كونە قولجازبا تابىلدى، ءسال بولماعاندا قۇرىعانداي ەكەن... مەنەن باسقا تانيتىندار تابىلا قويماس. كۇلتەگىننىڭ كوك تاسىنان تاعىلىم وقىعان قارجاۋباي سارتقوجا كوكەم مەن كونە ءمانجى جازۋىن وقيتىن جالعىز قازاق باقىت ەجەنحان اعامنىڭ قولىنا بۇل جازبا تۇسپەگەن دە بولار.
بۇل جازبا بي ءارى شەشەن لاقتىڭ التايدىڭ ءتورت ءبيىنىڭ ءبىرى باپىنىڭ ۇيىنە بارعاندا ايتقانى ەكەن. ءالقيسا بىلاي بوپتى:
لاق بي باپىنىڭ ۇيىنە بارعاندا بايبىشەسى ءشايدى كەشىكتىرىپ قۇيىپتى، سوندا لاق شەشەن:
زاكەريانىڭ ايەلى تورە بولعاسىن تەكتىمىن دەيدى،
ءماميدىڭ ايەلى سۇلۋ بولعاسىن بەتتىمىن دەيدى.
جاكەنىڭ ايەلى نايمان بولعاسىن ەپتىمىن دەيدى،
ءومىرتايدىڭ ايەلى بالالى بولعاسىن ك...ن دەيدى،
باپىنىڭ ايەلى سەن سەمىزدىگىڭدى كورسەتىپ ەتتىمىن دەپ بۇلدانىپ وتىراسىڭ، تەزدەت ءشايىڭدى،- دەگەن ەكەن.
ءبىر اۋىز سوزگە توقتاعان قايران دانىشپان بابالارىمىز، اردى ويلاعان انالارىمىز، ارۋاقتارىڭنان اينالايىن. بۇل اتى اتالعان تۇلعالاردى ءارقايسىسى ءبىر-بىر تاريح، شەجىرە. مىسالى اتاقتى ءومىرتاي بي، ءيسى جادىكتىڭ يەسى دە كيەسى بيقاجى كورنەكتى جازۋشى ماعاز رازدان ۇلىنىڭ "التايدىڭ اقيىقتارى" رومانىنىڭ باس كەيىپكەرى. ال ەندى لاق بي التايداعى اتاقتى ءتورت بي تورە زامانىندا ۇلىقتارعا باعىنباي، وزىنە قاراستى ەلدى ءتۇرلى المان سالىقتان ساقتاعان قارا بيلەردىڭ ءبىرى، سول زامانداعى "وسەردى وسىرمەۋ، لاقتى سەركە شىعارماۋ" دەيتىندەي قارسىلىققا قاراماستان تۋعان حالقىنا جان اياماي قىزمەت كورسەتكەن تاريحي تۇلعالار.
جاكە بي دە تۋرا سونداي ءادىل بي بولعان. "كەرەيدىڭ جاكەسى، مەركىتتىڭ اكەسى" اتانعان ايگىلى بي تۇتاس رۋلى ەلدى ۋىسىندا ۇستاپ، بيلىك جۇرگىزگەن. وسەر دە ءارى بي، ءارى شەشەن باتىر ادام بولعان ەكەن. 1883 جىلعى ءمانجى ۇكىمەتى مەن شار روسسيا اراسىنداعى شەكارا كەلىسىمىنە دەيىن التايدى بوكتەرلەگەن شەكارا سىزىعى تارتىلعان قابا ءوڭىرى وسەردىڭ بيلىگىندە بولعان، بۇگىنگى تاڭدا دا بابامىزدىڭ جايلاۋىنىڭ جارتىسى رەسەيدە، جارتىسى قىستاۋىمەن قىتايعا قاراستى مەكەندە. وسى جەردىڭ اماندىعىن، التايدىڭ تۇتاستىعى ءۇشىن تارتىسقا تۇسكەن بابامىزدى ورىستار شەكارا ءبولىسىن سىلتاۋ ەتىپ زايسانعا شاقىرتىپ، ۇزەڭگىسىنە ۋ جاعىپ ولتىرەدى.
بايقاسام بۇل ءبىر بەت قاعاز ءبىر كىتاپتىڭ جۇگىن كوتەرىپ تۇرعانداي ەكەن. الداعى ۋاقىتتىڭ جەمىسىن كورەيىك...
تالاپبەك تىنىسبەك ۇلى
6alash ۇسىنادى
