تۇلپار ءمىنىپ، تۋ الىپ، تۋعان ولكە، تۋعان حالقى ءۇشىن، تابانى كۇرەكتەي الپىس جىل نايزا ۇستاپ، ەلىنە ەسە تەڭدىك اپەرگەن باتىر ءارى شەشەن، اتاقتى قولباسى ەرجانىبەك بابامىزدىڭ مىناداي 3 ۇلكەن ەرلىگىن، باتىر ءوز اۋزىمەن بىلاي بايانداپتى:
– سان جەردە قانى سۋداي اققان قاندى قىرعىن ۇرىستىڭ الدىندا ءجۇردىم. «ۇرىستا الدىندا جۇرگەن ولمەيدى، اجالى جەتكەن ولەدى» دەگەن شىن ەكەن، سونىڭ بارىنەن جاراتۋشى ءوزى ساقتاپ، ارۋاق قولداپ امان ءوتىپ كەلەمىن، ۇرىسا بىلسە ەرجىگىتكە جاۋ قيىن ەمەس، سان جەردە اپتىعى اسىپ، كوزىنە قان تۇنعان جاۋ ساردارىنىڭ تالايىنىڭ باسىن الدىم، مۇنىمدى ەرلىگىم دەي المايمىن. ومىردە 3 ەرلىگىم بولدى دەپ توپشىلاپ ءجۇرمىن.
ءبىرىنشى ەرلىگىم: جيىرماعا جاڭا ىلىنگەن قىرشىن شاعىم، جىلقى باعىپ ءجۇرىپ، تاڭعا تاياعاندا كوز ءىلىندىرىپ الايىنشى دەپ، اتىمنىڭ ەرىن الماي، كوك شلعىندى توسكەيگە اتىمنىڭ شىلبىرىن جامباسىما باسىپ، تۇنگى سالقىن اۋاعا كوكىرەگىمدى توسەپ، جەيدەنىڭ ومىراۋىنىڭ تۇيمەسىن اعىتىپ، شالقالاپ جاتا كەتتىم. ءبىر كەزدە ويانسام مۇزداي سۋىق نارسە كەۋدەمدى باسىپ ورلەپ كەلەدى ەكەن، جىلان ەكەنىن كورمەي – اق ءبىلدىم، قوزعالسام شاعىپ الاتىن ءتۇرى بار. جىلان جىلجىپ باسى ءدال يەگىمنىڭ استىنا كەلگەندە سەسكەنبەي اۋزىمدى اشا قويدىم، ۇڭگىر دەپ ويلاسا كەرەك اۋزىما كەلىپ كىرە بەردى. ءدال سول شاقتا باسىن تىسىممەن قىرشىپ تۇكىرىپ تاستادىم، ءتىسىم مۇزداي بولىپ كەتتى. سوڭىنان وسى ۋاقيعانى ناعاشى اتاما ايتقاندا، ول كىسى:
– جىگىتتىڭ ەرلىگى بايسالدىعى، ءوزىن ۇستاي بىلگەندىگى عوي، - دەپ مەنى ماقتاپ وتىرىپ، - وكىنەرلىگى، سول جىلاننىڭ باسىن سول بەتى جۇتىپ جىبەرسەڭ جاقسى ەدى، - دەدى.
– ول قالاي دەگەنىڭىز دەپ سۇراعاندا؛
– ول سىنعا جولىققان جىلان ەكەن، باسىن جۇتىپ قويساڭ بويىڭداعى ەرلىك پەن اقىل پاراسات ۇرپاعىڭنىڭ ۇرپاعىنا شەيىن جالعاسا بەرەر ەدى، - دەدى.
ەكىنشى ەرلىگىم: ءبىزدىڭ ەل اناۋ ارقالىق، ەدىرەي تاۋى، ەسىل وزەنى جاعاسى جاقتا جۇرگەندە، ءبىر جىلى كۇزدە ەشكى قوتىر دەگەن ءبىر دەرت جابىستى، مۇنىڭ قىشۋى دۇنيەدە جوق بولادى ەكەن، قاسىنسا ودان ارى اسقىنىپ كەتەدى دەگەندى ەستىدىم، سودان ءتىسىمدى تىستەپ، ءۇش اي بويى قولىمدى تيگىزبەدىم، كوكتەم بولا بويىم تۇلەپ، سىپىرىلىپ ءبىىراق تۇستىدە ساۋىعىپ كەتتىم، وسىعان قولىمنىڭ ۇشىن تيگىزبەگەنىمدى ەرلىگىم عوي دەپ ويلادىم.
ءۇشىنشى ەرلىگىم: ءبىر جىلدارى قابانباي، بوگەنباي ۇشەۋمىز التايدىڭ كۇن بەتىندە بەكىنىپ الىپ، قازاقتارعا تىنىم بەرمەگەن ءبىر جوڭعار قاراقشىسىن جويعالى جولعا اتتاندىق. سول جولى جەتى قاراڭعى تۇندە ايداھارعا اينالىپ كەتكەن جۋاندىعى ادام بەلىنەن جۋان ۇزىندىعى 13 كەز كەلەتىن نار جىلاننىڭ باسىن شاپتىم، سوندا جۇرەگىم قورىققاندى قويىپ، بۇلىك ەتىپتە قويعان جوق، وسىنى ءۇشىنشى ەرلىگىم دەپ بىلەمىن، - دەپ بايان ەتىپتى.
ەلىنە قورعان بولعان باتىرلاردىڭ وسىنداي ەرلىگى ارقاسىندا، جاۋدان امان قالىپ، ۇرپاقتان-ۇرپاق جالعاپ، تىنىش زاماندا وتىرمىز، سول باتىر بابالارىمىزدىڭ ەرلىگى ۇرپاقتاردىڭ جۇرەگىندە ماڭگى ساقتالادى دەپ بىلەم!
6alash ۇسىندى
