اقىمجاننىڭ قوڭىرى (اقىمجان)
قالياقپار ۇلى بەيىلحان
ايتۋلى سىبىزعىشى – بەيىلحان قالياكبار ۇلى 1952 جىلى ءۇرىمجى اۋدانىنىڭ ساياپىل دەگەن جەرىندە قاراپايىم مالشى وتباسىندا دۇنيەگە كەلگەن. 1960 جىلدان 1965 جىلعا دەيىن بانفانگۋ اۋىلى دىڭساگۋ قىستاعىنا قاراستى مەكتەپتەن باستاۋىش بىتىرگەن. كەيىن وتباسىنىڭ قيىنشىلىق جاعدايىنان جوعارىلاپ وقي الماعان.
بەكەڭ قوعامعا ارالاسقان سول جىلدارى كولەكتۆتىڭ جىلقىسىن باعاتىن اكەسىنە قولعانات بولعان. قۇرىش تۇياق، قىل قۇيرىق دەگدار تۇلىكتىڭ سوڭىنا تۇسكەن قارشاداي ۇل ءوزىنىڭ قىزىعۋشىلىعىمەن، بويىنداعى تىلسىم تالانتتىڭ جەتەلەۋىمەن قۇبا دالانىڭ قۋىس قۋرايىن قولىنا الىپ، ودان سازدى ءۇن شىعارىپ، جانسىز دۇنيەنى سايراتادى.
مىنە، وسىلايشا بولاشاق سىبىزعى ونەرىنىڭ ساڭلاعى دارقان دالانى ساحىنا ەتەدى. ونىڭ تەكتى تالانىتىنان تۋعان سارىندى كۇيلەردى اتا تاۋلار جامباستاي جاتىپ، انا دالا اڭقىلداي تۇرىپ، جەڭگە بۇلاق، قىز ورمان سىلىق-سىلىق كۇلىپ سۇيىنە تىڭدايدى.
بەيىلحان، ەل ىشىندەگى اتاقتى كۇيشى شەتتىكباي قاجىنىڭ ۇلى بولەنحاندى ۇستاز تۇتىپ، ۇيرەنگەن كۇيلەرىنىڭ كەم-كەتىك جەرلەرىن ول كىسىدەن تولىقتايدى.
قاجىرلىلىقتى قانات، حالىق قۇرمەتىن شابىت دەپ بىلگەن بەيىلحان قالياكبار ۇلى، بۇل كۇندەرى ءتورت اتادان بەرى ۇلاسقان تەكتى ونەردىڭ وزەگىن ۇزبەي، ءۇردىسىن بۇزباي جالعاستىرىپ كەلەدى.
بەكەڭ 1988 جىلى قىتايدىڭ لياۋنيىڭ ولكەسىنىڭ داليان قالاسىندا بۇكىل مەمىلەكەت بويىنشا تۇڭعىش رەت وزدىرىلعان جۇڭگو كوركەمونەرپازدارى مەرەكەسىنە قاتىناسىپ، حالقىمىزدىڭ سىبىزعى اسپابىن تۇڭعىش رەت ىشكى ولكە ساحىناسىندا سايراتادى.
1992 جىلى تۇركيانىڭ استاناسى ستامبۋل قالاسىندا وتكىزىلگەن 11-كەزەكتى كارتال حالقارالىق ونەر فەستۆالىنە قاتىناسىپ، سول جولى 1-دارەجەلى جۇلدەنى ەنشىلەپ، داڭىقپەن ورالادى.
2005 جىلى شينجياڭ تەليەۆيزياسى بەكەڭدى ۇسىنىس ەتىپ شاقىرىپ، 30 دان استام كۇيىن التىن قورعا ەنگىزدى، سونىمەن قاتار ونىڭ ومىرىمەن ەڭبەك جولىن كوگىلدىر ەكران ارقىلى كوپكە تانىستىردى.
بەكەڭ 2007-2008 جىلدارى قازاقىستان رەسپۋبليكاسىنىڭ الماتى قالاسىندا «ماڭگىلىك سارىن» دەگەن اتپەن وتكىزىلگەن ونەر تويىنا، قازاقىستان رەسپۋبليكاسىنىڭ مۋزيكا مامانى تالعات مۇقىشوۆتىڭ ەرەكشە شاقىرتۋىمەن قاتىناسىپ، سول ەلدىڭ «جادىگەر» دەگەن اتاعىن الادى ءارى قارجىلاي ماراپاتتالادى.
مىنە وسى ساپاردا بەكەڭنىڭ ورىنداعان كۇيلەرى «مىڭ ءبىر كۇي» اتتى التىن قورعا ساقتالۋ مارتەبەسىنە يە بولادى.
2019 جىلى كۇز ماۋسىمىندا قازاقىستان رەسپۋبليكاسىنىڭ جەزقازعان قالاسىندا اتاقتى كۇيشى كەتبۇعانىڭ 900 جىلدىعىنا ارنالعان حالقارالىق مەرەي تويعا ۇسىنىسپەن قاتىناسىپ، اتاقتى «اقساق قۇلان جوسىعان» كۇيىن سىبىزعىدا ورىنداپ ارقا جۇرتىنىڭ ايىزىن قاندىرىپ قايتتى.
بەكەڭ وسى كۇزدە تاعى دا جۇڭگو ورتالىق تەليەۆيزيانىڭ ارنايى شاقىرۋىمەن بيجيىڭ قالاسىنا بارىپ، سىبىزعى كۇيلەرىن ەلىمىزدىڭ باس تەليەۆيزياسىنىڭ التىن قورىنا سىيلادى.
قاناتبەك زايتوللا ۇلى
6alash ۇسىنادى
