Maıra Muhamedqyzy 1969 jyly 9 mamyrda QHR-da dúnıege kelgen. Abaı atyndaǵy Qazaq memlekettik akademıalyq opera jáne balet teatyrynyń ánshisi, QR eńbek sińirgen ártisi, «Tarlan» syılyǵynyń laýreaty, QR Memlekettik syılyǵynyń laýreaty, Parıjdegi "Grand Operanyń" Qazaqstannan shyqqan tuńǵysh ánshisi.
Halyq áni "Alqońyr"
Tarıhı otanyna 1994 jyly oraldy. Maıra Muhamedqyzy Beıjiń Ulttar Ýnıversıtetiniń Mýzyka Fakúltetin (Djoý Ben Chın synyby) jáne Pekın Konservatorıasyn (Go Shý Djen synyby) bitirgen. Almatyda Qurmanǵazy atyndaǵy Qazaq ulttyq konservatorıasynda (profesor N.A. Sharıpovtiń synyby) stajırovkadan ótken.
Maıra Muhamedqyzynyń (Eýropa sahnasynda Maıra Kereı) shyǵarmashylyq ómirindegi aıtýly kezeńi Fransıanyń Grand-opera teatrymen (Opéra National de Paris) kelisim-shart jasaýynan bastalady. Álem opera arenasyna Pýchchınıdiń «Bogemasyndaǵy» Múzetta rólimen debút jasap, opera juldyzdary tenor Roberto Alaná, Marsello Alvarez qatarlas ánshilermen birge án saldy. G.Donısettıdyń «Mahabbat dárisi» (L'Elisir d'Amore) atty komedıalyq operasynda Adına rólimen Opéra National de Lorraine, Opéra de Rennes, Théâtre de Caen, Grand Théâtre de Reims jáne Opéra National Bordeaux sahnalarynda ónerin kórsetti. Álemdik klasıkalyq operanyń úzdik úlgilerine qatysyp, jetekshi partıalardy oryndap, evropadaǵy opera karerasyn búginge deıin jalǵastyryp keledi.
2005 jyly Maıra Muhamedqyzy áıgili álem opera juldyzy Plasıdo Domıngonyń shaqyrýymen AQSH opera sahnasyna kóterildi. Vashıngton Ulttyq Opera Teatrynda P.I.Chaıkovskııdiń «Orlean Bıkeshinen» Agness Sorel partıasyn oryndady, aty ańyzǵa aınalǵan álem opera juldyzy Mırella Frenımen bir sahnada án saldy.
Gay City News aqparat quralynyń aıtýynsha, Maıra Kereı - keremet oryndaýshylyq sheberligimen qosa tabıǵat bergen ajary men óneri astasqan daryndy ánshi. «Tamasha daýystyń ıesi Maıra Kereı biregeı darynymen, tabıǵı qýatty, ashyq taza, jaǵymdy da ádemi daýysymen kórermender júregin jaýlap aldy. Maıra Kereı Vashıngton operasyna úlken róldermen qaıta oralatynyna kámil senemiz», - dep jazady The Washington Times.
Maıra Muhamedqyzy Qazaqtyń memlekettik Abaı atyndaǵy akademıalyq opera jáne balet teatrynyń soprano daýysty jetekshi ári bedeldi ánshisi. Maıranyń teatrdaǵy repertýarynda Brýsılovskııdiń «Qyz Jibek» operasyndaǵy Jibek, Jubanov pen Hamıdıdiń «Abaı» operasyndaǵy Ajar, Verdıdiń «Travıatasyndaǵy» Vıoletta, «Rıgolettodaǵy» Djılda, Bızeniń «Karmen» operasyndaǵy Mıkaela, Donısettıdiń «Lúchıa dı Lammermýrdegi» Lúchıa, Gýnonyń «Faýstyndaǵy» Margarıta, Pýchchınıdiń «Týrandot» operasyndaǵy Lıý jáne basqa da partıalary bar.
Sońǵy opera maýsymynda Maıra Muhamedqyzy Gýnonyń «Romeo men Djýletta» operasyndaǵy basty partıany Opéra National de Lorraine opera teatrynda, Donısettıdiń «Don Paskýale» operasyndaǵy Norına rólin Grand Théâtre de Genève jáne Théâtre de Caen sahnalarynda, Pýchchını «Bogemasyndaǵy» Múzetta partıasy jáne Gýnonyń «Faýstyndaǵy» Margarıta partıasyn Opéra National Bordeaux opera teatrynda, Brıtınniń «Jazǵy túndegi tús» operasynda Tıtanıa rólin Opéra National de Lorraine, Grand Théâtre de Toulon jáne Opéra National Bordeaux sahnalarynda somdady.
Maıra Muhamedqyzynyń konserttik repertýary baı da baısaldy. Ánshiniń álemdik klasıkalyq operasynan bólek, operetta, múzıkl, kameralyq vokaldy shyǵarmalardan, halyq ánderinen turatyn baı repertýary únemi tolyqtyrylý ústinde. Repertýaryndaǵy kóptegen shyǵarmalar Qazaqstan sahnasynda buryn sońdy oryndalmaǵan. Operalyq jáne konserttik repertýaryn asqan talǵampazdyqpen tańdap, úlken eńbekqorlyq pen izdenistiń úlgisin kórsetip keledi. Maıranyń oryndaýshylyq tájirıbesi Bethovenniń 9-shi sımfonıasyn, Gaıdnniń «Álem jaratylysy» oratorıasyn, Mendelsonniń Elijah oratorıasyn, Mosarttyń Exultate Jubilate, Pergolezıdiń «Stabat Mater», Rossınıdiń «Kishkene Saltanatty Messa»,
Maıra Muhamedqyzy jeke konserttik, gastróldik saparda jıi bolady. Ol Pekın, Gonkong, Stambýl, Delı, Seýl, Máskeý, Sankt-Peterbýrg, Býdapesht qalalarynda jáne Slovakıada Fore, Pýlenk, Debússı, Rahmanınov, Chaıkovskıı, sonymen qatar, qazaq jáne qytaı halyq ánderin oryndady. Pekınniń «Jon Shan Lı Tan» konserttik zalynda ortalyq Pekın opera teatrynyń sımfonıalyq orkestrimen jáne Ulybrıtanıadaǵy «Kadogan-holl» konserttik zalynda Londonniń Koróldyq sımfonıalyq orkestrimen jeke konsertteri ótti.
2009-2010 opera maýsymynda Maıra Muhamedqyzy Kerýbınıdiń «Medeıa» operasyndaǵy Glaýche rólin somdaıdy. Sonymen qatar, Opéra National de Lorraine teatrynyń sımfonıalyq orkestri súıemeldeýimen Mozart et les femmes atty jeke konserti Fransıanyń Nansı qalasynda ótedi.
Qazaq memlekettik Abaı atyndaǵy akademıalyq opera jáne balet teatry 2009-2010 maýsymynda Maıra Muhamedqyzyna arnaıy Donısettıdyń «Mahabbat dárisi» (L'Elisir d'Amore) atty komedıalyq operasynyń jańa qoıylymyn uıymdastyrýda.
Maıra Muhamedqyzy Qazaqstannyń óner Elshisi bolyp, qazaqty ózge elderge tanytyp, ulttyq opera óneriniń jalaýyn kóptegen alys-jaqyn shetelderde jelbiretip, mártebesin kóterdi, egemen elimizdiń maqtanyshy, qazaq halqynyń juldyzdy ánshisine aınaldy. Qazaq memlekettik Qurmanǵazy atyndaǵy akademıalyq halyq aspaptary orkestrimen osyǵan deıin oryndalmaǵan halyq ánderinen turatyn «İnjý Marjan» taspasyn jazyp, óner súıer qaýymnyń ystyq yqylasyna bólendi. Maıranyń óneri jaıly buqaralyq aqparat quraldary keńinen nasıhattady. Maıra tamasha ánshiligimen qatar, Ámir Qaraqulovtyń «Jylama!» atty kórkem fılminde basty róldi sheber oryndap, jańa bir qyrynan kórindi.
«Altyn aıdahar» baıqaýynda I syılyq (Qytaı, 1988 j.); «Tomaz Alkaıde» baıqaýynda I syılyq (Portýgalıa, 1997 j.); Máskeýdegi P.I.Chaıkovskıı baıqaýnda III syılyq, M.Ia.Davydova atyndaǵy arnaıy dıplom (Reseı, 1998 j.); Elena Obrazsova baıqaýynyń arnaıy syılyǵy (1999 j.); «Úmit» nomınasıasy boıynsha «Tarlan» táýelsiz mesenattar syılyǵynyń ıegeri (2000 j.); «Qazaqstan jyl tańdaýy - 2004» baıqaýynyń «Altyn Adam» syılyǵy ıegeri.
6alash usyndy
