نۇر-سۇلتان. قازاقپارات -10 قازان كۇنى«استانا» كونسەرت زالىندا جاس ءانشى، حالىقارالىق جانە رەسپۋبليكالىق بايقاۋلاردىڭ لاۋرەاتى، ءداستۇر اسىلحان ۇلىنىڭ "ارمانىما حات" اتتى جەكە ءان كەشى وتەدى. ەسترادا جۇلدىزدارىنىڭ قاتىسۋىمەن وتەتىن ءداستۇردىڭ تۇڭعىش ءان كەشى توسىن تىيلارعا تولى بولماق. ءانشى بۇل كونسەرتىن قول سوزعان ۇلكەن ارماندارىنىڭ العاشقى باسپالداعى ەكەنىن ايتادى.
«بۇل مەنىڭ ونەر جولىمداعى ءبىرىنشى ەسەپ بەرۋ كەشىم. جالپى انگە-كۇيگە اۋەستىگىم اكەنىڭ قانىمەن انانىڭ اق سۇتىمەن كەلدى دەسەم ارتىق ايتپاعان بولار ەدىم. ارعى اتالارىم دا ونەرگە جاقىن ادامدار. اكەم اسىلحان ناۋرىزحان ۇلى تەرمەشى، ءداستۇرلى ءانشى كىسى. سول ءۇشىن دە بولار مەنىڭ اتىمدى ءداستۇر قويعانى ونەردەگى ءداستۇرلى جولىمىزدى جاڭعىرتىپ ءجۇرسىن دەگەن بولار. ونەر جولىمدا ازدى-كوپتى ناتيجەلەرگە قول جەتكىزدىم. سونىڭ بارلىعى ونەردەگى ۇستازدارىمنىڭ جانە مەنى قولداپ-قۋاتتاعان حالقىمنىڭ ارقاسى دەپ بىلەمىن. نۇر-سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ قولداۋىمەن كەشىمدى ۇيىمداستىرپ جاتىرمىن. اللا بۇيىرسا وسى كەشتە تىڭدارماندارىمدى جاڭا اندەرىممەن قۋانتسام دەيمىن. كونسەرت جاندى داۋىستا وتەدى. وزدەرىڭىز بىلەسىزدەر بيىل قازاقستاندا «جاستار جىلى» مەن سول جاستاردىڭ جالىنىن ەلىمە كورسەتكىم كەلەدى»،-دەيدى ءانشى.
ايتا كەتەيىك، ءداستۇر اسىلحان ۇلى 1989 جىلى جۇڭگو حالىق رەسپۋليكاسى تارباعاتاي ايماعى شاۋشەك قالاسىندا ونەرلى وتباسىندا دۇنيەگە كەلگەن. اكەسى تەرمەشى ءبىر ءومىرىن مادەنيەت سالاسىنا ارناعان. ال اناسى بولسا مەديسينا سالاسىنىڭ قىزىمەتكەرى. ءداستۇر - 2008 استانا قالاسى ساكەن سەيفۋلين اتىنداعى قازاگرو تەحنيكالىق ۋنيۆەرسيتەتىنە وقۋعا تۇسەدى. ءقازىر استانا قالاسى اكىمدىگىنىڭ مەملەكەتتىك اكادەميالىق فيلارمونياسىندا كلاسسيكالىق جانە ەسترادالىق ءان ءبولىمىنىڭ ءانشىسى!
- 2009 جىلى استانا قالالىق «جىگىت سۇلتانى» بايقاۋىنىڭ باس جۇلدەسىن جەڭىپ العان.
- 2010 جىلى رەسپۋبليكالىق «جاسقانات» بايقاۋىنىڭ ءفيناليستى.
- 2012 جىلعى «اقمولا جۇلدىزارى» بايقاۋىنىڭ لاۋرەاتى.
- 2016 جىلى شىمكەنتتە وتكەن «ءشامشى قالدياقوۆ اتىنداعى مەنىڭ قازاقستانىم حالىقارالىق ءان فەستيۆالى» ارنايى اكىم جۇلدەسىن العان. حالىقارالىق «شابىت» فەستيۆالىنىڭ ءفيناليستى.
- ۇلتتىق ارنامىز قازاقستان تەلەارناسىنىڭ ارنايى جوباسى «قازاقستان داۋىسى» بايقاۋىنىڭ ءفيناليستى.
ريزابەك نۇسىپبەك ۇلى
6alash ۇسىندى
