موڭعوليا مەملەكەتى تۋريزم سالاسىن شىڭعىس حان ارقىلى دامىتىپ وتىر، ال، قازاقستاندا جوشى حاندى دارىپتەۋىمىز كەرەك، - دەيتىندەر كوپ. بۇل وتە جانساق پىكىر دەپ ويلايمىن! سەبەبى موڭعوليا ءتۋريزمىنىڭ دامۋىنا شىڭعىسحاننان كورى قازاق مادەنيەتىنىڭ قوسقان ۇلەسى وتە كوپ. ءقازىر قازاق مادەنيەتى ارقىلى موڭعوليا ءتۋريزمى ءبىرشاما دامىپ كەلەدى...
موڭعوليا برەندىنە اينالعان قازاق بۇركىتشىسى
قازاقستان ءوزىنىڭ ۇلتتىق قۇندىلىعىن جاڭعىرتىپ، ءسالت-داستۇرىن دارىپتەي الماي تۇرىپ، وزىنە جاساندى برەندپەن تۋريستەر شاقىرا المايدى! قازاقستاندا تۋريزم، ونىڭ ىشىندە ەتنوتۋريزمدى دامىتۋ ءۇشىن قازاقتىڭ ءداستۇرى مەن ۇلتتىق بولمىسىن، تابيعاتىن قايتا جاڭعىرتسا بۇل سالا جاقسى دامىر ەدى. قازاق ەلىنىڭ ءوز ۇلتتىق قۇندىلىعىن دارىپتەي الماۋى موڭعوليا قازاقتارى ارقىلى، موڭعول ۇكىمەنتىنىڭ ءتۋريزىم سالاسىنا ۇلكەن ولجا ەنگىزىپ وتىر.
قىران قۇستىڭ اڭشىلىق ساياتشىلىعى
موڭعولياعا شەتەلدىكتەر تەك شىڭعىس حان ءۇشىن كەلەدى دەۋ قاتە ۇعىم. شىنتۋايتىندا وندا كورەتىن شىڭعىس حان دا جوق! ءبىر عيماراتتان باسقا... شىڭعىسحاننىڭ الىپ عيماراتى موڭعولياعا تۋريستەردى شاقىرىپ تۇر دەۋ ءسال شيكى پىكىر، دەر ەدىم...
كەرىسىنشە موڭعول مەملەكەتى بۇگىندە قازاقتىڭ ۇلتتىق قۇندىلىقتارى مەن ءسالت-داستۇرى ارقىلى شەتەلدەن وزدەرىنە تۋريستەردى كوپتەپ تارتىپ وتىر.
شىڭعىس حان كوشەسى، ۇلانباتىر.
شەتەلدىكتەر موڭعولياعا اۋەلى كۇلتەگىن، تونىكوك، بىلگە قاعانداردىڭ جازبا ەسكەرتكىشىن كورۋگە، سوسىن بايان-ولگەيدەگى قازاق مادەنيەتىنىڭ ءسالت-داستۇرىن كورۋگە كەلەدى.
مىسالى؛ يۋنەسكو كەلەسى 2020 جىل تۇگەل تۇركىنىڭ ابىزى بولعان تونىكوك بابامىزدىڭ جازبا ەسكەرتكىشىنىڭ 1300 جىلدىعىنا ارنالادى، -دەپ حابارلاعان بولاتىندى. مىنە، بۇل دەگەنىڭ كەلەسى 2020 جىلى تونىكوك جازبا ەسكەرتىكىشىڭ 1300 جىلدىعىنا وراي موڭعولياعا شەتەلدەن كەلەتىن تۋريستىلەردىڭ سانى تاعى دا ارتادى.
1300 جىلدىق تاريحى بار تونىكوك جازبا ەسكەرتكىشى
ءقازىر شەتەلدىكتەردى ەرەكشە قىزىقتىراتىن موڭعولياداعى بىردەن ءبىر برەند ول قازاقتاردىڭ – «بۇركىتشىلەر تويى». موڭعوليا ءتۋريزمىن دامىتىپ كەلە جاتقان دا سول «بۇركىتشىلەر تويى».
الەمگە تانىلعان ايشولپان
ايشولپان ارقىلى موڭعوليا قازاقتارىنىڭ «بۇركىتشىلەر تويى» الەمگە تانىلدى! جىلدا «بۇركىتشىلەر تويىن» كورۋگە بايان-ولگەيگە قانشاما تۋريستەر اعىلىپ كەلىپ جاتىر.
1999 جىلدان بەرى ايماق كولەمىندە تويلانىپ كەلە جاتقان «بۇركىتشىلەر تويى» بۇگىندە شەتەلدىك تۋريستەردىڭ سۇراۋى بويىنشا جىلىنا ەكى-ۇش رەتتەن تويلاناتىن دەڭگەيگە جەتكەن.
«بۇركىتشىلەر توي» الەمگە تانىلىپ، شاراسى كەڭەيگەنى سونشالىق بۇكىل الەمنەن «بۇركىتشىلەر تويىن» كورۋگە قوناقتار ءبىر جىل بۇرىن تىركەلىپ، ارنايى كەلىپ تاماشالايتىن، ۇلكەن مەرەكەگە اينالعان.
قازاق مادەنيەتى ارقىلى موڭعوليا ءتۋريزمىن دامىتقان «بۇركىتشىلەر تويى»
كوشپەلى ەلدەردىڭ ىشىندە تەك قازاقتان باسقا ەشبىر ۇلت قولىنا بۇركىت ۇستاپ، قىران قۇستارمەن اڭشىلىق ساياتشىلىق جاساماسا كەرەك-تى. قازاق حالقىنىڭ وسى ءبىر قاسيەتتى ءداستۇرىن، موڭعوليا ۇكىمەتى قولداپ، 2010 جىلى يۋنەسكو-نىڭ جاھاندىق ماتەريالدىق ەمەس مادەني مۇرا رەتىندە تىركەتكەن ەكەن. مىنە، وسىنداي قىران قۇستارمەن اڭشىلىق ساياتشىلىق ءداستۇرىن قازاق ەلى ءوزى قولىنا الىپ، تەرەڭ جاڭعىرتسا بۇگىندە «بۇركىتشىلەر تويىن» كورۋگە شەتەلدىكتەر موڭعولياعا ەمەس، قازاقستانعا اعىلار ەدى...
اكەدەن بالاعا ميراس بولعان ساياتشىلىق
موڭعوليا مەمەلكەتىندە 2016 جىلى تابيعي ورتا، ساياحات، تۋريزم منيسترلىگى «بۇركىتشىلەر تويىن» جىلدىڭ ەڭ تاڭداۋلى ساياحات جانە تۋريزم شاراسى دەپ تانىعان. وسىلايشا اتالمىش توي بايان-ولگەي ايماعىنىڭ عانا ەمەس، موڭعوليا ۇكىمەتىنىڭ تۋريستىك سالاسىنىڭ دامۋىنا زور ۇلەس قوسىپ كەلەدى.
ارينە، بۇل سونداعى جەرگىلىكتى قاراكوز قازاقتارىمىز ءۇشىن دە ۇلكەن ولجا! موڭعولياعا كەلگەن تۋريستلەردىڭ كوبى بايان-ولگەي ايماعىنا اعىلاتىن بولعاندىقتان بۇنىڭ پايداسى سونداعى ءوزىمىزدىڭ قازاقتارىمىزعا اجەپتاۋىر ءناپاقا تابۋعا مۇمكىندىك جاراتىپ جاتىر. ءتۇرلى ءتۇستى ورنەكتەرمەن اشەكەيلەنگەن قول ونەر، كادە-سىي، قازاقي سۋۆەنير، تىگىن سەكىلدى شاعىن جانە ورتا بيزنەسپەن شۇعىلدانۋشى كاسىپكەرلەردىڭ ساۋدا ساتتىق كىرىسى ارتىپ كەلەدى.
موڭعولياعا كەلگەن شەتەلدىكتەر قازاقتىڭ «بۇركىتشىلەر تويىن» عانا كورىپ بىلمەي، سونداي-اق قازاقتىڭ ويۋ-ورنەكتەرىمەن اشەكەيلەنگەن كونە تۇسكيىز، سۋمكا، پۇشپاق تىماق سياقتى كونە بۇيىمدارىن دا ەرەكشە باعالاپ، ساتىپ الىپ جاتادى.
قازاقتىڭ «كيىز» ۇيىنە تۇنەگەن دونالد ترامپنىڭ ۇلى مەن 12 جاسار نەمەرەسى. (موڭعوليا. بايان-ولگەي).
ءتىپتى قازاقتىڭ كيىز ءۇيىن دە شەتەلدىكتەر سول موڭعولياداعى قازاقتار ارقىلى تانىپ ءبىلىپ جاتىر. مىسالى: وتكەندە موڭعولياعا كەلگەن دونالد ترامپنىڭ ۇلى مەن نەمەرەسى دە موڭعولياداعى قازاقتاردىڭ كيىز ۇيىندە تۇنەپ، كيىز ۇيگە ەرەكشە تاڭدانى قايتتى. قازاقتىڭ كيىز ءۇيى جايلى ءوزىنىڭ ينستا پاراقشاسىندا دا جاقسى پىكىرلەرىن جازدى...
مىنە، وسىلايشا شەتەلدىكتەرگە قازاقستان برەند ەتىپ كورسەتۋى ءتيىس بولعان كيىز ءۇي، تۇسكيىز، ويۋ-ورنەك، «بۇركىتشىلەر تويى» سياقتى كوپتەگەن قازاق مادەنيەتىن موڭعوليا قازاقتارى ارقىلى موڭعول مەملەكەتىنىڭ ءوز برەندنە اينالدىرىپ بارادى!
P.S: قىتايدىڭ ىلە قازاق اۆتونوميالى وبلىسىندا دا قازاقتاردىڭ ءداستۇرى مەن بولمىسىن تاماشالاۋ ءۇشىن جىلىندا 100 ميلليونداي تۋريستتەر قىتايعا كەلەدى ەكەن... موڭعوليا مەن قىتايداعى قازاقتاردىڭ شەتەل تۋريستەرىنىڭ نازارىن اۋدارتقان قازاقي ۇلتتىق قۇندىلىعى مەن ءسالت-داستۇرىن، جالپى مادەنيەتىن قازاقستاندا نەگە جاڭعىرتىپ، ەتنوتۋريزمىن دامىتپاسقا دەگەن وي كەلەدى...
جۇباتگۇل سامبۋۋ قىزى
6alash ۇسىنادى
