جازۋشى جاقسىلىق ءساميت ۇلى
فيلم
جاقسىلىق ءساميت ۇلى
(1940–2015) قحر-دىڭ جەمەنەي اۋدانى، لاستى مەكەنىندە تۋعان. شىڭجاڭ ينستيتۋتىنىڭ فيلولوگيا فاكۋلتەتىن بىتىرگەن (1959). 1959–1979 جج. سولشىل ساياسات كەزىندە «ۇلتشىل» اتانىپ، ايداۋدا بولعان. 1980–1989 جج. «التاي اياسى» جۋرنالىندا باس رەداكتور، 1989–1993 جج. شىڭجاڭ تەليەۆيدەنيەسىندە رەداكتور. 1993 جىلى قازاقستانعا كوشىپ كەلگەن. ءال-فارابي اتىنداعى قازمۇۋ-دىڭ شىعىستانۋ فاكۋلتەتىندە دوسەنت، ءبىراز جىلدار ۇستازدىق قىزمەت اتقارعان.
1957 جىلدان باستاپ ادەبيەتكە ارالاسقان. جۇڭگو حالىق رەسپۋبليكاسىنىڭ مەملەكەتتىك سىيلىعىنىڭ لاۋرەاتى (1985)، «سەرگەلدەڭ» تريلوگياسىنىڭ ءبىرىنشى جانە ەكىنشى كىتابى (1996–2000)، «قىتايداعى قازاقتار» اتتى مونوگرافياسى (2000) باسىلىپ شىقتى.
شىعارمالارى: اتامەكەن. پوۆەست. «ءۇرىمشى»، 1983؛ تاۋ سامالى. پوۆەست. «ءۇرىمشى»، 1985؛ اق تىلەك. پوۆەست. «كۇيتىن»، 1990؛ اق ساۋلە. پوۆەست. «ءۇرىمشى»، 1992؛ سەرگەلدەڭ. رومان. 1-كىتاپ. ا.، «انا ءتىلى»، 1996. 2015 جىلى 21 جەلتوقسان باقيلىق بولدى.
سوڭعى كوشتىڭ سەركەسى ەدىڭ، جاقسىلىق
سوڭعى كوشتىڭ سەركەسى ەدىڭ، جاقسىلىق،
سۇلۋ ءسوزدىڭ ەركەسى ەدىڭ، جاقسىلىق.
جارماسقان عوي تاعدىرىڭنىڭ قىرسىعى،
ەتەگىڭە ەرتە سەنىڭ، جاقسىلىق!
قاندى التايعا قانىعىپ ەڭ ، جاقسىلىق،
تاعدىرىنا تارىعىپ ەڭ، جاقسىلىق.
«قاھارلى التاي» قالامىڭنان قان قۇسىپ،
ماڭدايىڭنان جارىلىپ ەڭ، جاقسىلىق.
«تاعدىر جۇگىن ارت» دەسەتىن جاقسىلىق،
«ازات ەلگە تارت» دەسەتىن جاقسىلىق.
كۇلەر بولسا شالقاسىنان شاشىلىپ،
شامىرقانسا شارت كەتەتىن، جاقسىلىق.
ەركىن ەلدە ەرۋلەدىڭ، جاقسىلىق،
تالانتىڭا سەنۋلى ەدىڭ، جاقسىلىق.
قازاق ەلى ازاتتىعىن العاندا،
بار بولعانى ەلۋدە ەدىڭ، جاقسىلىق.
ساۋىر تاۋداي ەڭسەڭ بولعان، جاقسىلىق،
تون جاعاسى سەڭسەڭ بولعان، جاقسىلىق.
تاعدىر ءبىتىپ تاۋسىلعاندا ۋاقىتى،
تاۋقىمەتى توم -توم بولعان، جاقسىلىق.
الماس احمەتبەك ۇلى
ءساميت ۇلى سايىتانان الىندى
