9-ماۋسىم كۇنى الماتىداعى قازاقستان جازۋشىلار كىتاپحاناسىندا مۇرات كالاپ ۇلىنىڭ «جاپىراق كوڭىل» اتتى ولەڭدەر جيناعىنىڭ تۇساۋكەسەرى ءوتتى. تۇساۋكەسەرگە قالامگەرلەر: ءجادي شاكەن ۇلى، بولات قۇرمانعاجى ۇلى، ءابدىل تاۋەكەل ۇلى باستاعان زيالى قاۋىم وكىلدەرى، بەلگىلى كۇيشى، التاي، ىلە، تارباعاتاي كۇيشىلىك مەكتەبىنىڭ بەلدى وكىلى ارشىن كاسىمباي ۇلى، ءانشى، قولونەر شەبەرى قۋانىشبەك راحمان ۇلى باستاعان ونەرپازدار، ءتىل زەرتتەۋشى جاس مامان تالعات رامازانوۆ، «ءالىمساق» جۋرنالىنىڭ باس رەداكتورى، فيلولوگيا عىلىمدارىنىڭ كانديداتى نۇرلان كوبەگەن ۇلى جانە اقىننىڭ دوس-جاراندارى، تۋىس-تۋعاندارى قاتىستى. شىعارماشىلىق باسقوسۋدىڭ تىزگىنىن اقىن، احمەت بايتۇرسىن ۇلى مۋزەي-ۇيىنىڭ مەڭگەرۋشىسى ادىلەت احمەت ۇلى ۇستادى.
تۇساۋكەسەر اياسىندا اۆتوردىڭ ولەڭدەرى وقىلىپ، اندەرى شىرقالدى. اقساقالدار باتا بەرىپ، انالار اق شاشۋ شاشتى. ءسوز كەزەگىن العان اعابۋىن اقىن-جازۋشىلار قىسقا عانا عۇمىر كەشىپ، باقيىلىق بولعان اقىننىڭ مۇرا بولىپ قالعان ەڭبەگىن جوعارى باعالاپ، ۇرپاقتارىنا ىزگى تىلەك ءبىلدىردى. «جاپىراق كوڭىل» كىتابى الماتى قالاسى ورتالىقتاندىرىلعان كىتاپحانالار جۇيەسىنە قاراستى 28 كىتاپحانامەن قوسا، قازاقستان عىلىم اكادەمياسىنىڭ كىتاپحاناسىنا تابىس ەتىلدى. شىعارماشىلىق جيىننىڭ سوڭىندا جينالعان قاۋىم مارقۇمعا قۇران باعىشتاپ، اس بەردى.
مۇرات كالاپ ۇلى 1986 جىلى قحر، التاي قالاسىندا تۋعان. بالالىق شاعى التاي ايماعى، بۋرىلتوعاي اۋدانى، قاراماعاي اۋىلىندا ءوتتى. 2006 جىلى اتامەكەنگە ورالىپ، 2006-2011 جىلدار ارالىعىندا قوجا احمەت ياساۋي ۋنيۆەرسيتەتى جانە قازاق ۇلتتىق اگرارلىق ۋنيۆەرسيتەتىندە ءبىلىم العان. ۋنيۆەرسيتەتتىك، قالالىق، رەسپۋبليكالىق دەڭگەيدەگى ءتۇرلى مادەني، ادەبي قيمىلدارعا بەلسەنە قاتىسقان. ۋنيۆەرسيتەتتە وتكەن «جىگىت سۇلتانى» بايقاۋىنا ەكى مارتە قاتىسىپ، 1 جانە 2 ورىن يەگەرى بولعان.
ادەبيەتكە بالا كۇنىنەن اۋەس بولىپ وسكەن مۇرات كالاپ ۇلىنىڭ العاشقى تۋىندىلارى 2007 جىلى ستۋدەنت جاستاردىڭ «پوەزيا بۇرشىگى» اتتى جيناعىندا جارىق كورگەن. 2021 جىلى «تالانتقا تاعىزىم» ادەبيەت اۋەسكەرلەرى توبىنداعى اقىن-جازۋشىلاردىڭ شىعارمالارىنان قۇرالعان «كوسەگە» اتتى جىر جيناعىندا ءبىرقاتار ولەڭدەرى ەنگزىلسە، 2022 جىلى ساۋىردە «عاسىر جىرى» اتتى انتولوگياعا اقىننىڭ تۋىندىلارى باسىلدى. قويدان قوڭىر، جىلقىدان تورى كىسىلىكتى مىنەزىمەن ءوز ورتاسىنا سيىمدى، جاقىن-جەكجاتپەن سيلاسىمدى مۇرات كالاپ ۇلىنىڭ كوپتەگەن شىعارمالارى الەۋمەتتىك جەلىلەر ارقىلى وقىرماندارىنىڭ ىستىق ىقىلاسىنا بولەنگەن. بىرنەشە ولەڭىنە كومپوزيتورلار ءان شىعاردى. تالدىقورعان قالاسىندا ءوز ماماندىعى بويىنشا ءسۇت ونىمدەرى زاۋىتىندا تابان اۋدارماي قىزمەت ەتتى.
الاشتىڭ ايماڭداي ازاماتى 2022 جىلى مامىردىڭ 17 جاڭاسىندا شۇعىل ناۋقاستان جارىق دۇنيەگە قوش ايتتى. مىنەزدى ازاماتتىڭ مەزگىلسىز قازاسى كىم-كىمنىڭ دە قابىرعاسىن قايىستىردى. اقىننىڭ ارتىندا اياۋلى جارى، جاس بالالارى جانە ءومىر ەستەلىكتەرىندەي بولعان ولەڭ-جىرلارى قالدى. ۇپاقتارى مەن وقىرماندارىنا مۇرا بولىپ قالعان مۇرات كالاپ ۇلىنىڭ ولەڭدەرى تۇڭعىش رەت توپتاستىرىلىپ كىتاپ بولىپ شىعىپ وتىر.
