Almatydaǵy "Bilge" baspasynan, ótken ǵasyrdyń 30-jyldary Itjekkennen aman kelip, qýdalaýdan qutylý úshin, qos sábıin jetelep, jaıaýlatyp, taý asyp, tas basyp, Qytaı shekarasynan ótip, Ór Altaı jerine birer jyl buryn kóship barǵan Ábdikárim bolystyń eline qosylǵan bas keıipker Qabdyrahymannyń balasy Shorman aqsaqal jazǵan, eki tizgin, bir shylbyr qazaqtyń qolynan ketken qasiretti ǵasyrda arǵy bet pen bergi bette qyrǵynǵa, qýǵyn-súrginge, saıası aıyptaýlarǵa, jalǵan jalaǵa ushyrap, Qazaqstan táýelsizdik alǵanǵa deıin keń kósilip keremet ǵumyr keshpegen qandas aǵaıynnyń asa aıanyshty taǵdyry beınelengen "Bodandyq" atty kitap basylyp shyqqan bolatyn.
Atalǵan kitaptyń tusaýy keshe Almatydaǵy N 4-kitaphanada kesildi. Kitap aty aıtyp turǵandaı, bodandyqta bolǵan elimiz tarıhynyń bir bólegi sińirilgen bul eńbektiń jurtqa alǵash jarıa bolǵan jıyny óte joǵary deńgeıde, áserli tolqynystar ishinde ótti.
Tusaýkeerge aqyn Slamhat Seıithamza, Shyǵystanýshy jas maman Eldes Orda, Ádebıettanýshy Erzat Erkinuly Erqaǵan. Er, Kitaphananyń ý.m.a. meńgerýshisi Mıra Maǵazqyzy qatarly zıaly qaýym ókilderi, ádebıetsúı er oqyrmandar men qalamgerdiń jaqyndary, uıymdastyrýshy kitaphana qyzmetkerleri qatysty. Atalǵan kisiler kitap avtoryna ystyq yqylasty lebizderin bildirýmen birge, ótken ǵasyrdaǵy ultymyzdyń el ishi-syrtyndaǵy irili-kishili ult azattyq kóteriliseriniń tarıhı maǵynsyna toqtalyp ótti. Arasynda kúmbirli kúı, ásem án oryndaldy. Avtorǵa jaqyndary syı-sıapat kórsetti.
Kitapty baspadan shyǵarǵan "Bilge" ujymy tyńnan túren salǵan aqsaqalǵa alǵys hat berdi. Jınalǵan jurtqa elimizdiń ese-teńdigi qoldan ketken kezeńdegi qıyn da qyshqyl taǵdyryn tarıh baıan úlgisinde, óziniń basynan ótken, ákesi jáne dáýirles aqsaqaldar tap bolǵan tarıhı oqıǵalar negizinde jazylǵan "Bodandyqtyń" bergen áseri men taǵylymy erekshe boldy. El egemendik alǵannan keıin asyǵa júrip atajurtqa jetip, qalamyn erkin siltegen aqsaqal – Shorman Qabdyrahmanuly sharaǵa qatysýshylarǵa sheksiz alǵysyn bildirip, aǵynan jarylyp, aq batasyn berdi. Keleli kezdesýdiń sońy aq dastarhanǵa ulasty.
Biz balapan basyna, turymtaı tusyna tartqan qandy ǵasyrdaǵy qazaqtyń beınesin aınytpaı jazyp, Saryarqasynyń samalyna keýdesin tosyp, Alataýyna arqa súıep otyrǵan avtorǵa qoldaýshy bolyp, zor densaýlyq, bıik shyǵarmashylyq tabys tileımiz!
Ádilet Ahmetuly
