الماتىدا «كوكجيەكتە كۇن ساۋلە» اتتى ولەڭدەر جيناعى جارىق كوردى.
ارعى بەت قۇمىل ايماعى اراتۇرىك جەرىندە ءتۋىپ-وسىپ، ءوز ورتاسىنا شىعارمالارى ارقىلى تانىس بولعان اسەرباي بايتوللا ۇلى تاۋەلسىز اتامەكەنىنە كەلگەننەن كەيىن، ەركىن ەلدىڭ اۋاسىمەن تىنىستاي ءجۇرىپ، كوكەيدەگى ولەڭ جولدارىن كىتاپ ەتىپ وقىرمانعا ۇسىنىپ وتىر.
كىتاپ كوپشىلىك قاۋىمعا ارنالعان. العى ءسوزىن ساعاتبەك اقىمەتقاجي ۇلى جازعان بۇل جيناق «ءۇشقيان» باسپاسى ارقىلى وقىرمانعا جول تارتۋدا. اقىن ولەڭدەرىندە:
ءومىر قايدا ءبىر تەرىدە ازاپسىز،
نامىسى ءور ماڭگۇرتتىكتەن ازاتپىز.
كوك بايراقتى سارى ارقانىڭ توسىندە،
تۇلعاسى تاۋ، تۇعىرى تاس قازاقپىز.
جىر دەيتۇعىن عاشىعىمەن ورتەنگەن،
شەجىرەمدى شەمەن بولعان شەرتەم مەن.
ابىلاي مەن اباي تۋعان قازاقتان،
ۇلكەن ءۇمىت كۇتىپ ءجۇرمىن ەرتەڭنەن.
قازاق ەمەس ءور نامىسى ەرتە ولگەن، - دەپ كوسىلسە، ال بىردە:
قاشاندا ۇلتقا دەگەن تىلەك تۇنىق،
جەتتىك ايتەۋ وتانعا بىلەك ءتۇرىپ.
ءوز ەلىڭدە ۇلتاراق بولعان ابزال،
تۋعان جەرگە تۋ تىگۋ – جۇرەكتىلىك! – دەپ انا وتان، تۋعان جەر الدىنداعى پارىزىن بەينەلەيدى.
ايتا كەتەلىك، اسەرباي بايتوللا ۇلى 1959 جىلى قاراشانىڭ 21 جۇلدىزى قحر، قۇمىل ايماعى، اراتۇرىك اۋدانىنىڭ نارىنكىر دەگەن جەرىندە دۇنيەگە كەلگەن. اڭساپ جەتكەن اتاجۇرتىندا قالامىن ەركىن سىلتەگەن اقىن، 2018-2022 جىلدارى الماتى وبلىسىنىڭ مەملەكەتتىك ارحيۆىندە جۇمىس ىستەگەن. وتكەن عاسىر باسىنداعى قۇندى قۇجاتتار مەن تاريحي مۇرالاردى بۇگىنگى جازۋعا ءتۇسىرىپ، عىلىمي اينالىمعا ەنگىزۋگە ءبىر كىسىلىك ۇلەس قوسۋدا.
ءا. بايتوللا ۇلى ءقازىر الماتى وبلىسى، قاراساي اۋدانى، جامبىل اۋىلىندا تۇرادى.
«كوكجيەكتە كۇن ساۋلە» – اۆتوردىڭ وقىرماندارعا ۇسىنعان تۇڭعىش جىر جيناعى.
ميراس التاي
