"قارا ايعىر" كۇيى
اڭگىمەلەپ، شەرتكەن: مەدەن كامالي ۇلى
مەدەن كامالي ۇلى (10.06.1945ج. - 10.06.2009ج.)
1945 جىلى 10 ماۋسىمدا جۇڭگو حالىق رەسپۋبليكاسى شينجياڭ ۇيعىر اۆتونوميالى وبىلىسى، التاي ايماعى، كوكتوعاي اۋدانى، قاراتۇنكە (قازىرگى قىزىلشىلىك) اۋىلىندا، تۇرعىن ەلدى مەكەنىندە ءدىني وتباسىندا دۇنيەگە كەلگەن. اكەسى كامالي، اناسى ءزۇپىراننىڭ تاربيەسى مەن ءومىر كەڭىستىگىنە قانات قاعادى. قاتال تاعدىر 12 جاسىندا اكەدەن، 25 جاسىندا اناسىنا ايىرادى. 11 جاسىنا دەيىن اكەسىنەن تولىقتاي ءدىني ساۋات الىپ شىعادى، كەيىن مەملەكەتتىك ەمتيحان سىناقتارىنان سۇرىنبەي ءوتىپ، ۇزدىك ناتيجەمەن «ديپلومدى مولدا» دارەجەسىن الادى. ۇلى اكەسى ءابدىرازىقتان جالعاسقان قاسيەتتى قۇران ىلىمىمەن حالىققا قىزمەت كورسەتەدى. تەپسە-تەمىر ۇزەتىن جاستىق شاعى قىتايدىڭ «مادەنيەت زور توڭكەرىسى» دەپ اتالاتىن سولاقاي ساياساتىنا تۇسپا-تۇس كەلەدى. ون جىلدىق الاساپىراندا ەڭبەكقورلىعى مەن، زەرەكتىگى مەن تەپكىدە جۇرسەدە اسىل ءدىنىن ۇمىتپاي، تەكتىلىگىن كورسەتىپ، اتادان بويعا دارىعان ونەرى شەبەر ۇستالىعىن، اقىندىعىن، دارىندى كۇيشىلىگىن جالعاستىرىپ دامىتا بەرەدى. كەيىن زامان جاقسارعاندا حالىقتىڭ ءدىني ساۋاتىن اشىپ، بالا تاربيەلەپ اۋىلدىڭ سيلى مولداسى اتانادى. سول كەزدەرى اۋىرۋ-سىرقاۋ، كومەككە مۇقتاج جاندارعا حالىقتىڭ ۇيىقىسى بولىپ، كومەكقولىن سوزىپ وتىرعان.
مەدەن كامالي ۇلى جۇبايى اسەمحان حاقانقىز
ءانشى، سازگەر ىرعىنبەك مەدەن ۇلى
«جۇڭگو قازاقتارى» دەپ اتالاتىن كينودا قازاق كۇيشىلىك ونەرىن كورسەتەدى. سونىمەن بىرگە اۋدان كولەمىندەگى اقىندار ايتىسىندا اقىندىق قىرىمەن حالىققا تانىلسا، «قىزقۋار»، «قارايعىر»، «بۇلبۇل» قاتارلى كۇيلەرى شىڭجاڭ تەليەۆيدەنيەسىنىڭ «التىن قورىندا» ساقتالعان. «اۋىل مەكەنى»، «ارناۋ»، «نە ىستىق»، «قانات سۋىلىم»، «ارمان»، «ءۇمىت»، «اعا اقىنعا ارناۋ»، «سالەمدەمە» قاتارلى كوپتەگەن ولەڭدەرى جانە «جوتا قاجى»، «مارقادىق باتىر» تۋرالى تاريحي ەڭبەكتەرى بار.
6alash ۇسىندى
