الماتىداعى "Bilge" باسپاسىنان، وتكەن عاسىردىڭ 30-جىلدارى يتجەككەننەن امان كەلىپ، قۋدالاۋدان قۇتىلۋ ءۇشىن، قوس ءسابيىن جەتەلەپ، جاياۋلاتىپ، تاۋ اسىپ، تاس باسىپ، جۇڭگو شەكاراسىنان ءوتىپ، ءور التاي جەرىنە بىرەر جىل بۇرىن كوشىپ بارعان ابدىكارىم بولىستىڭ ەلىنە قوسىلعان باس كەيىپكەر قابدىراحىماننىڭ بالاسى شورمان اقساقال جازعان، ەكى تىزگىن، ءبىر شىلبىر قازاقتىڭ قولىنان كەتكەن قاسىرەتتى عاسىردا ارعى بەت پەن بەرگى بەتتە قىرعىنعا، قۋعىن-سۇرگىنگە، ساياسي ايىپتاۋلارعا، جالعان جالاعا ۇشىراپ، قازاقستان تاۋەلسىزدىك العانعا دەيىن كەڭ كوسىلىپ كەرەمەت عۇمىر كەشپەگەن قانداس اعايىننىڭ اسا ايانىشتى تاعدىرى بەينەلەنگەن "بوداندىق" اتتى كىتاپ باسىلىپ شىققان بولاتىن.
اتالعان كىتاپتىڭ تۇساۋى كەشە الماتىداعى N 4-كىتاپحانادا كەسىلدى. كىتاپ اتى ايتىپ تۇرعانداي، بوداندىقتا بولعان ەلىمىز تاريحىنىڭ ءبىر بولەگى سىڭىرىلگەن بۇل ەڭبەكتىڭ جۇرتقا العاش جاريا بولعان جيىنى وتە جوعارى دەڭگەيدە، اسەرلى تولقىنىستار ىشىندە ءوتتى.
تۇساۋكەەرگە اقىن سلامحات سەيىتحامزا، شىعىستانۋشى جاس مامان Eldes Orda، ادەبيەتتانۋشى ەرزات ەركىن ۇلى ەرقاعان. ەر، كىتاپحانانىڭ ۋ.م.ا. مەڭگەرۋشىسى ميرا ماعاز قىزى قاتارلى زيالى قاۋىم وكىلدەرى، ادەبيەتسۇي ەر وقىرماندار مەن قالامگەردىڭ جاقىندارى، ۇيىمداستىرۋشى كىتاپحانا قىزمەتكەرلەرى قاتىستى. اتالعان كىسىلەر كىتاپ اۆتورىنا ىستىق ىقىلاستى لەبىزدەرىن بىلدىرۋمەن بىرگە، وتكەن عاسىرداعى ۇلتىمىزدىڭ ەل ءىشى-سىرتىنداعى ىرىلى-كىشىلى ۇلت ازاتتىق كوتەرىلىسەرىنىڭ تاريحي ماعىنسىنا توقتالىپ ءوتتى. اراسىندا كۇمبىرلى كۇي، اسەم ءان ورىندالدى. اۆتورعا جاقىندارى سىي-سياپات كورسەتتى.
كىتاپتى باسپادان شىعارعان "Bilge" ۇجىمى تىڭنان تۇرەن سالعان اقساقالعا العىس حات بەردى. جينالعان جۇرتقا ەلىمىزدىڭ ەسە-تەڭدىگى قولدان كەتكەن كەزەڭدەگى قيىن دا قىشقىل تاعدىرىن تاريح بايان ۇلگىسىندە، ءوزىنىڭ باسىنان وتكەن، اكەسى جانە داۋىرلەس اقساقالدار تاپ بولعان تاريحي وقيعالار نەگىزىندە جازىلعان "بوداندىقتىڭ" بەرگەن اسەرى مەن تاعىلىمى ەرەكشە بولدى. ەل ەگەمەندىك العاننان كەيىن اسىعا ءجۇرىپ اتاجۇرتقا جەتىپ، قالامىن ەركىن سىلتەگەن اقساقال – شورمان قابدىراحمان ۇلى شاراعا قاتىسۋشىلارعا شەكسىز العىسىن ءبىلدىرىپ، اعىنان جارىلىپ، اق باتاسىن بەردى. كەلەلى كەزدەسۋدىڭ سوڭى اق داستارحانعا ۇلاستى.
ءبىز بالاپان باسىنا، تۇرىمتاي تۇسىنا تارتقان قاندى عاسىرداعى قازاقتىڭ بەينەسىن اينىتپاي جازىپ، سارىارقاسىنىڭ سامالىنا كەۋدەسىن توسىپ، الاتاۋىنا ارقا سۇيەپ وتىرعان اۆتورعا قولداۋشى بولىپ، زور دەنساۋلىق، بيىك شىعارماشىلىق تابىس تىلەيمىز!
ادىلەت احمەت ۇلى
