Qytaıda ótken 2019 jylǵy kúres túrinen aǵa júldegerlikke talasý jarysynda qazaq balýany taǵy da top jardy. Atap aıtqanda, Gansý ólkesiniń balýany Erlanbek Káteıuly erkin kúresten basúlde aldy.
Qytaıdaǵy balýandardyń kil myqtysyn saralaıtyn bul retki respýblıkalyq jarysqa 137 qurama, 1120 sportshy qatysqan. 9 kún boıy 10 túrli salmaq boıynsha baq synaǵan baıraqty básekede qandasymyz Erlanbek 65 keli salmaqtaǵylar arasynda aǵajúldeger boldy.
2009 jyly Qytaı memlekettik sport jarysyna tuńǵysh ret qatynasqan Erlanbek qarsylastaryn dopsha aqtyryp, júldeli qaıtqan bolatyn. Sodan keıin mezgilderde Qytaıda ótken jarystardyń bárinen júldesiz qalyp kórmegen Erlanbek Azıa jáne álem chempıonattaryna da qatysyp, 2016 jyly Rıo-de-Janeıro olımpıada joldamasyn jeńip aldy. Alaıda bul jarysta qarsylasyna ese jiberdi.
Erlanbek Káteıuly jáne jattyqtyrýshy ustazy Syrńgúlin
Erlanbek Káteıuly Qytaıdyń Altaı aımaǵy Qyzyltas aýylynda týǵan. Ol 2009 jyly Qytaı birinshiliginde 65 keli salmaq dárejesi boıynsha chempıon atanyp, Qytaıdyń Gansý ólkelik ulttyq quramasyna alynǵan. Ol qoıshy shańyraǵynda dúnıege kelgenin, bala kezden qoı baǵyp óskenin aıtady.
– Alty aǵaıyndymyz, men kenjesimin. Kúresti keshirek bastadym. Basynda ata-anam qarsy boldy. Biraq qoı baǵýdan sharshap, kúreske bet bura bastadym. İshki Qytaıdaǵy kúres ortalyqtaryna bardym. Sol jerde kúreske túpkilikti bet burdym, - deıdi balýan.
