اسەت نايمانباي ۇلى (1867-1923) قازاقستان رەسرۋبليكاسىنىڭ قاراعاندى وبلىسىندا دۇنيەگە كەلگەن. ول قازاق ۇلتىنىڭ ءبىر تۋار ايگىلى ءانشى، اقىن جانە كومپوزيتورى.
اسەت نايمانباي ۇلىنىڭ قۇلىپتاسى
1916 جىلى جۇڭگو شەكاراسىنا ءوتىپ، ەلىمىزدىڭ ىلە، التاي، تارباعاتاي، بۇراتالا سياقتى قازاق ۇلتى شوعىرلى قونىستانعان وڭىرلەردە ءوز ونەرىن ەل ىشىنە تاراتىپ، ءيىسى قازاققا تانىلعان ونەر اتاسى. 1923 جىلى قۇلجا اۋدانىنىڭ كوكقامىر ساحاراسىنىڭ جالعىزقاراعاي دەگەن جەرىندە:
ارعىنىمىن، اتىم - اسەت ارىنداعان،
ارىنداپ ءان سالارما دارىماعان؟
داۋىسىمنىڭ كۇي-قوبىزىن انمەن اشىپ،
كومەيدەن مەرۋەرت مارجان ساۋىلداعان.
ۇيىندە عاپاربايدىڭ جاتىپ الدىم،
الماستى كەپىرەش دەپ تاتىپ الدىم،
اللانىڭ ماعان بەرگەن اجالى جوق،
قۇلجادان بەس تەڭگەگە ساتىپ الدىم...»، - دەگەن ەڭ سوڭعى ولەڭ ورنەكتەرىن كوكىرەگىنەن جالىنداتىپ جاتىپ اقىن كوز جۇمادى.
ول كەزدە ساحارادا ەمشى قايدان بولسىن، باقسى-بالىگەرلەر ونىڭ شىبىن جانىنادا اراشاشى بولا المايدى. وسىلايشا ارماندا كەتكەن جاس بوزداق جالعىزقاراعايعا جەرلەنىپ، بەيىت باسىنا تاس ءۇيىپ بەلگى قويادى. سول بەلگىنى نەگىز ەتىپ، 2003 جىلى ىلە قازاق اۆتونوميالى وبلىستىق ادەبيەت-كوركومونەرشىلەر بىرلەستىگى مارحۇمنىڭ باسىنا قۇلىپتاس ورناتىپ، ەسكە الۋ سالتىن وتكىزدى. 2005 جىلى جوعارى دارەجەلى ۇكىمەت ورىندارىنداعى ەل اعالارىنىڭ ورنالاستىرۋى بويىنشا قايتالاي قۇلىپتاس تۇرعىزىلىپ، اينالاسىن تەمىر تورمەن قورشاپ بەكەمدەپ ءارى شاعىن ەسكە الۋ توي مەرەكەسىن وتكىزىپ، اسەت نايمانباي ۇلىنىڭ رۋحىن بيىككە كوتەردى.
كوركىنە كوز تويمايتىن كوكقامىر ساحاراسى جانعا جايلى جاسىل دالانىڭ شۋاعىنا بولەپ اسەتتى ماڭگى باۋىرىنا باسىپ جاتىر... جىل سايىن كوكقامىرداعى اقساقالدى اتالارمەن جاستار قابىر باسىنا ارناۋلى بارىپ دۇعالارىن وقىپ، اقىنعا قۇرمەت ءبىلدىرىپ تۇرادى.
باعداۋلەت باتىربەك ۇلى
6alash ۇسىندى
