"تۋعان جەر"
ءسوزى: نەسىپبەك ايىت ۇلى
مۋزىكاسى: تۇرسىنعازى
ورىنداعان: گۇلزيرا بوكەيحان قىزى
ساحنانىڭ سايراعان ساندۋعاشى
(گۇلزيرا بوكەيحانقىزىمەن سۇحبات)
– گۇلزيرا بوكەيحان قىزى، ءسىزدى 8 ناۋرىز حالىقارالىق ايەلدەر كۇنىمەن قۇتتىقتايمىن. اڭگىمەمىزدى ءوزىڭىزدى دۇنيەگە اكەلگەن ارداقتى اناڭىزدىڭ اسىل قاسيەتىنەن باستاساق...
– مەنىڭ انام ارعى بەتتەگى – التاي جەرىندە تۋىلعان گۇلسارا مولداحان قىزى دەگەن كىسى. ول كىسى ءوز اناسى ەرتە قايتىس بولعان سوڭ جاستايىنان اجەسىنىڭ قولىندا وسكەن ەكەن. شەشەم انا مەن بالا دەنساۋلىعىنا بايلانىستى 25 جىل ەڭبەك ەتكەن دارىگەر. مىنەزى جايدارى بولعانىمەن قاتالدىعى باسىم ەدى. ۇيدە اكەم دومبىرا شەرتىپ، شەشەم سىزىلتىپ ءان ايتاتىن. قوناق كەلسە ءسىڭلىم ەكەۋىمىز ءبىزدى قاشان ءان ايتىڭدار دەپ شاقىرادى ەكەن دەپ ەسىكتەن سىعالاپ تۇراتىنبىز. انام ءبىزدى كىشكەنتاي كەزىمىزدەن «ۇيرەنگەندەرىڭ وزدەرىڭە جاقسى، ىستەگەندەرىڭ ماعان جاقسى» دەپ ءۇي شارۋاسىنا سالىپ، قازاقى تاربيە بەرۋگە كوڭىل ءبولدى. ءبىز وتباسىندا ەكى ۇل، ەكى قىز بولدىق. مەن قىزدىڭ ۇلكەنى بولعان سوڭ انام كۇن دەمەي، ءتۇن دەمەي جۇمىستارىمەن كەتكەن كەزدە ءۇيدىڭ اۋىرتپالىعىن كوتەرىپ، كىشكەنتاي كەزىمنەن شارۋاعا يكەمدى بولىپ ءوستىم. انامنىڭ قاتالدىعى مەنىڭ ءومىر جولىن دۇرىس تاڭداپ، بۇگىنگىدەي كۇنگە جەتۋىمە جول اشتى دەپ ويلايمىن. ءقازىر ءوزىم دە بالا تاربيەلەپ وتىرمىن. اللا بەرگەن جالعىز قىزىم بار. قاتتى قاتال بولماسام دا، قازاقى تاربيە بەرۋگە بارىمدى سالىپ ءجۇرمىن.
– ونەرگە قاشاننان باستاپ بەت بۇردىڭىز؟
– 13 جاسقا كەلگەنىمدە ىلە وبلىستىق ونەر كوللەدجىنە وقۋعا ءتۇسىپ، اتا-انامنىڭ اق باتاسىن الىپ الىسقا ۇشتىم. ونەر جولىم وسىلايشا باستالدى. العاشىندا بيشىلىك ونەرىن يگەرىپ، ىلە وبلىستىق قازاق تەاترىندا ءبىر نەشە جىل ءبيشى بولىپ جۇمىس جاسادىم. انگە اۋەس، داۋىسىم دا تەاتردا ءجۇرىپ قالىپتاسا باستاعان ءوزىمنىڭ بولاشاعىمدى بيشىلىكپەن ەلەستەتكىم كەلگەن جوق. ءسويتىپ، پەكين كونسەرۆاتورياسىنا ەمتيحان تاپسىرىپ، سول جاققا وقۋعا كەتتىم.
– بالا تاربيەسىنە قالاي كوڭىل بولەسىز؟
– مەنىڭ وسىنشاما بيىككە جەتۋىمە قىزىمنىڭ دا ۇلەسى بار. ولاي دەيتىنىم، ول 3 جاستاعى كەزىندە سۇيرەلەپ ءجۇرىپ كونسەرۆاتوريادا وقىدىم. نەشە ساعاتتار بويىنا ءان ايتقان كەزىمىزدە قىزىم ۇيىقتاپ قالاتىن. ءدارىسحاناداعى ءتورت ورىندىقتى بىرىكتىرىپ جاتقىزىپ قويىپ، جالعاستى ءان ايتا بەرەتىنمىن. قازاقستاننىڭ حالىق ءارتىسى ۇستازىم روزا جامانوۆا «مىنا بالاعا وبال بولدى، تاماقتاندىرىپ كەل» دەپ ارەدىكتە ساباقتان بوساتاتىن. «بولماسا اۋىلعا اپارىپ تاستايىن» دەيمىن مەن دە قىسىلىپ. «اۋىلعا اپارساڭ ويىڭ ءبولىنىپ ساباقتى دۇرىس وقي المايسىڭ. نە كورسە دە بالا شەشەسىنىڭ قاسىندا جۇرسە كونەدى» دەيتۇعىن روزا اپايىم. ءسويتىپ، قىزىم مەنىڭ قاسىمدا ءجۇرىپ قىزىعىم مەن شىجىعىمنىڭ بارلىعىن كوردى. اقىلدى. ءقازىر 9-سىنىپتا وقىپ ءجۇر. ءوزىم قازاقى تاربيە كورىپ وسكەننەن بولار، قىزىمدى دا قازاقى وسسە ەكەن دەپ تىلەيمىن. كوبىنەسە اقىلمەن ايتىپ، جۇمساقتاپ جەتكىزۋگە تىرىسامىن. «بالام، قازاقتىڭ قىزدارى 18-20 جاسقا دەيىن وزگەلەرگە ساۋساعىنىڭ ۇشىن دا ۇستاتپاعان. اشىق-شاشىق كيىنبە. شاشىڭدى قيما» دەپ قۇلاعىنا قۇيىپ وتىرامىن. وسى كەزدە ءوزى دە كۇلىپ ايتادى، – مەن 9-سىنىپ وقىسام دا سىنىپتاستارىم مەنى ءالى كىشكەنەسىڭ،-دەپ مازاقتايدى. – سەندەرگە تىرناعىمنىڭ دا ۇشىن ۇستاتپايمىن دەسەم كەي دوستارىم كۇلەدى. كوبىنەسە ۇلدار «دۇرىس» دەپ قۇپتاپ جاتادى،-دەپ قىزىقتارىن ايتىپ كەلەدى ماعان. «ولار قانشا كۇلگەنمەن ىشتەي ساعان قىزىعاتىن بولادى. سەن سول ارقىلى قاسىڭداعى قۇربىلارىڭا دا ۇلگى بولاسىڭ» دەپ ايتامىن. ال اقپاراتتىق قوعامنىڭ اعىلعان اقپاراتتارىنان شەكتەپ ءجۇرمىن دەپ ايتا المايمىن. ينتەرنەتكە كىرەدى. ءبىراق دۇرىس قولدانۋ جايلى قۇلاعىنا قۇيىپ تۇرامىن.
– قىزىڭىز ونەردى تاڭداسا قۇپتار ما ەدىڭىز؟
– ءبىر كەزدە مەن تەاتردا قىز جىبەك وپەراسىن ايتتىم. قويىلىمدا تولەگەن قايتىس بولدى دەگەندى ەستىگەندە جىبەك جەرگە باسىن قايتا-قايتا تيگىزىپ، زارلاپ، ەر-توقىمدى قۇشاقتاپ جىلايدى عوي، قىزىم ايديدار ۇيدە مەنىمەن بىرگە نە ىستەسەم ول دا سونى ىستەيدى. دايىندىق كەزىندە كەيدە باسىمدى ەرتە كوتەرىپ قوياتىن بولۋىم كەرەك. «ماما، باسىڭدى ەرتە كوتەرىپ قويدىڭ» دەپ بىرگە جىعىلىپ، بىرگە تۇراتىن. 7-سىنىپقا دەيىن كۇيساندىق ۇيرەندى. كەيىننەن تەك قانا ساباعىمەن بولىپ كەتتى. ءقازىر قايتا ءان ايتىپ، ونەرگە اۋەستىگىن بايقاتىپ ءجۇر. مەن قىزىمنىڭ بەتىنەن قاقپايمىن. سەبەبى، ءوزى ويلانىپ-تولعانىپ تاڭداعانى دۇرىس دەپ ەسەپتەيمىن. ونەرپازداردىڭ اراسىندا «ونەر جولى اۋىر جول» دەگەن ءسوز شىنىمەن دە جاۋىر بولعان عوي. «ونەر جولى اۋىر جول» دەيتىنىمىز قىز بالانىڭ ەڭ ءبىرىنشى ماقساتى – دۇنيەگە كەلگەن سوڭ بوي تۇزەپ، ءوزىنىڭ وقۋىن بىتىرگەننەن كەيىن وتباسىن قۇرۋ. دۇنيەگە ۇرپاق اكەلۋ. ەڭ ماڭىزدىسى سول. ال ونەر جولىندا بۇعان كىشكەنە كەدەرگى بار. ويتكەنى، سەن وتباسىڭدى ۇستايسىڭ، بوپەلەرىڭ وسكەنشە ۋاقىت ءوتىپ جاتادى. وعان ۇلگەرىپ جاتقاندار دا بار. سونشالىقتى كوڭىلىنە سۋ سەۋىپ، ونەر جولىمەن جۇرمە دەپ ايتپايمىن. ونەر جولىن سونشالىقتى اۋىر دەپ تە ەسەپتەمەيمىن.
– ەستۋىمىزشە، قىتايدا قازاق قىزدارى حان ۇلتىنىڭ ازاماتتارىمەن شاڭىراق قۇرۋ ءۇردىسىن باستاپ جاتىپتى...
– ءوزىمىز ۇلكەن قالا بەيجىڭدە ستۋدەنت بولىپ جۇرگەن كەزىمىزدە جۇڭگو جىگىتتەرى كۇلىپ سويلەسە دە «ساعان ەڭ ءبىرىنشى ىشەگىڭدى جۋۋ كەرەك، ىشەگىڭنىڭ جارتىسىن كەسىپ تاستاۋ كەرەك» دەپ ايتاتىنبىز. ولار ونى تۇسىنبەيدى. سوسىن دۇنگەن جىگىتتەرى ولارعا «سەندەر حالال تاماق جەمەگەن سوڭ سونداي قيىن جولدان وتۋلەرىڭ كەرەك» دەپ تۇسىندىرەتىن. سودان ولار بىزگە ءسوز سالعاندى قويىپ بەتىمىزگە قاراپ سويلەي دە المايتىن ەدى. سوڭعى كەزدەرى قىتايداعى قازاق بويجەتكەندەرى جۇڭگو جىگىتتەرىنە تۇرمىسقا شىعۋدى ءوزىڭ ايتقانداي باستاپ تا كەتكەنىن كورىپ تە، ەستىپ ءجۇرمىن. مەنىڭشە، بۇل جات جۇرتتا جۇرگەن قازاقتىڭ باسىنا قاشاندا بولماسىن تۋاتىن كۇن دەپ ويلايمىن. ءبارىبىر ارالاس نەكە ەڭ سوڭىندا جاقسىلىققا اپارمايدى. ۇلتى بولەك، ءدىنى بولەك بولعان سوڭ كۇندەردىڭ كۇنىندە شاڭىراعىنىڭ شايقالۋىنا سول سەبەپ بولارى انىق. ال ارالاس نەكەدەن تۋىلعان ۇرپاق تا دەل-سال كۇيدە قالادى. الايدا، اتاجۇرتقا جەتسەم، قازاق توپىراعىن باسسام دەپ جۇرگەن قازاق جاستارى دا قىتايدا جەتەرلىك. ءتىپتى ءتولقۇجات جاساتۋعا اقشاسى جوق التاي، تارباعاتاي وڭىرىندە جۇرگەن جاستاردى كوزىم كوردى.
– ءسىزدىڭ ويىڭىزشا قازاق قىزى قانداي بولۋ كەرەك؟
– مەن قازاق قىزى ەكەنمىن دەپ زاماننىڭ تالابىن ورىنداماسا تاعى دا بولمايدى. دۇرىس تاربيە كورگەن قىز بولسا قاي عاسىردا دا قازاقى قالپىنان اينىمايدى دەپ بىلەمىن. ويتكەنى، ول قانمەن كەلەتىن قاسيەت. مىنەز ادامدا ءار ءتۇرلى بولادى. دەسە دە قازاق قىزدارىنىڭ قانىندا سابىرلى، يماندى، تۇراقتى قاسيەت بولۋى كەرەك. «الپامىس» داستانىندا گۇلبارشىننىڭ ايتقان ءبىر ءسوزى بار: «الپامىستى جەتى جىل ەمەس، جەتپىس جىل كۇتۋگە دە دايىنمىن» دەگەن. سوناۋ باعزىدان قالىپتاسىپ كەلە جاتقان قازاق قىزدارىنا ءتان قاسيەت – تۇراقتىلىق. جاۋاپكەرشىلىكتى ارقالاي بىلەتىن، قاراپايىمدىلىقتى جانى سۇيەتىن قاسيەتتەردى قىزدارىمىز جوعالتپاسا ەكەن دەيمىن. قازاق قىزى وسىنداي قاسيەتتەرىمەن بارلىعىن دا جەڭەدى، جەڭە دە بىلگەن. گۇلبارشىن اپامىز 70 جىل كۇتەم دەگەن تۇراقتىلىعىنىڭ 5 پايىزىن عانا ورىنداسا دا قازاق قىزدارى جامان بولمايدى. 70 جىل ەمەس، 7 اي نەمەسە 7 كۇن كۇتسىن، رەنىشتىڭ ءبارى سەيىلەدى. سول ارقىلى سابىرلىلىعىمەن شاڭىراعىن شايقالتپاي ۇستاپ قالار ەدى. قازىرگى كەزدە بىر-بىرىنە بوي بەرمەگەندىكتەن شاڭىراق شايقالىپ جاتادى. اللا تاعالانىڭ بەرگەن سىيى مەن سىنىن كوتەرە بىلگەن ءجون. ساحنادا گۇلدەي جايناپ قانشا ءان ايتقانىڭمەن وتباسىندا داۋىسىڭدى كوتەرىپ سويلەمەيتىن قاراپايىم عانا اناسىڭ. «قىزدىڭ جولى جىڭىشكە» دەپ اتا-بابامىز جايدان-جاي ايتپاعان عوي.
– وتباسىڭىز جايلى توقتالساڭىز؟
– جولداسىم – مۇرات شەريزات ۇلى مەن پەكيندە وقىعان كەزدە ول شي-ان دەگەن قالادا بەلگىلى ءانشى وتانبەك ەڭسەحان ۇلى ەكەۋى بىرگە وقىعان. ول دا ونەردىڭ ادامى. ءبىراق ول ەركىن مۋزىكانت رەتىندە، ءوز تىرلىگىن ىستەپ ءجۇر. مەنى وتە قولدايدى. ەڭ العاش قازاقستاننان اسپيرانتۋرا وقيمىن دەگەندە دە قارسى بولماي، قولداپ، قۋاتتاپ 3 جاسار بالاممەن شىعارىپ سالعان بولاتىن. سول جىبەرگەنىنىڭ ءوزى ۇلكەن ەرلىك، قولداعاندىعى دەپ تۇسىنەمىن. ول مەنىڭ ءوزىمدى ونەرگە ارناعان ادام ەكەنىمدى جاقسى تۇسىنەدى. جالعىز وكىنىشىم بار. ول – قىزىمىزدىڭ سوڭىنان باۋىرلارى ەرمەگەنى.
– ءوزىڭىز تويلارعا ۇسىنىسپەن قاتىسىپ ءجۇرسىز. سىزدىڭشە قازىرگى كەزدەگى توي سالتى قالاي ءوتىپ ءجۇر؟
– شىنىمەن دە، وسى استاناداعى كوپ قىزدى «قىز داۋرەنمەن» قۇتتى ورنىنا قوندىردىم. 2001 جىلى حالقىمىزدىڭ كورنەكتى عالىمى مىرزاتاي جولداسبەكوۆ اعامىز نەمەرەسىن ۇزاتقان كەزدە، جالعىز مەنىڭ اقبوتاما ارناعانىم بولماسىنشى، بوساعادان اتتاعان قاي قازاق قىزى دا ايتىپ شىعاتىنداي انگە اينالسىن دەپ وسى «قىز داۋرەندى» دۇنيەگە اكەلگەن بولاتىن. سول انمەن دە كوپتەگەن قىز ۇزاتۋ تويلارىنا شاقىرىلىپ تۇرام. مەنىڭ بايقاعانىم، كەيىنگى كەزدە استانادا بولسىن، ءوزىم ات باسىن بۇرىپ جۇرگەن باسقا قالالاردا بولسىن توي سالتىن قازاقى داستۇرمەن وتكىزۋگە ەرەكشە كوڭىل ءبولىپ كەلەدى. «ءوزىڭىز قازاقى ورتادا ءوستىڭىز، ونەردىڭ قايناعان ورتاسىندا ءجۇرسىز» دەپ كەيبىر سالتتاردى توي يەلەرى سۇراپ تا جاتادى. ول جاعى مەنى قاتتى قۋانتادى. ەڭ العاش كەلگەن جىلدارى استانادا وتكەن ءبىر تويدا كۇيەۋ جىگىت قالىڭدىقتىڭ باتىڭكەسىنە سۋسىن قۇيىپ ىشكەندە تاڭ قالعانمىن. 10 جىلدىڭ كولەمى بولدى. ونداي سولەكەت عۇرىپتاردى ەشكىمنەن بايقاعام جوق. مەن قاي جەردە ءان ايتسام دا قازاقتىڭ ۇلتتىق كيىمىن عانا كيەمىن. انشىلەر انىمەن تىڭدارماننىڭ قۇلاق قۇرىشىن قاندىرىپ قانا قويماي، تالعاممەن كيىنىپ، ۇلتتىق مادەنيەتتى دامىتۋشى ءارى ناسيحاتتاۋشى بولا ءبىلۋى كەرەك دەپ ەسەپتەيمىن.
– الىستان كەلگەن ءار اعايىن ۇلكەن ارمان ارقالاپ كەلەتىنى انىق. ءوزىڭىزدىڭ قانداي ۇلكەن ارماندارىڭىز ورىندالدى؟
– كەزىندەگى شىعىس تۇركىستان قۇرامىز دەگەن توڭكەرىسشىل جەتى ازاماتتىڭ بىرى-دالەلحان سۇگىربايەۆتىڭ تۋعان نەمەرەسى بولامىن. ولار قازىرگى شىڭجاڭداعى ات توبەلىندەي قازاقتاردى ازات ەتۋدى اڭسادى. شىعىس تۇركىستان مەملەكەتىن قۇرساق دەپ تالپىندى. بىردە سوۆەت ۇكىمەتىنەن، بىردە جۇڭگو مەملەكەتىنەن كومەك سۇرادى. شاعىن عانا شىعىس تۇركىستان مەملەكەتىنىڭ الپاۋىت ەكى ەلدىڭ ورتاسىندا ازاتتىق الۋى ولارعا ءتيىمسىز بولعاندىقتا، بەلگىسىز سەبەپتەرمەن ۇشاق جارىلىپ، اتام 49 جاسىندا قازا بولعان ەكەن.
بىرىنشىدەن، مەنى اتاجۇرتقا جەتەلەگەن دۇنيە – قازاق ەلى ونەردىڭ قارا شاڭىراعى دەپ تۇسىنگەنىم بولسا، ەكىنشى جاعىنان سول ازاتتىقتى اڭساپ وتكەن اتالارىمنىڭ بوستاندىق سۇيگىشتىگى قانمەن دارىعان بولار دەپ ويلايمىن. ۇشىنشىدەن، سول تەكتى اتالارىمىزدىڭ جەتە الماي كەتكەن ارماندارىن اللا تاعالا ءبىزدىڭ ماڭدايىمىزعا جازىپ، ورىندالۋىنا ءناسىپ ەتكەن بولار. كيەلى توپىراقتى باسىپ، جارقىراپ جايناپ جۇرگەنىمىز دە سول شىعار. سونى ويلاعان سايىن وزىڭە دەگەن جاۋاپكەرشىلىك ءتىپتى دە ارتا تۇسەدى ەكەن. قانشاما باتىرلار، اقىن، جىرشىلار، بۇلبۇل كومەي، جەز تاڭداي انشىلەر ازاتتىققا تالپىنىپ، ءوز قىرشىن جاندارىن قيدى.
قازاقستاننىڭ مادەنيەت كۇندەرىنە جانە باسقا دا ءىس-شارالارعا بايلانىستى شەتەلدەرگە كوپ شىعىپ تۇرامىز. سول كەزدە شەتتە جۇرگەن قازاق اعايىندارعا «قازاق ەلىنە كەلىڭدەر، قازاق ءۇشىن ەڭبەك ەتىڭدەر، بولماعاندا بالالارىڭدى قازاق ەتىپ تاربيەلەڭىزدەر» دەگەن ناسيحاتتى كوپتەپ ايتىپ جۇرەمىن ءوز باسىم. ەڭ باستىسى نيەت دۇرىس بولىپ، سىرتتان كەلگەن بولىپ، ىشتەگى قازاق بولىپ حالقىمىزدى كوركەيتۋگە ۇلەس قوسساق بۇدان دا قۇدىرەتتەنە تۇسەمىز دەپ ويلايمىن. قىتايداعى كوپتەگەن قازاق اندەرىن قازاقستانعا الىپ كەلىپ، قۇرمانعازى، وتىرار سازى وركەسترىمەن ايتىپ، جازىپ الىپ راديودا دا كوپ ناسيحاتتادىم. قازاق ونەرىنە از دا بولسا وسىلاي ۇلەسىمدى قوسسام دەيمىن.
مەنىڭ قاتتى ريزا بولاتىنىم، ەلباسىمىزدىڭ ونەرگە جاقىندىعىنان بولەك شەتەلدەگى قانداستارىمىزدى العاش بولىپ شاقىرىپ 20 جىلدان استام ۋاقىت وتسە دە كوشتىڭ بۇيداسىن كەسپەي وتىرعانى ۇلكەن كورەگەندىك. كەلەم دەۋشىلەرگە ەشقانداي توسقاۋىل قويىپ جاتقان جوق. مەن جانە مەن سياقتى مەملەكەتتىك قىزمەتتە بولسىن، ونەردە بولسىن جارقىراپ جايناپ جۇرگەن شەتەلدەن كەلگەن قىز-كەلىنشەكتەر جەتەرلىك. سونىڭ بارلىعى ەلباسىمىزدىڭ جارقىن ساياساتىنىڭ ارقاسى ەكەنىن بارلىعىمىز مويىنداعانىمىز ءجون. ءتىپتى، شەتەلدەن كەلىپ وسىندا جوعارى وقۋ ورىندارىنا ءتۇسىپ، ءتىپتى «بولاشاقپەن» قايتا شەتەلدەرگە بارىپ ءبىلىمىن اسىرىپ، جالعاستى جۇمىسىن جاساپ جاتقان جاستار دا كوپ. مەيلى ءبىز قاي جەردە بولساق تا جۇرەگىمىزدىڭ تۇبىندە ءبىر عانا وي بار. ول – «قازاق».
مەن جۇڭگو قازاقتارىنان وسىندا اكەلگەن اندەرىمنىڭ ىشىندە بۇل جاقتا مۇلدە ايتىلىپ كورمەگەنى دە كوپ. اسەت نايمانبايدىڭ «ماقپال» دەگەن ءانى قازاقستاندا باسقا نۇسقامەن ايتىلادى. مەنىڭ ورىنداۋىمداعى قىتايداعى قازاقتار ايتاتىن «ماقپال» قازاقتىڭ 100 انىنە ەندى.
– شاكىرت تاربيەلەۋمەن دە اينالىسىپ جۇرگەن بولارسىز؟
– 2002-2009 جىلدارى ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىندە شاكىرت تاربيەلەدىم. مۋزىكالىق ءبىلىم دەگەن كافەدرا بولعان، كەيىننەن جابىلىپ قالدى. الداعى ۋاقىتتاردا ءان قورجىنىمدى مولايتىپ، تاجىريبەمدى تولىستىرىپ العان سوڭ جالعاستى تاربيەلەيتىن شىعارمىن دەپ ويلايمىن. ءقازىر تەك قانا انشىلىكپەن ءبىر جاقتى باعىتتى ۇستانىپ ءجۇرمىن. 2010 جىلى كونگرەسس حولدا «ءانىم ساعان تۋعان ەل» اتتى ۇلكەن كونسەرتىمدى وتكىزگەنمىن. سوڭعى كەزدەرى فيلارمونيادا نۇرعالي ەسىمدى جاس انشىمەن بىرىگىپ دۋەت ايتىپ ءجۇرمىن. جۇڭگو ءتىلىن دە ەركىن بىلگەندىكتەن اۋدارماشىلىق بويىنشا كوپتەگەن ۇسىنىستار بولدى. ءبىراق ونەردى قيىپ ەشقايدا كەتكىم كەلمەيدى.
– الداعى جوسپارىڭىز قانداي؟
– ءقازىر استانا قالاسى مەملەكەتتىك فيلارمونياسىندا جۇمىس جاساپ جاتىرمىن. بيىل ءساۋىر ايىندا التاي، تارباعاتاي، ىلە اندەرى دەگەن كەش وتكىزەمىز. ول كەزدە ءداستۇرلى اندەر مەكتەبىنىڭ بارلىق ورىنداۋشىلارى وسى التاي، تارباعاتاي، ىلە اندەرىن شىرقايتىن بولادى. ماقساتىمىز – سول قيىردان جەتكەن قازاق اندەرىن جاستارعا جەتكىزۋ. يماندى بولعىر اعامىز اقسەلەۋ سەيدىمبەك وسى التاي، تارباعاتاي، ىلە اندەرى قوڭىر اندەر دەپ، قازاق اندەرىنىڭ بەس مەكتەبىنىڭ بىرىنە قوسىپ جانە ول اندەردىڭ تابيعاتى مەن تاريحى جايلى عىلىمي تۇردە دالەلدەپ كەتكەنىنە وتە ريزامىن. سونىڭ ارقاسىندا كەز-كەلگەن ءداستۇرلى اندەردىڭ بايقاۋىندا وسى التاي، تارباعاتاي، ىلە اندەرى ايتىلادى. بۇل ەڭبەگى ءۇشىن اقسەلەۋ اعامىزعا بارلىعىمىز قارىزدارمىز.
– اڭگىمەڭىزگە راحمەت! ونەردىڭ بيىگىنەن تۇسپەي، قازاق دالاسىن اسەم انمەن تەربەي بەرىڭىز!
سۇحباتتاسقان مايگۇل سۇلتان
6alash ۇسىندى
