الماتىدا «زۋقا باتىر» اتتى جاڭا كىتاپ باسپادان شىقتى. كىتاپتىڭ اۆتورى ساعدوللا نۇرالى ۇلى.
كىتاپ جاڭادان قۇرىلعان «Mäŋgitas» الاش رۋحانياتىن قولداۋ قورى جاعىنان «Bilge» باسپاسىنان شىققان.
كىتاپتىڭ تۇساۋكەسەرى كەشە، 2023 جىلى ناۋرىزدىڭ 16 جاڭاسىندا الماتىداعى №4 قالالىق كىتاپحانادا ءوتتى.
زۋقا باتىر ەلدىڭ ەسە-تەڭدىگى ءۇشىن كۇرەسىپ، وسى جولدا عازيز جانىن قۇربان ەتكەن كورنەكتى تاريحي تۇلعا. زۋقا باتىردىڭ ەرلىك پەن كۇرەسكە تولى ءومىرى ورنەكتەلگەن بۇل داستان ساعدوللا نۇرالى ۇلىنىڭ قالامىنان تۋعان. ساعدوللا نۇرالى ۇلى بەلگىلى تاريحي وقيعالار مەن تاريحي تۇلعالاردى تاقىرىپ ەتە وتىرىپ كوپتەگەن داستان، ولەڭدەر جازعان اقىن. ءوزى دە زۋقا باتىر كورەگەن ءداۋىردىڭ سوڭعى شيرەگىندە ەكى ەلدە ءومىر سۇرگەن. اسىرەسە، ءور التاي جەرىندە ءوزىنىڭ كەيىپكەرى، قازاقتىڭ قاس باتىرى زۋقا قاجىمەن دامدەس بولادى. باتىر ءشايت بولعاننان كەيىن، ساعدوللا نۇرالى ۇلى ءىزىن كورگەن ىنىلىك پارىزى رەتىندە، زۋقا باتىردىڭ كىسىلىك بولمىسىن تاريحي وقيعالارمەن قوسا بايانداي وتىرىپ، اتالعان كەسەك تۋىندىنى مۇراعا قالدىرادى. بۇل داستان ەلىمىزدە تۇڭعىش رەت كىتاپ بولىپ باسىلىپ وتىر. كىتاپ جالپى وقىرمان قاۋىمعا ارنالادى.
كىتاپتىڭ تۇساۋكەسەرىنە بەلگىلى اقىن ءسىلامحات سەيتقامزا، جازۋشى، ەتنوگارف باياحمەت جۇماباي ۇلى، كۇيشى ارشىن كاسىمباي ۇلى، تاريحشى ەلدەس وردا باستاعان زيالى قاۋىم وكىلدەرى مەن ادەبيەتسۇەر جاستار قاتىستى. ادەبي شارا اياسىندا اتالعان قوعامدىق قوردىڭ اشىلۋى بولدى. ونان سىرت، «Bilge» باسپاسىنان شىققان «نۇرعوجاي باتىر ەستەلىكتەرى»، شومان قابدىراحمان ۇلى قۇراستىرعان «بۇلانايدان اسقان كوش» قاتارلى كىتاپتاردىڭ تۇساۋكەسەرى ءوتتى.
يگى باستاماعا ونەرپازدار ءان مەن كۇيدەن شاشۋ شاشتى. ۇلكەندەر اق باتاسىن بەرىپ، ەل رۋحانياتىنا قىزمەت ەتۋدى كوزدەگەن «Mäŋgitas» قورىنا اقجارما تىلەكتەرىن ءبىلدىردى.
