اعايىندى ەكى جىگىتتىڭ وتباسى ءوزارا ءتاتۋ-تاتتى ءومىر ءسۇرىپتى. بىردە «وسى ءتاتۋ-تاتتى تۇرمىستىڭ ۇيىتقىسى ءبىز – ەر ازاماتتارمىز»، - دەپ ماقتانىپتى اعايىندىلاردىڭ كىشىسى ايەلىنە.
– ال ءبىزدى – ابىسىنداردىڭ ەڭبەگىن نەگە ەسكەرمەيسىڭ؟ - دەيدى جۇبايى.
– ءبىز باس بولساق، سەندەر مويىن ەمەسسىڭدەر مە. ەندەشە باس قالاي قاراسا، مويىن دا سولاي بۇرىلماي ما؟..
ايەلى بۇعان سالعىلاسپاي، ءوز شارۋاسىمەن جۇرە بەرەدى.
ءبىر كۇنى ولار جىگىتتىڭ اعاسىن وتباسىمەن قوناققا شاقىرادى. قوي سويىپ، ەت اسىپ، مۇشە-مۇشەسىمەن داستارقانعا قويادى.
اعايىندىلاردىڭ ۇلكەنى قويدىڭ الدىڭعى سيراقتارىن ءوز بالالارىنا بەرىپ، ارتقى سيراقتارىن ءىنىسىنىڭ بالالارىنا ۇسىنىپتى. سوندا كىشىسىنىڭ ايەلى كۇيەۋنىڭ قۇلاعىنا: «سيراقتاردى قالاي بەرگەنىن كوردىڭ بە؟ الدىڭعى اياقتارىن ءوز بالالارىنا، ارتقى سيراقتارىن سەنىڭ بالالارىڭا بەردى. ياعني، ول ءوز بالالارى الدا، وزىق بولسىن، ال سەنىڭ بالالارىڭ ارتتا، سوڭىندا ءجۇرسىن دەگەنى عوي»، - دەپ سىبىرلايدى.
اعاسى ءىنىسىنىڭ بالالارىنا جۇلىن بەرگەن ەدى، «كوردىڭ بە، سەنىڭ بالالارىڭ جۇلىنداي ءۇزىلسىن دەگەن ويىن»، - دەپ قويادى. اعاسى ءىنىسىنىڭ بالالارىنا مي ۇستاتقان ەدى، «انە، ول بالالارىڭنىڭ اقىل-ويى ميداي بىلجىراق، سۋ مي بولسىن دەپ بەرىپ جاتقانىن ءتۇسىندىڭ بە؟» - دەيدى. ايەلىنىڭ وسى سوزدەرىنەن كەيىن كىشىسى اعاسىمەن ۇرسىسىپ، سوزگە كەلىپ قالادى. سوندا كىشىسىنىڭ ايەلى ولاردى قايتا تاتۋلاستىرىپ، كۇيەۋىنىڭ وتكەندەگى اڭگىمەسىن ەسىنە سالادى دا، «ەكى ءۇيدىڭ بەرەكە-ىنتىماعى ءبىز – ابىسىندارعا دا بايلانىستى، «ابىسىن تاتۋ بولسا، اس كوپ، اعايىن تاتۋ بولسا، ات كوپ» دەگەن، - دەپ ىنتىماق-بىرلىككە شاقىرادى.
ياعني، بۇل ماقال اعايىن مەن اعايىن، ابىسىن مەن ابىسىن تاتۋ، ىنتىماقتى بولسا، ۇيلەرىنە بەرەكە بايلىق، مولشىلىق تا كەلەدى دەگەن ويدى بەرەدى.
6alash ۇسىندى
