ۇلى دالانىڭ ۇشان-تەڭىز رۋحانياتىنىڭ ءبىر قيىرى شەكارا سىرتىنداعى قانداستار قونىستان ايماقتاردا ەكەنى بارشاعا ايان. اسىرەسە، قازاقتىڭ كۇيشىلىك مەكتەبىنىڭ اسا ءىرى ءبىر بۇتاعى سانالاتىن التاي-تارباعاتاي مەكتەبىنىڭ باسىم كوپ ساندى وكىلدەرى شىعىستاعى كورشىمىز قحر-داعى التاي، ىلە، تارباعاتاي جانە ەرەنقابىرعا ايماقتارىندا ءومىر سۇرگەنى بەلگىلى. ەلىمىز تاۋەلسىزدىگىن العان وتىز جىلدان بەرى اتاجۇرتىنا ورالعان اعايىننىڭ ونەرپاز ازاماتتارى اتالعان ونەر مەكتەبىنىڭ از بولماعان مۇرالارىن ەل قازىناسىنا اكەلىپ قوستى. بۇل ارينە ەگەمەندىگىمىزدىڭ ارقاسى.
رەسپۋبليكالىق كۇيشىلەر وداعى الماتى فيليالىنىڭ «كۇي الەمى» اتتى مادەني شاراسى كەشە (2021 جىلى 21 جەلتوقساندا) مۋلتمەديالىق ءداستۇرلى مۋزىكا ورتالىعىندا ءوتتى. شارانىڭ ءسوز تىگزىگىنىن بەلگىلى كۇيشى، شىعىس شەرتپە كۇيلەرىن زەرتتەۋشى مۇقاش تاڭعىت ۇلى ۇستادى.
اتالعان شارادا كۇيشىلەر وداعىنا جاڭادان مۇشە بولعان ون ونەرپازعا مۇشەلىك كۋالىك بەرىلەدى. كۇيشى، ۇستاز، نەسىپگۇل شاكەيەۆا شارىنبايقىزىنا «قۇرمانعازى» توسبەلگىسىمەن ماراپالسا، كۇيشى، قۇرمانعازى اتىنداعى ۇلتتىق كونسەرۆاتورياسىنىڭ وقىتۋشىسى اسىلبەك كەڭەيگەسوۆقا «ق ر مادەنيەت سالاسىنىڭ ۇزدىگى» توسبەلگىسى بەرىلدى. تالاسبەك اسەمقۇلوۆ اتىنداعى كۇيشىلەر بايقاۋىنىڭ ءبىرىنشى ورىن جۇلدەسى ەرتاي بارلىقوۆقا تاپسىرىلدى. شىعىس كۇيلەرىن ءبىر كىسىدەي زەردەلەگەن مۇقاش تاڭعىتۇلىنا «حالىق كۇيشىسى» توسبەلگىسى تابىس ەتىلدى.
اتالعان يگى شارانىڭ ەڭ ۇلكەن جاڭالىعى – التاي-تارباعاتاي كۇيشىلىك مەكتەبىنىڭ نەگىزىندە قۇرىلعان «شىعىس شەرتپەسى» اتتى ءانسامبلدىڭ تۇڭعىش رەت رەسمي تۇساۋى كەسىلدى. «شىعىس شەرتپەسى» ءانسامبلى كامال ماقاي ۇلىنىڭ كۇيى «مەنىڭ دومبىرامدى» كۇمبىرلەتتى.
كەشكە اتالعان مەكتەپ وكىلدەرى، زەرتتەۋشىلەر جانە ونەرسۇيەر كوپشىلىك قاتىستى. اتالعان مەكتەپ اياسىندا قۇرىلعان انسامبلدەن ەلىمىزدىڭ كۇتەر ءۇمىتى كوپ. بۇل مەكتەپ ەلىمىزدىڭ ونەر جانە رۋحانيات سالاسىندا تولىققاندى جالپىلاسسا، مىڭجىلدىق مۇرامىز بولعان كۇي تۇلپارىنىڭ جال-قۇيرىعى تۇتاسىمەن تولىسا تۇسەر ەدى.
