ادامنىڭ كەۋدەسىن كەرىپ جۇرگەنىمەن كەۋدەسىن ءيىپ جۇرگەنى تەك دەنە ارەكەت فورماسى عانا ەمەس. ول ءبىر ءتۇرلى ومىرگە دەگەن پوزيسيا. كەۋدەڭدى اسىرا كوتەرە بەرسەڭ، ەشكىم ماڭىڭا جولاماۋى مۇمكىن، كەۋدەڭدى اسىرا يە بەرسەڭ، باسقالار كوزگە ىلمەۋى دە ىقتيمال. ەگەر كەمەلدى ادام بولعىڭ كەلسە، كەۋدەڭدى قاي كەزدە قالاي ۇستاۋدى ءبىلىپ ال. باسىڭا قيىندىق تۋسا كەۋدەڭدى كوتەر، باتىرلىق پەن قايسارلىق دەگەن سول. ال ويلاعانىڭ ىسكە اسىپ، تابىسقا تابانداپ بولسا دا جاقىنداعان سايىن كەۋدەڭدى يە ءتۇس. تەكتىلىك دەگەن سول.
***
بۇل ومىردە مۇلدە ءتۇزۋ جول جوق، مۇلدە دۇرىس تالعام دا جوق. ءبىز تەك قۇلشىنۋ ارقىلى تالعامىمىزدىڭ دۇرىستىعىن دالەلدەپ شىعامىز. ەگەر ءبىر قىز (نەمەسە جىگىت) سىزگە قاراماي قويدى. سوعان بولا اقىلسىز شەشىم قابىلداپ، ءوزىڭىزدى جارالاساڭىز، سونىڭ تالعامىن دۇرىسقا شىعارعان بولاسىز. ال، كەرىسىنشە ونى وكىندىرۋ ءۇشىن قۇلشىنساڭىز، شەشىمىڭىزدىڭ وتە دۇرىس بولعانىن كۇندەر وتە كەلە سەزىنەسىز. ءومىر دەگەنىمىز بەينە ABCD-نى تاڭداۋ. تەك ەمتيحانداعىداي تاڭداۋمەن عانا جۇمىس بىتە سالمايدى. ومىردە تالعام جاسالعان سوڭ باعىتتامالى قۇلشىنىس باستالادى.
***
دۇنيەدە ەڭ قىمباتتى ەكى اۋىز ءسوز بار. ءبىرى مۇقياتتىلىق، ەكىنشىسى تاباندىلىق. بىرىنشىسىمەن ءوزىڭدى وزگەرتەسىڭ، ەكىنشىسىمەن دۇنيەنى وزگەرتەسىڭ. دۇنيەدەگى ەڭ جۇمساق نارسە ءبىر تامشى سۋ عوي، ءبىراق تاباندىلىقپەن تاما بەرسە، سول تامشىلار تاستىڭ ءوزىن تەسىپ كەتەدى.
***
ادام ومىرىندە ەكى ءتۇرلى ازاپ بولادى. ءبىر ءتۇرى قۇلشىنۋدىڭ ازابى، ەكىنشى ءتۇرى وكىنىشتىڭ ازابى. ءبىراق، ەكىنىشىسى الدىڭعىسىنا قاراعاندا نەشە مىڭ ەسە اۋىر.
قۇلشىنعان جەتەر مۇراتقا! دۇنيەدەگى قيىن ىستەر «مەنىڭ قولىمنان كەلەدى» دەگەن ءسوزدىڭ ارقاسىندا ىستەلگەن. ەگەر وسى ءسوزدى قايتالاي ءجۇرىپ قۇلشىنساڭ، ون جىلدان كەيىن قازىرگى وزىڭە قاتتى العىس ايتار ەدىڭ.
***
سەن ۇنەمى تابىسقا جەتۋدى ويلايسىڭ، الدە ءبىر مۋزىكا اسپابىن ۇيرەنگىڭ كەلەدى، شەتەل ءتىلىن مەڭگەرگىڭ كەلەدى، جەكە كاسىپ جاراتقىڭ كەلەدى، ءبىراق ءالى كۇنگە كەشىكتىرۋمەن كەلەسىڭ.
شىندىعىندا ۋاقىت جوق پا؟!
شىندىعىندا سونشالىق مۇمكىندىگىمىز جار بەرمەي مە؟!
بىزدەن دە قاراپايىم وتباسىدا تۋىلىپ دۇنيەگە ايگىلى بولعاندار بارشىلىق قوي…
سوندا بىزگە نە تۇساۋ بولا بەرەدى؟!
سويتسەك ءبىز تەك ويدىڭ ادامى ەكەنبىز. ويلايمىز ءبىراق ناقتىلى ىسكە كىرىسپەيمىز. ۋاقىت ۇزارا كەلە كىرىسپەگەن ارماننىڭ بارلىعى جەل ۇيىرگەن جاپىراقتاي توپىراققا ءسىڭىپ توزىپ جوعالا بەرەدى.
سوندىقتان ءسىز ءقازىر ءبىر عانا ءىس ىستەۋگە ءتيستىسىز، ول تاۋەكەل ەتىپ ءبىرىنشى قادامدى اتتاۋ.
تابالدىرىقتان اتتاڭىز، تابالدىرىقتان بيىك تاۋ جوق، ودان اسقان سوڭ جول ءوزى جەتەلەيدى.
ىقىلاس ورازباي
6alash ۇسىنادى
