مايرا مۇحامەد قىزى

حالىق ءانى "القوڭىر"

تاريحي وتانىنا 1994 جىلى ورالدى. مايرا مۇحامەد قىزى بەيجىڭ ۇلتتار ۋنيۆەرسيتەتىنىڭ مۋزىكا فاكۋلتەتىن (دجوۋ بەن چين سىنىبى) جانە پەكين كونسەرۆاتورياسىن (گو شۋ دجەن سىنىبى) بىتىرگەن. الماتىدا قۇرمانعازى اتىنداعى قازاق ۇلتتىق كونسەرۆاتورياسىندا (پروفەسسور ن.ا. ءشاريپوۆتىڭ سىنىبى) ستاجيروۆكادان وتكەن.
                                                 مايرا مۇحامەد قىزىنىڭ (ەۋروپا ساحناسىندا مايرا كەرەي) شىعارماشىلىق ومىرىندەگى ايتۋلى كەزەڭى فرانسيانىڭ گراند-وپەرا تەاترىمەن (Opéra National de Paris) كەلىسىم-شارت جاساۋىنان باستالادى. الەم وپەرا ارەناسىنا ءپۋچچينيدىڭ «بوگەماسىنداعى» ميۋزەتتا رولىمەن دەبيۋت جاساپ، وپەرا جۇلدىزدارى تەنور روبەرتو الانيا، مارسەللو الۆارەز قاتارلاس انشىلەرمەن بىرگە ءان سالدى. گ.دونيسەتتيدىڭ «ماحاببات ءدارىسى» (L'Elisir d'Amore) اتتى كومەديالىق وپەراسىندا ادينا رولىمەن Opéra National de Lorraine، Opéra de Rennes، Théâtre de Caen، Grand Théâtre de Reims جانە Opéra National Bordeaux ساحنالارىندا ونەرىن كورسەتتى. الەمدىك كلاسسيكالىق وپەرانىڭ ۇزدىك ۇلگىلەرىنە قاتىسىپ، جەتەكشى پارتيالاردى ورىنداپ، ەۆروپاداعى وپەرا كارەراسىن بۇگىنگە دەيىن جالعاستىرىپ كەلەدى.

2005 جىلى مايرا مۇحامەد قىزى ايگىلى الەم وپەرا جۇلدىزى پلاسيدو دومينگونىڭ شاقىرۋىمەن اقش وپەرا ساحناسىنا كوتەرىلدى. ۆاشينگتون ۇلتتىق وپەرا تەاترىندا پ.ي.چايكوۆسكييدىڭ «ورلەان بيكەشىنەن» اگنەسس سورەل پارتياسىن ورىندادى، اتى اڭىزعا اينالعان الەم وپەرا جۇلدىزى ميرەللا فرەنيمەن ءبىر ساحنادا ءان سالدى.

Gay City News اقپارات قۇرالىنىڭ ايتۋىنشا، مايرا كەرەي - كەرەمەت ورىنداۋشىلىق شەبەرلىگىمەن قوسا تابيعات بەرگەن اجارى مەن ونەرى استاسقان دارىندى ءانشى. «تاماشا داۋىستىڭ يەسى مايرا كەرەي بىرەگەي دارىنىمەن، تابيعي قۋاتتى، اشىق تازا، جاعىمدى دا ادەمى داۋىسىمەن كورەرمەندەر جۇرەگىن جاۋلاپ الدى. مايرا كەرەي ۆاشينگتون وپەراسىنا ۇلكەن رولدەرمەن قايتا ورالاتىنىنا كامىل سەنەمىز»، - دەپ جازادى The Washington Times.

مايرا مۇحامەد قىزى قازاقتىڭ مەملەكەتتىك اباي اتىنداعى اكادەميالىق وپەرا جانە بالەت تەاترىنىڭ سوپرانو داۋىستى جەتەكشى ءارى بەدەلدى ءانشىسى. مايرانىڭ تەاترداعى رەپەرتۋارىندا برۋسيلوۆسكييدىڭ «قىز جىبەك» وپەراسىنداعى جىبەك، جۇبانوۆ پەن ءحاميديدىڭ «اباي» وپەراسىنداعى اجار، ۆەرديدىڭ «تراۆياتاسىنداعى» ۆيولەتتا، «ريگولەتتوداعى» دجيلدا، بيزەنىڭ «كارمەن» وپەراسىنداعى ميكاەلا، دونيسەتتيدىڭ «ليۋچيا دي لاممەرمۋردەگى» ليۋچيا، گۋنونىڭ «فاۋستىنداعى» مارگاريتا، ءپۋچچينيدىڭ «تۋراندوت» وپەراسىنداعى ليۋ جانە باسقا دا پارتيالارى بار.

سوڭعى وپەرا ماۋسىمىندا مايرا مۇحامەد قىزى گۋنونىڭ «رومەو مەن دجۋلەتتا» وپەراسىنداعى باستى پارتيانى Opéra National de Lorraine وپەرا تەاترىندا، دونيسەتتيدىڭ «دون پاسكۋالە» وپەراسىنداعى نورينا ءرولىن Grand Théâtre de Genève جانە Théâtre de Caen ساحنالارىندا، پۋچچيني «بوگەماسىنداعى» ميۋزەتتا پارتياسى جانە گۋنونىڭ «فاۋستىنداعى» مارگاريتا پارتياسىن Opéra National Bordeaux وپەرا تەاترىندا، ءبريتيننىڭ «جازعى تۇندەگى ءتۇس» وپەراسىندا تيتانيا ءرولىن Opéra National de Lorraine، Grand Théâtre de تoulon جانە Opéra National Bordeaux ساحنالارىندا سومدادى.

مايرا مۇحامەد قىزىنىڭ كونسەرتتىك رەپەرتۋارى باي دا بايسالدى. ءانشىنىڭ الەمدىك كلاسسيكالىق وپەراسىنان بولەك، وپەرەتتا، ميۋزيكل، كامەرالىق ۆوكالدى شىعارمالاردان، حالىق اندەرىنەن تۇراتىن باي رەپەرتۋارى ۇنەمى تولىقتىرىلۋ ۇستىندە. رەپەرتۋارىنداعى كوپتەگەن شىعارمالار قازاقستان ساحناسىندا بۇرىن سوڭدى ورىندالماعان. وپەرالىق جانە كونسەرتتىك رەپەرتۋارىن اسقان تالعامپازدىقپەن تاڭداپ، ۇلكەن ەڭبەكقورلىق پەن ىزدەنىستىڭ ۇلگىسىن كورسەتىپ كەلەدى. مايرانىڭ ورىنداۋشىلىق تاجىريبەسى بەتحوۆەننىڭ 9ء-شى سيمفونياسىن، گايدننىڭ «الەم جاراتىلىسى» وراتورياسىن، مەندەلسوننىڭ Elijah وراتورياسىن، موسارتتىڭ Exultate Jubilate، پەرگولەزيدىڭ «Stabat Mater»، ءروسسينيدىڭ «كىشكەنە سالتاناتتى مەسسا»،

مايرا مۇحامەد قىزى جەكە كونسەرتتىك، گاسترولدىك ساپاردا ءجيى بولادى. ول پەكين، گونكونگ، ستامبۋل، دەلي، سەۋل، ماسكەۋ، سانكت-پەتەربۋرگ، بۋداپەشت قالالارىندا جانە سلوۆاكيادا فورە، پۋلەنك، دەبيۋسسي، راحمانينوۆ، چايكوۆسكيي، سونىمەن قاتار، قازاق جانە جۇڭگو حالىق اندەرىن ورىندادى. پەكيننىڭ «جون شان لي تان» كونسەرتتىك زالىندا ورتالىق پەكين وپەرا تەاترىنىڭ سيمفونيالىق وركەسترىمەن جانە ۇلىبريتانياداعى «كادوگان-حولل» كونسەرتتىك زالىندا ءلوندوننىڭ كورولدىق سيمفونيالىق وركەسترىمەن جەكە كونسەرتتەرى ءوتتى.

2009-2010 وپەرا ماۋسىمىندا مايرا مۇحامەد قىزى كەرۋبينيدىڭ «مەدەيا» وپەراسىنداعى گلاۋچە ءرولىن سومدايدى. سونىمەن قاتار، Opéra National de Lorraine تەاترىنىڭ سيمفونيالىق وركەسترى سۇيەمەلدەۋىمەن Mozart et les femmes اتتى جەكە كونسەرتى فرانسيانىڭ نانسي قالاسىندا وتەدى.
قازاق مەملەكەتتىك اباي اتىنداعى اكادەميالىق وپەرا جانە بالەت تەاترى 2009-2010 ماۋسىمىندا مايرا مۇحامەدقىزىنا ارنايى دونيسەتتيدىڭ «ماحاببات ءدارىسى» (L'Elisir d'Amore) اتتى كومەديالىق وپەراسىنىڭ جاڭا قويىلىمىن ۇيىمداستىرۋدا.

مايرا مۇحامەد قىزى قازاقستاننىڭ ونەر ەلشىسى بولىپ، قازاقتى وزگە ەلدەرگە تانىتىپ، ۇلتتىق وپەرا ونەرىنىڭ جالاۋىن كوپتەگەن الىس-جاقىن شەتەلدەردە جەلبىرەتىپ، مارتەبەسىن كوتەردى، ەگەمەن ەلىمىزدىڭ ماقتانىشى، قازاق حالقىنىڭ جۇلدىزدى انشىسىنە اينالدى. قازاق مەملەكەتتىك قۇرمانعازى اتىنداعى اكادەميالىق حالىق اسپاپتارى وركەسترىمەن وسىعان دەيىن ورىندالماعان حالىق اندەرىنەن تۇراتىن «ءىنجۋ مارجان» تاسپاسىن جازىپ، ونەر سۇيەر قاۋىمنىڭ ىستىق ىقىلاسىنا بولەندى. مايرانىڭ ونەرى جايلى بۇقارالىق اقپارات قۇرالدارى كەڭىنەن ناسيحاتتادى. مايرا تاماشا انشىلىگىمەن قاتار، ءامىر قاراقۇلوۆتىڭ «جىلاما!» اتتى كوركەم فيلمىندە باستى ءرولدى شەبەر ورىنداپ، جاڭا ءبىر قىرىنان كورىندى.

«التىن ايداھار» بايقاۋىندا I سىيلىق (جۇڭگو، 1988 ج.)؛ «توماز الكايدە» بايقاۋىندا I سىيلىق (پورتۋگاليا، 1997 ج.)؛ ماسكەۋدەگى پ.ي.چايكوۆسكيي بايقاۋندا III سىيلىق، م.يا.داۆىدوۆا اتىنداعى ارنايى ديپلوم (رەسەي، 1998 ج.)؛ ەلەنا وبرازسوۆا بايقاۋىنىڭ ارنايى سىيلىعى (1999 ج.)؛ «ءۇمىت» نوميناسياسى بويىنشا «تارلان» تاۋەلسىز مەسەناتتار سىيلىعىنىڭ يەگەرى (2000 ج.)؛ «قازاقستان جىل تاڭداۋى - 2004» بايقاۋىنىڭ «التىن ادام» سىيلىعى يەگەرى.

6alash ۇسىندى