەل» مەملەكەتتىك مەموريالدى مۋزەيى قورىندا ساقتالۋلى تۇرعان قۇندى بۇيىمنىڭ ءبىرى – شوقاننىڭ پارشا بەلبەۋى. بۇل جادىگەر جايلى اتالمىش مۋزەي باسشىسى ساۋلە ابىشيەۆانىڭ ايتۋىنا قاراعاندا، بەلبەۋ 1985 جىلعا دەيىن الماتىداعى مەملەكەتتىك ورتالىق مۋزەي قورىندا ساقتالىپ كەلگەن. وعان قالاي كەلدى، ول جاعى بەيمالىم.
كەيىن قازسسر مادەنيەت ءمينيسترىنىڭ ءنومىرى 63ء-شى بۇيرىعىمەن اكت جاسالىپ (اكت № 165) بەلبەۋ مەملەكەتتىك ورتالىق مۋزەي قورىنان الىنىپ، «التىنەمەل» مەملەكەتتىك مەميورالدى مۋزەيىنە تابىستالعان.
جادىگەردىڭ قۇجاتتاماسىندا بۇل دۇنيەنى ساياحاتشى-عالىم 1858-1859 جىلدارى قاشعارياعا بارعان ساپارىندا بۋىنىپ كەلگەن دەلىنگەن. بەلبەۋ وتە ساپالى، تازا جۇڭگو جىبەگىنەن جاسالعان. بۇيىمعا بەر جاعى 150 جىلدان استام ۋاقىت وتسە دە، سىنى بۇزىلماي جاقسى ساقتالعان. ەكى ۇشىنا بىردەي توگىلگەن ءساندى شاشاعى مەن جيەكتەي كەستەلەنگەن ورنەگىنىڭ ءبىر ءجىبى دە سەتىنەمەپتى.
بۇل زات وتكەن شىلدە ايىنىڭ باسىندا استانادا وتكەن الماتى وبلىسى مادەني كۇندەرى كەزىندە ەلورداداعى قارۋلى كۇشتەردىڭ اسكەري-تاريحي مۋزەيىندە كورمەگە قويىلىپ، كوپشىلىك نازارىنا ۇسىنىلعان بولاتىن.
بەكەن قايرات ۇلى،
سۋرەتتى تۇسىرگەن ورىنباي بالمۇرات
