بۇگىن الماتىدان بىرنەشە جاڭا كىتاپ جارىق كورگەنىنەن حابار الدىق. سولاردىڭ ءبىرى «ەل تاريحى – قازىنا». اۆتورى قازاق وقىرماندارىنا بەيتانىس ماعازبەك ميان ۇلى اتتى اقساقال شەكارالار جابىلاردىڭ الدىندا عانا اتاجۇرتقا ورالعان ەكەن. ماعازبەك اقساقالدى اۋەسقوي تاريحشى دەۋگە بولادى. قحر شىنجاڭنىڭ ىلە ايماعىندا ءومىر سۇرگەن اقساقال بۇگىنگى تاڭدا الماتىدا تۇرادى ەكەن. اۆتور ۇلى ابايدىڭ شىعارمالارىنا بالا كەزىنەن بەرى ورناپ قالعان سۇيىسپەنشىلىگى، ءداستۇرلى مال شارۋاشىلىعىندا ءجۇرىپ قۇيماقۇلاق قارتتاردان ەستىگەن-بىلگەنى نەگىزىندە ماقالالار جازىپ جەرگىلىكتى باسپاسوزدە ءجيى جاريالاپ تۇرادى ەكەن. 1980 جىلدارى قىتايدا ساياسات وڭالىپ، رۋحاني مۇرالارعا كوڭىل بولىنە باستاعان تۇستا، كوپتەپ كىتاپ وقۋعا قولى جەتىپ، قالام تارتۋى دا جيىلەي تۇسكەن ماعاز اقساقال سول كەزەڭدەردە قازاق تاريحىنىڭ ءبىر بوستىعىن تولتىرۋدى ارمانداپ قولىنا قالامىن سەرت ۇستايدى.
بەينەتتى عۇمىردىڭ زەينەتىن تاۋەلسىز ەلىندەگى ۇل-قىزىنىڭ قولىندا كورىپ وتىرعان قالام يەسى بۇرىن-سوڭدى جازعان ماقالالارىن جيناپ-تەرىپ، رەتتەپ باسپاعا ۇسىنىپتى. كىتاپتا اۆتور قادىرعالي جالايىر ەڭبەكتەرى مەن قىتايداعى قانداستاردان شىققان نيعىمەت مىڭجان، سۇلتان جانبولات ۇلى، جاقىپ مىرزاقان ۇلى، جاقىپ ءجۇنىس ۇلى قاتارلى تاريحشىلاردىڭ ەڭبەكتەرىنەن دالەلدەر كەلتىرە وتىرىپ، ارعى بەتكە اۋعان قانداستار تاريحىن، اسىرەسە ىلە ءوڭىرىنىڭ وتكەن-كەتكەنىن تۇگەندەۋگە تىرىسقان. ون سەگىزىنشى عاسىردىڭ ارعى-بەرگى كەزەڭىنە شولۋ جاساي كەلىپ، ەسەنكەلدى بي، قىزاي انا، سىبانباي بي، سىبانقۇلدىڭ شابۋىلى، داركەمبايدىڭ ەل شەكاراسىنان ءۇش رەت كوشىپ ءوتۋى، كوكقامىردىڭ ەلى مەن جەر تاريحى، ت.ب. تاقىرىپتار اۆتوردىڭ ەڭبەگىندە بەينەلەنگەن.
كاسىپتىك تاريحشى نەمەسە جازۋشى بولماسا دا، جەرگىلىكتى ايماقتىڭ جەر-سۋ اتاۋلارىنان تارتىپ، شىعىسقا اۋعان جۇرتتىڭ ءۇش عاسىرلىق تاريحىن تىزبەكتەۋدە ءوزىنىڭ نەمەرە اعاسى، شەجىرەشى قارت ماقسۇت شارافي ۇلىنىڭ ەڭبەكتەرىنە، شەجىرەلەرىنە سۇيەنە وتىرىپ، ءبىراز دەرەكتەردىڭ بەتىن اشادى.
اتالعان كىتاپتىڭ توتە جازۋداعى نۇسقاسى دا بىرگە باسىلىپ شىققان.
الداعى ۋاقىتتا «ەل تاريحى – قازىنا» اتتى كىتاپتىڭ تانىستىرىلمى ءوتىپ، وقىرمان قاۋىمعا ۇسىنىلادى. ەل قازىناسىنا قوسىلۋ الدىندا تۇرعان كىتاپ اۆتورىنا قۇتتى بولسىن ايتامىز.
ەرزات ەركىن
6alash ۇسىنادى
