اۋەلە، اۋەلەي بەر، «سۇلۋباي ارمان»!
كەيدە ءبىر ءان ءۇشىن ۇزاق جاساعىڭ كەلەتىن ساتتەر بولاتىنى عاجاپ. ءومىر سول اندەي عانا سەزىلەدى. الگى ءاننىڭ يىرىمىندە جاساپ، قىم-قۋىت دۇنيەنى ۇمىتىپ تا قالاسىڭ. كوڭىل جەتپەگەن كەڭدىككە ءان جەتەدى. ءومىر جەتپەگەن بيىككە ءان جەتەدى.
سەرىك ءابىل ۇلىنىڭ ولەڭىنە جازىلعان، حالىق ريزابەكتىڭ «سۇلۋباي ارمانى» ءبىزدى وسىنداي ءبىر ىستىق سەزىمگە بولەگەنى بار. بۇل ءاندى شابا ادەنقۇل قىزى «ءتاتتىم-اۋ» -دان دا ءتاتتى، ساعنىشتى ورىنداپتى. باتىر بابا عاسىرلار بەزبەنىندە ءان بولىپ شىرقالىپ، كۇي بولىپ كۇمبىرلەي بەرەرى حاق! اۋەلە، اۋەلەي بەر، «سۇلۋباي ارمان»!
سۇلۋباي ساپي ۇلى 1906 جىلى سارسۇمبەنىڭ (قازىرگى التاي قالاسىنىڭ) شىرىكشي اۋىلدىعىندا تۋعان. 1929 جىلى تامىزدا اعا-باۋىرلارىن ەرتىپ شىڭگىلگە كەپ قونىستانادى. 1937 جىلى ىرىسحان اۋىلىندا پوچتاشىلىق ىستەپ، 1940 جىلعى اقپانداعى كوتەرىلىسكە دەيىن اتقارادى. وسى جىلداردان باستاپ قىتايعا قارسى اتويلاپ العا شىعىپ ەرەن ەڭبەك كورسەتەدى. 1944 جىلى ءساۋىر ايىندا بۇلعىن وزەنى بويىنداعى شايقاستا جاۋ وعىنان قازا تابادى. مۇردەسى بۇلعىن وزەنىنىڭ باس جاعىنداعى قۇمقارىن دەگەن جەرگە جەرلەنەدى.
سۇلۋباي ەل قورعاعان باتىر، قارىمدى بالۋان، سۋىرىپ سالما اقىن. ول ەلى ءۇشىن قان كەشىپ، جەرىن قورعاۋمەن بىرگە تۋعان حالىقىنا، جاۋىنگەر سەرىكتەرىنە رۋحاني كۇش باعىشتاعان ايگىلى ءانشى. ونىڭ قازىرگە دەيىن بىزگە جەتكەن تۋىندىلارى: «سۇلۋباي باتىردىڭ ءانى»، «سۇلۋباي مەن گۇلسىمنىڭ ايتىسى» قاتارلىلار.
قۋانىش ءىلياس ۇلى
6alash ۇسىنادى
