Almatyda «Shyǵystyń sónbes juldyzy – Dýbek Shalǵynbaı» atty kitap shyqty. Kitapty belgili tarıhy ǵalym Álimǵazy Dáýlethan men aqyn, alashtanýshy Ádilet Ahmetuly qurastyrǵan. Kitap jaqynda ǵana qurylǵan «Máńgitas» Alash rýhanıatyn qoldaý qorynyń qarjylyq demeýimen basylǵan.
Dýbek Nurtazauly Shalǵynbaev HH ǵasyr basyndaǵy qytaı qazaqtary arasynan shyqqan asa kórnekti tulǵa, alǵashqy ýnıversıtet túlegi, qytaı tiliniń mamany, qazaq tili men mádenıetiniń janashyry, jazýshy hám jýrnalıs ári maıtalman aýdarmashy, tipti sol dáýirdiń ózinde-aq jas ta bolsa kóptiń kóńilinen oryn alǵan, el aýzyna ilingen, qoǵam jáne memleket qaıratkeri. Dýbek Shalǵynbaev týraly zertteýler keıin bastaldy. Onymen birge ómir súrgen úzeńgiles dostary J.Babalyquly, Q.Qanafın, B.Bafınder esti estemeler jazyp qaldyrǵan. Sonymen birge arǵy bette Bátish Aqynqyzy Dýbektiń ómiri týraly jeke kitapsha daıyndaǵan. Aýmaly-tókpeli saıası kezeńderde D.Shalǵynbaevtyń shyǵarmalary túgelge jýyq qoldy bolǵan. Bul jınaqqa D.Shalǵynbaevtyń qolda bar azyn-aýlaqty shyǵarmalarynan tys, atalǵan avtorlardyń estelikteri men eńbekteri, sondaı-aq "İle tarıhı materıaldary", «Mura» jýrnaly, «Alqap» atty kóptomdy almanahta jaryq kórgen keıbir maqalalar men jeke zertteýshilerdiń jazbalary ózgertilmeı sol qalpynda engizilip otyr. Oqyrman qaýymǵa usynylyp otyrǵan osy jınaq aty umytylyp bara jatqan tarıhı tulǵa týraly tanymdy ulyqtap, Dýbek týraly zertteýlerdiń ornyn toltyrady degen úmittemiz.
«Bul kitap Álimǵazy Dáýlethanulynyń 80 jyldyq mereıtoıyna oraı ótken, «Ejelgi jáne ortaǵasyrlardaǵy Qazaqstannyń jańa tarıhı máseleleri» atty halyqaralyq ǵylymı-tájirıbelik konferensıada tusaýy kesildi. Aldaǵy ýaqytta atalǵan kitaptyń arnaıy tanystyrylymyn ótkizýdi josparlap otyrmyz», – deıdi qurastyrýshylar.
