ءازىمحان ءتىشان ۇلى اۋدارما ولەڭدەرى

ءازىمحان ءتىشان ۇلى (1927-1993) التاي ايماعى قابا اۋدانىنىڭ تۇلەگى. اۋدارماشى، جۇڭگو بايىرعى ءتىلىنىڭ مامانى، ادەبيەت تانۋشى، باسپاگەر.

ءمان

لۋسيەن بلاگو (رۋمينيا اقىنى)

گۇلدىڭ ءمانى - جەمىسىن ءتۇيۋ ەمەس،
ولمەك ءمانى - توپىراققا سىيۋ ەمەس،
جانباق ءمانى - ءتۇتىن بوپ ۇشۋ ەمەس،
پەشتىڭ ءمانى - كۇل جانىپ ءتۇسۋ ەمەس،
جاپىراق ءمانى - كولەڭكە بولعاندا ەمەس،
كۇزدىڭ ءمانى - قىراۋى قونعانعا ەمەس،
جولدىڭ ءمانى - تەرەڭ وي، ولان شىراق،
كوكتىڭ ءمانى - بۇلتتارى كوشكەن شۇباپ.
ءيا، جولاۋشى، جول ۇزاق، ۇزاق-ۇزاق.
(«كوكجيەك»، 1987 جىل 2-سان)

ماحابباتتىڭ ايعايى

كلوداريا (فرانسيانىڭ ايەل اقىنى)

ماحابباتتىڭ ايعايى
تاماعىما
تىعىلدى،
بايقاعان جوق ءتىرى پەندە.
دەسەدە-اۋ باقىتتىڭ ءتاڭىرىسى،
نەتكەن سونشا كىرشىكسىز ول پاك ەدى!

قورقىنىشتىڭ ايعايى
تاماعىما
تىعىلدى،
ەستىگەن جوق ءتىرى پەندە.
دەسەدە-اۋ، ادامزات دۇنيەسى،
نەتكەن سونشا ول ءزىلماۋىر قاتاڭ ەدى!

ايعايى ماحابباتتىڭ، قورقىنىشتىڭ،
ايعايى نار كۇماننىڭ ۇنسىزدىكتىڭ
جاڭعىرار ساپارىڭنىڭ ون بويىندا،
تىڭدا انە،
كۇبىرلەيدى
قۇلاعىڭا ءۇن!
(«كوكجيەك»، 1987 جىل)

جاس

جان گروسجان (فرانسيا اقىنى)

جازعى اعاشتىڭ كولەڭكەسى
جول بويىنا قۇلادى.
شىلدەلىكتىڭ داۋىسى
تاڭعى اۋامەن تىنادى.

بارادى جەتىم بالاداي
جول كەزىپ قيىر-قياقتى.
قوزعالىپ كەتتى كولەڭكە
ال، مەن سول قالپىم سياقتى.

شاقىرسا دا جەر ءتۇبى
تاۋەكەلگە ارت دەپ جۇگىڭدى.
سىرقىراپ مەنىڭ تابانىم،
شارشاعانىم ءبىلىندى.

كولەڭكەگە دەم الدىم،
كىتاپتان اشپاي ءبىر پاراق.
ايلار-كۇندەر قاسىمنان،
وتە بەردى سيپالاپ.