Almatyda «Zýqa batyr» atty jańa kitap baspadan shyqty. Kitaptyń avtory Saǵdolla Nuralyuly.
Kitap jańadan qurylǵan «Mäŋgitas» Alash rýhanıatyn qoldaý qory jaǵynan «Bilge» baspasynan shyqqan.
Kitaptyń tusaýkeseri keshe, 2023 jyly naýryzdyń 16 jańasynda Almatydaǵy №4 qalalyq kitaphanada ótti.
Zýqa batyr eldiń ese-teńdigi úshin kúresip, osy jolda ǵazız janyn qurban etken kórnekti tarıhı tulǵa. Zýqa batyrdyń erlik pen kúreske toly ómiri órnektelgen bul dastan Saǵdolla Nuralyulynyń qalamynan týǵan. Saǵdolla Nuralyuly belgili tarıhı oqıǵalar men tarıhı tulǵalardy taqyryp ete otyryp kóptegen dastan, óleńder jazǵan aqyn. Ózi de Zýqa batyr kóregen dáýirdiń sońǵy shıreginde eki elde ómir súrgen. Ásirese, Ór Altaı jerinde óziniń keıipkeri, qazaqtyń qas batyry Zýqa qajymen dámdes bolady. Batyr sháıt bolǵannan keıin, Saǵdolla Nuralyuly izin kórgen inilik paryzy retinde, Zýqa batyrdyń kisilik bolmysyn tarıhı oqıǵalarmen qosa baıandaı otyryp, atalǵan kesek týyndyny muraǵa qaldyrady. Bul dastan elimizde tuńǵysh ret kitap bolyp basylyp otyr. Kitap jalpy oqyrman qaýymǵa arnalady.
Kitaptyń tusaýkeserine belgili aqyn Silámhat Seıtqamza, jazýshy, etnogarf Baıahmet Jumabaıuly, kúıshi Arshyn Kásimbaıuly, tarıhshy Eldes Orda bastaǵan zıaly qaýym ókilderi men ádebıetsúer jastar qatysty. Ádebı shara aıasynda atalǵan qoǵamdyq qordyń ashylýy boldy. Onan syrt, «Bilge» baspasynan shyqqan «Nurǵojaı batyr estelikteri», Shoman Qabdyrahmanuly qurastyrǵan «Bulanaıdan asqan kósh» qatarly kitaptardyń tusaýkeseri ótti.
Igi bastamaǵa ónerpazdar án men kúıden shashý shashty. Úlkender aq batasyn berip, el rýhanıatyna qyzmet etýdi kózdegen «Mäŋgitas» qoryna aqjarma tilekterin bildirdi.
