جاقىندا قازاقستان رەسپۋبليكاسىنىڭ ەڭبەك سىڭىرگەن ءارتىسى، مەملەكەتتىك سىيلىقتىڭ يەگەرى، كوپتەگەن بەدەلدى حالىقارالىق بايقاۋلاردىڭ جەڭىمپازى، «استانا وپەرا» تەاترىنىڭ سوليست «سوپرانوسى»، تانىمال ءانشىسى مايرا مۇحامەد قىزى ونلاين كونسەرت بەرىپ، كارانتيندە وتىرعان حالىقتىڭ كوڭىلىن كوتەرىپ، جۇرتتى ىندەتتەن ساقتانۋ ءۇشىن ۇيدە بولۋعا شاقىردى. سول كەشتە ءبىرشاما ۇلتتىڭ تىلىندە ءان شىرقاعان انشىمەن ءبىز دە ونلاين سۇحباتتا بولعان ەدىك.
ءان الەمىنىڭ جارىق جۇلدىزى
ساحنانىڭ ساڭلاعى، ءان الەمىنىڭ جارىق جۇلدىزى مايرا مۇحامەدقىزىن بۇل كۇندە قازاقستان حالقى عانا ەمەس، تورتكۇل دۇنيەنىڭ انسۇيەر قاۋىمى تۇگەل تانيدى. 2005 جىلى الەم وپەرا جۇلدىزى پلاسيدو دومينگونىڭ شاقىرۋىمەن اقش وپەرا ساحناسىنا كوتەرىلگەن ونى «The Washington Post» گازەتىنىڭ «تاماشا داۋىستىڭ يەسى مايرا كەرەي بىرەگەي دارىنىمەن، تابيعي قۋاتتى، اشىق، تازا، جاعىمدى دا ادەمى داۋىسىمەن كورەرمەندەر جۇرەگىن جاۋلاپ الدى. مايرا كەرەي ۆاشينگتون وپەراسىنا ۇلكەن رولدەرمەن قايتا ورالاتىنىنا كامىل سەنەمىز» دەپ ىقىلاستى لەبىز بىلدىرگەنى وپەرا ونەرىن وزگەشە باعالايتىن ەۋروپالىقتار مەن باتىستىقتار مايرانى الەمدىك كلاسسيكالىق وپەرانىڭ ۇزدىك ورىنداۋشىسى رەتىندە اۋىزعا الاتىنىن ايعاقتاسا كەرەك.
وپەرا سەكىلدى كلاسسيكالىق ونەردىڭ شىڭىنا شىعۋ ءانشى اتاۋلىنىڭ ءبارىنىڭ قولىنان كەلە بەرمەيدى. مايرا مۇحامەد قىزىنىڭ (ەۋروپا ساحناسىندا مايرا كەرەي) شىعارماشىلىق ومىرىندەگى ايتۋلى كەزەڭى پاريجدەگى گراند-وپەرا تەاترىمەن كەلىسىمشارت جاساۋىنان باستالادى. سەبەبى قازىرگە دەيىن قازاقتىڭ وپەرا انشىلەرىنىڭ ەشقايسىسى مۇنداي دارەجەگە قول جەتكىزە العان جوق. الەم وپەرا ساحناسىندا ءپۋچچينيدىڭ «بوگەماسىنداعى» ميۋزەتتا ءرولىن سومداپ، وپەرا جۇلدىزدارى – تەنور روبەرتو الانيا، مارسەلو الۆارەسپەن بىرگە ءان سالىپ، الەمدىك كلاسسيكالىق وپەرانىڭ ۇزدىك ۇلگىلەرىنە قاتىناسقان ول ۆاشينگتون ۇلتتىق وپەرا تەاترىندا پ.چايكوۆسكييدىڭ «ورلەان بيكەشىنەن» اگنەسسا سورەل پارتياسىن ورىندادى، اتى اڭىزعا اينالعان الەم وپەرا جۇلدىزى ميرەللا فرەنيمەن ءبىر ساحنادا ونەر كورسەتتى. سوڭعى وپەرا ماۋسىمىندا بريتتەننىڭ «جازعى تۇندەگى ءتۇس» وپەراسىنداعى تيتانيا ءرولى سياقتى ءبىراز وبرازداردى سومداعان مايرانىڭ ونەردەگى وزگەشە بولمىسىن باتىس باق-تارى: «قازاقتىڭ ءانشى قىزى مايرا سومداعان وبرازدار ەشكىمگە ۇقسامايتىن، ەشكىمدى قايتالامايتىن وزىندىك اجار-ايشىعىمەن ەرەكشەلەنەدى. كەيىپكەرلەرىنىڭ بويىنا تابيعي سۇلۋلىق پەن ىشكى جان-دۇنيەسى مەن سىرتقى كەلبەتىنىڭ استاسىپ، ادامگەرشىلىك قاسيەتتەرىن ءسىڭىرىپ، كورەرمەندەر ءجۇرەگىن انشىلىك شىنايىلىعىمەن، ورىنداۋشىلىق شەبەرلىگىمەن باۋراپ الادى» دەپ باعالاعان بولاتىن.
1988 جىلى قىتايدىڭ «التىن ايداھار» بايقاۋىنىڭ باس جۇلدەسىن؛ 1997 جىلى پورتۋگاليادا وتكەن «توماز الكايدە» بايقاۋىنىڭ باس جۇلدەسىن؛ 1998 جىلى ماسكەۋدەگى پ.چايكوۆسكيي اتىنداعى بايقاۋدا 3-ورىن سىيلىعىن؛ ەلەنا وبرازسوۆا بايقاۋىنىڭ ارنايى سىيلىعىن؛ 2004 جىلعى «قازاقستان جىل تاڭداۋى-2004» بايقاۋىنىڭ «التىن ادام» سىيلىعىن العان مايرا مۇحامەد قىزىنىڭ ونەردەگى باعىنىڭ بيىك، ءورىسىنىڭ كەڭ بولۋىنا «الىپ انادان» دەگەندەي، اناسى كامال قۋانىش قىزىنىڭ ىقپالى ايرىقشا بولعان. بۇل جونىندە ءانشىنىڭ اناسى ماعان بەرگەن ءبىر سۇحباتىندا بىلاي دەگەن ەدى: «مايرا تۋعاندا كۇيەۋىم مۇحامەد «سەنىڭ ونەرىڭنىڭ جالعاسى دۇنيەگە كەلدى» دەپ ەدى. مارقۇمنىڭ اللا اۋزىنا سالدى ما، مايرا كىشكەنتايىنان انگە اۋەستىگىن بايقاتتى. مەن انگە ماشىقتانسام، ول دا ايقايلاپ ءان ايتىپ، تىنىشىمدى كەتىرەتىن. سىرتقا قۋىپ شىقسام، سىرتتا تۇرىپ ءان سالعاندا، كەيدە ۇيدەگى مەنىڭ داۋىسىمدى باسىپ تۇسەتىن. مايراعا جۇكتى كەزىمدە تۇسىمدە ءبىر بالا كەلىپ اق جاۋلىقتى ۇستاتىپ، ۇشاققا ءمىنىپ كوك اسپانعا سامعاپ كەتە بارعانىن كورگەن ەدىم. «ءتۇس – تۇلكىنىڭ بوعى» دەيدى عوي، مايرانى تۋاردا كورگەن سول ءتۇسىم مايرانىڭ بۇگىنگى بولمىسىن اڭعارتقان سەكىلدى».
ەۋروپانىڭ باس جۇلدەسىنەن ماسكەۋدىڭ «قولاسى» قۇندى بولدى
– اڭگىمەمىزدى الەمدىك دەڭگەيدەگى ءانشىنىڭ بالالىق ءداۋىرى مەن ونەر جولىنىڭ باستاپقى مەزگىلىنەن باستاساق…
– مەن قىتايدىڭ شىڭجاڭ ولكەسىنىڭ قۇلجا قالاسىندا ونەرلى وتباسىندا دۇنيەگە كەلدىم. انام كامال قۋانىش قىزى ىشىكباەۆا – «قىتايدىڭ ءانشى قىزى» اتانعان مەملەكەتتىك 1-دارەجەلى ءارتىس. اكەم مۇحامەد ءابدىقادىر ۇلى – قازاق حالىق اندەرىن جيناقتاعان مۋزىكا زەرتتەۋشىسى. ماعان وسى قوس قورمالىمنىڭ قاسيەتى دارىدى. سولارعا ەلىكتەپ ءان سالا ءجۇرىپ، ونەر جولىنا ءتۇستىم. قۇلجا قالاسىندا ورتا مەكتەپتى اياقتاعاننان كەيىن قۇلجا كوركەمونەر مەكتەبىنەن ەكى جارىم جىل پيانينو ۇيرەندىم. مەكتەپ بىتىرەتىن جىلى بەيجىڭنەن مۋزىكا ماماندارى كەلىپ وقۋشى قابىلداعاندا، شىڭجاڭنان قاتىسقان 4000-نان استام ۇمىتكەردىڭ اراسىنان تاڭداپ العان 5 ادامنىڭ ءبىرى مەن ەدىم. سوسىن 1984 جىلى بەيجىڭدەگى ۇلتتار ۋنيۆەرسيتەتىنىڭ مۋزىكا جانە بي فاكۋلتەتىنىڭ ءان كاسىبىنە وقۋعا ءتۇسىپ، جۋ بينشيڭ دەگەن پروفەسسوردان ساباق الدىم. 1987 جىلى جۇڭگو مەملەكەتتىك ءان جارىسىنا قاتىسىپ، كۇمىس مەدال يەگەرى اتاندىم. 1988 جىلى ۋنيۆەرسيتەتتى ۇزدىك ناتيجەمەن ءتامامداعانىم ءۇشىن ۋنيۆەرسيتەتكە مۇعالىمدىككە الىپ قالدى. سونىمەن 1988 جىلدان 1994 جىلعا دەيىن 6 جىل ءمۇعالىم بولدىم. ءبىراق بۇل كاسىپكە ونشالىق قۇشتار بولعام جوق. ساحنادا ءان سالسام دەگەن ىنتام باسىم بولدى دا، ەل كولەمىندە وتكىزىلگەن بايقاۋلارعا قاتىسىپ، 1988 جىلى قىتايدىڭ حۋنان ولكەسىندە تۇڭعىش رەت وتكىزىلگەن 3000 ءانشى قاتىسقان «التىن ايداھار» ءان بايقاۋىنىڭ باس جۇلدەسىن جەڭىپ الدىم. وسىدان كەءيىن حالىقارالىق ساحنالارعا شىقسام دەپ تالپىندىم. الايدا ول كەزدە قىتايدا ءوز بەتىڭمەن كەتە بەرۋگە مۇمكىندىك جوق ەدى. ساتىنە باسقاندا، ءبىر رەتكى حالىقارالىق بايقاۋ تاڭداۋىنان وتكەن 5 ادامنىڭ ءبىرى بولدىم دا، ماسكەۋدە 4 جىلدا ءبىر وتكىزىلەتىن چايكوۆسكيي اتىنداعى كونكۋرسقا جۇڭگو اتىنان قاتىستىم. ونەر سالاسىنىڭ نەبىر ساڭلاقتارى كەلگەن بۇل بايقاۋدان جۇلدە الا الماي، ۇزدىك ورىنداۋشى اتاعىن مىسە تۇتۋىما تۋرا كەلەدى. سول جىلى ماسكەۋدەن وقۋعا شاقىرتۋ كەلدى. ءبىراق بۇعان جۇمىس ورنىم ماقۇلدىق بەرمەدى. سەبەبى مەنى وقىتقان ەڭبەگىن وتەۋىم كەرەك قوي، بەيجىڭدە 6 جىل قىزمەت ىستەپ، 1994 جىلى قازاقستانعا كەلدىم. سول جىلى الماتىدا جەكە كونسەرتىم ءوتتى. كەلەسى جىلى قۇرمانعازى اتىنداعى قازاق ۇلتتىق كونسەرۆاتورياسىنا وقۋعا ءتۇسىپ، ءناديا ابدىراحمەن قىزى ءشارىپوۆانىڭ كلاسىنان ءان كاسىبى ماماندىعى بويىنشا اسپيرانتۋرا وقىدىم.
– قازاق ەلىنە كەلىپ العاش كونسەرت بەرگەندە، تىڭدارماندارىڭىز قالاي قابىلدادى؟ ونەرىڭىزدى باعالاي الدى ما؟
– قارعا تامىرلى قازاقپىز دەپ الىپ-ۇشىپ كەلگەنىمىزبەن سانا مەن تۇرمىس-سالتىمىزداعى پارىق، وسكەن ورتاداعى ايىرماشىلىق – ءبارى-بارى مەنىڭ ونەر جولىما ءوز ىقپالىن تيگىزبەي وتكەن جوق. ونىڭ ۇستىنە، ول كەز – قازاقستاندا ورىسشانىڭ دەسى قايتپاعان كەز. ءبىر اۋىز ورىسشا بىلمەيمىن، قازاقتارعا قازاقشا سويلەسەم «قاشاننان بەرى قازاق بولىپ قالىپ ەڭ؟» دەگەن قاڭقۋ ءسوزدى دە ايتقاندارى بولدى. سونىمەن قازاقشانى سويلەي ءجۇرىپ ورىسشانى دا ۇيرەندىك. 1997 جىلى پورتۋگاليادا وتكىزىلگەن «توماز الكايدە» بايقاۋىندا دۇنيە جۇزىنەن كەلگەن 123 ارىپتەسىمنەن وزىپ شىعىپ، باس جۇلدەنى جەڭىپ الدىم. ءبىراق بۇل بايگەمنىڭ باعاسىنا جەتىپ، ەشكىم باعالاعان جوق. سەبەبى ول كەزدە ماسكەۋدە وتكىزىلگەن بايقاۋدىڭ جۇلدەسىن جەڭىپ الساڭ عانا كەرەمەت سياقتى.
1998 جىلى ەلباسى ن.نازاربايەۆتىڭ قابىلداۋىندا بولدىم. سول كەزدەسۋدە ەلباسىنىڭ «ءان الەمىنىڭ وليمپياداسى» اتانعان، 4 جىلدا ءبىر وتەتىن چايكوۆسكيي اتىنداعى كونكۋرسقا قاتىسىپ كورمەيسىڭ بە دەگەن ءبىر اۋىز ءسوزى ماعان ۇلكەن دەمەۋ بولدى. وعان دەيىن بۇل بايقاۋدىڭ باس جۇلدەسىن قازاقتىڭ ءبىر ءانشىسى الىپ كورمەپتى. بايقاۋدان 3-ورىن الدىم. ءبىراق بايقاۋدىڭ ادىلەتسىز جەرلەرى دە بولدى. سەبەبى بايقاۋعا ۇزاق جىل دەمەۋشىلىك جاساپ كەلە جاتقان Yamaha سەرىكتەستىگى سول جولعى بايقاۋدان ءوز ونەرپازدارى باس جۇلدە المايتىن بولسا، دەمەۋشىلىكتەن باس تارتامىز دەگەن تالاپتى قويىپتى دا، باس جۇلدە سول سەرىكتەستىكتىڭ انشىسىنە، 2-ورىن ورىستىڭ ءوز انشىسىنە بۇيىردى. «اسىلى، باس بايگە قازاق قىزى مايرانىكى ەدى» دەپ ادىلدىگىن ايتقان ب ا ق قانا بولدى. انە سولاي، پورتۋگاليادان 1-ورىندى الىپ كەلگەندە ەلەمەگەن مەنىڭ وتانداستارىم مەن ماسكەۋدەن 3-ورىنمەن ورالعاندا، مەنى جاڭا كورگەندەي جاپىرىلدى. «ساحنا سىزدىكى»، «ءسىز قازاقستاننىڭ ءانشىسىسىز» دەپ توبەلەرىنە كوتەرىپ اكەتتى. مىنە، بۇل مەنىڭ ونەر جولىمداعى ەڭ ۇلكەن بۇرىلىستىڭ باستاۋى بولدى.
العاشقى ءان البومى شەتەلدە شىققان
– فرانسيانىڭ وپەرا گارنە تەاترىنا قالاي باردىڭىز؟
– قازاقستاننىڭ مادەنيەت كۇنى، قازاقستان جىلى سياقتى شارالارى قارساڭىندا ونەر ساپارىمەن ەۋروپا ەلدەرىنە كوپ باردىق. سول ساپارلارىمىزدا ەۋروپاداعى تىڭدارماندارىمىزدىڭ ماعان ىقىلاسى كوبىرەك اۋدى. وسى سۇرانىسقا ساي فرانسيانىڭ Devil سەرىكتىگى دەمەۋشىلىك جاساپ، مەنىڭ يتاليان تىلىندە وپەرا ۇزىندىلەرىن ورىنداعان العاشقى ءان البومىمدى شىعارىپ بەردى. بىلايشا ايتقاندا، قازاقستاندا ءبىر ءۇنتاسپام جارىق كورمەگەن كەزدە مەنىڭ تۇڭعىش CD ديسكىمدى فرانسۋزدار شىعارىپ، پاريجدە تۇساۋكەسەرىن جاسادىق. ءدال وسى كەزدە فرانسيانىڭ ەڭ ۇلكەن كانالى سۇحبات الىپ، ورىنداعان وپەرالارىمنان اريا بەردى. مۇمكىن وسى سۇحباتتىڭ ىقپالى بولعان شىعار، 2 جىلدان كەيىن گراند-وپەرا تەاترىنىڭ جەتەكشىسى قازاقستاننىڭ سىرتقى ىستەر مينيسترلىگىنە حات جازىپ، مەنى جىلدىق سارالاۋىنا شاقىرىپتى. قىرسىققاندا، الماتىنى بوز تۇمان بۇركەپ الدى دا، ۇشاق 4 كۇن كەشىگىپ ۇشىپ، ءدال سارالاۋ ءوتىپ جاتقان كۇنى پاريجگە جەتتىم. بۇل نەشە جىلدا ءبىر وتەتىن بايقاۋ بولعاندىقتان، دۇنيە ءجۇزىنىڭ بارلىق جەرىنەن كەلگەن تالانتتى انشىلەردىڭ ءبارى قاتىساتىن. كيىم اۋىستىرۋعا دا ۇلگەرمەي، ساحناعا شىعىپ، سۇيەمەلدەۋشىلەردىڭ قولىنا نوتامدى ۇستاتتىم. شۇكىر، باعالاۋشىلار وڭ باعاسىن بەرىپ، 3 جىلدىق كەلىسىم جاساستىم. قۋانىشىمدا شەك بولعان جوق. ەلگە ورالعان سوڭ تاعى دا ەلباسىنىڭ قابىلداۋىندا بولدىم. ەلىمىزدىڭ اقپارات قۇرالدارى «قازاق قىزى الەمدىك ساحناعا كوتەرىلدى» دەپ الاقاي ايتىپ، حابارلاپ جاتتى. سونىمەن 2003 جىلدان 2006 جىلعا دەيىن پاريج ساحناسىندا وپەرا ورىندادىم.
– الەم ساحناسىنا كوتەرىلگەن كەزىڭىزدە بىرگە ءان سالعان ارىپتەستەرىڭىز كىم بولدى؟
– مەيلى فرانسياداعى، الدە اقش-تاعى كەزىمدە بولسىن، الەمدىك كلاسسيكالىق وپەرانىڭ ەڭ ۇزدىك شولپاندارىمەن بىرگە ءان سالدىم. ايتالىق، فرانسۋزدىڭ ەڭ اتاقتى وپەرا جۇلدىزدارى، تەنور داۋىستى انشىلەرى روبەرتو الانيا، مارسەلو الۆارەسپەن بىرگە فرانسيا ساحناسىندا ونەر كورسەتسەم، دۇنيەنىڭ 3 ۇلكەن جوعارى داۋىستى ءانشىسىنىڭ ءبىرى پلاسيدو دومينگونىڭ شاقىرۋىمەن يتاليانىڭ ميلان قالاسىنا باردىم. ول كىسى اۋەنىمدى تىڭداپ كورىپ، 2005 جىلى ۆاشينگتوندا وتكىزىلگەن وپەرا ماۋسىمىنا شاقىردى. سول كەزدەگى ۇلكەن بەلەسىم زامانىمىزدىڭ ەڭ اتاقتى دانىشپان ءانشىسى، يتاليالىق ميرەللا فرەنيمەن ءبىر ساحنادا وپەرا ورىندادىم. وپەرا ورىنداۋداعى اتى اڭىزعا اينالعان ايتۋلى تۇلعالار لۋچانو پاۆاروتتي، حوسە كاررەراس، پلاسيدو دومينگومەن بىرگە ونەر ساحناسىنا شىقتىم. وتە عاجاپ كەز ەدى ول. دۇنيەدەگى ەڭ اتاقتى انشىلەر، ايگىلى ديريجورلەرمەن بىرگە الەم ساحناسىندا تۇرعان سول كەزىمدى ءومىرىمنىڭ ەڭ ساۋلەلى تۇسىنا بالايمىن.
«كەرريدىڭ قارىنداسى»
– ەۋروپا ساحناسىندا قالايشا «مايرا كەرەي» دەگەن ەسىمدى قولدانىپ ءجۇرسىز؟
– بۇل دا ۇلكەن حيكايا. مەن پاريج ساحناسىنا مايرا مۇحامەد قىزى دەگەن اتپەن كوتەرىلگەن كەزدە اقش-تاعى دۇنيەجۇزىلىك ساۋدا عيماراتىنىڭ شاڭىراعىن تەرروريستەر ورتاسىنا تۇسىرگەن مەزگىل بولاتىن. ال ونى قۇلاتۋعا قاتىسقانداردىڭ كوبىنىڭ ەسىمىنىڭ مۇحامەد دەگەن اتپەن قاتىستى بولعاندىعى سەبەپتى باتىستىقتار مەنىڭ اكەمنىڭ اتىنا دا الاكوزبەن قارادى. سوسىن ارىپتەستەرىم «مۇسىلمانداردىڭ ەۋروپادا جاعدايى قيىن، ساحنادا ءان سالام دەيدى ەكەنسىڭ، فاميلياڭىزدى وزگەرتۋىڭىز كەرەك. ەڭ ابزالى، قىسقا دا نۇسقا ەسىم قولدانىڭىز» دەگەن تالاپتى قويعان سوڭ، تىزگىن ۇشىمەن قازاقستانعا جەتىپ، سىرتقى ىستەر مينيسترلىگىنە جاعدايدى اڭىس ەتىپ ەدىم، كەڭەسە كەلىپ «مايرا كەرەي» دەپ ات قويىپ بەردى. ەڭ قىزىعى، 2005 جىلى اقش-قا بارسام، دجون كەرري پرەزيدەنت سايلاۋىنا ءتۇسىپ جاتىپتى. قازاقتىڭ كەرەي دەگەن رۋىن اعىلشىندار قايدان بىلەدى، كەرري مەن كەرەيدى ءبىر دەپ جوبالاپ، «دجون كەرريدىڭ قارىنداسىسىز با؟» دەپ سۇراعاندار دا بولدى.
– قىتايدىڭ گۋانچجوۋ قالاسىندا وتكەن ازيادا ويىندارى مەن ەلىمىزدە وتكەن VII قىسقى ازيادا ويىندارىنىڭ جابىلۋ سالتاناتىنا قاتىسىپ ءان سالعانىڭىزدى بىلەمىز، بۇل جايىندا دا ايتا كەتسەڭىز…
– مەن ءۇشىن بۇل دا ءبىر ۇلكەن عانيبەت بولدى. XVI ازيا ويىندارىندا ورىندالاتىن اندەردىڭ تاڭداۋىنا ورتالىق ازيادان 21 ءان جىبەرىلدى ءارى بۇل اندەردى كىمدەردىڭ ورىندايتىنى قۇپيا بولدى. مۇمكىن باعىم جەڭگەن شىعار، ساراپشىلار مەن ورىنداعان «جاناي كەرىم» ءانىن ۇناتىپتى. سونىمەن قازاقستان ۇكىمەتى مەنى جىبەردى. الايدا ولار ماعان «دۋداراي»-دى ايتاسىز دەپ ۇقتىرعان بولاتىن. ءبىر قىزىعى، قىتايلار جاڭاعى «جاناي كەرىم»ء-دى مەن ورىندادى دەپ ويلاماسا كەرەك، كەلگەن سوڭ شاقىرىپ الىپ «ءسىز مىنا ءاندى ورىندايسىز، تاماشا ورىندالعان ءان، بىرەر ەستىسەڭىز ۇيرەنىپ الاسىز» دەمەسى بار ما؟! مەن اڭتارىلدىم دا قالدىم. «ماعان قازاقستاندا «دۋداراي»-دى ورىندايسىڭ دەگەن ەدى عوي» دەسەم، «جوق، ونداي ءان جوق. ءبىز بۇل انگە سۇيەمەل بي جاساتقالى 3 اي بولدى، ءسىز مىندەتتى تۇردە وسى ءاندى ايتاسىز» دەپ تۇرىپ العان سوڭ، تاڭداپ العان اندەرىن تىڭداپ كورسەم، مەن ورىنداعان ءان. شىنىن ايتايىن، باسىندا قىتايلار دا سەنبەدى. قايتا ورىنداعاندا بارىپ ازەر يلاندى. ال VII قىسقى ازيادا ويىندارىنىڭ اشىلۋ سالتاناتىندا مەن شەتەلدە بولدىم دا، جابىلۋ سالتاناتىنا قاتىسۋعا كەلىسىم بەرىپ، الماس سەركەبايەۆتىڭ مەنىڭ داۋىسىما ارنايى لايىقتاپ جازعان «ازيانىڭ داۋىسى» دەگەن ءماتىنى جوق ۆوكاليز ورىندادىم.
ايدانى 20 جىل كۇتتىك
– وتباسىڭىز تۋرالى ايتۋىڭىزعا بولا ما؟
– مەن باقىتتى جانمىن. كۇيەۋىم اقسان اسقات ۇلى قىتايدىڭ شاۋەشەك قالاسىندا تۋىپ وسكەن. كەزىندە قىتايداعى سپورت كومانداسى ساپىندا دالا موتوسيكلىنەن ونەر كورسەتۋدەن 10 دۇركىن چەمپيون بولعان. ال قىزىم ايدانى كوپ جىل كۇتىپ ءجۇرىپ، 43 جاسىمدا كوردىم. جۇكتىلىگىمە 4 اي بولعاندا الەمدىك ەكى ۇلكەن وپەرا شاڭىراعىنان ۇسىنىس الدىم. تۇنىمەن ۇيىقتاي المادىم. تاڭەرتەڭ ويانسام، دەنەم جايسىزدانىپ تۇر ەكەن. ول ماعان ۇلكەن سىناق بولدى. سول كەزدە شەشىم قابىلدادىم. وپەراسى دا قۇرىسىن، باسقاسى دا قۇرىسىن! كەرەگى بالا دەپ اۋرۋحاناعا جۇگىردىم. انامنىڭ «سەنىڭ وپەراڭ – بولاشاعىڭ، باقىتىڭ – بالاڭ» دەگەن ءسوزى ءالى ەسىمدە. انامنىڭ ءتىلىن العانىما قۋانامىن. قىزىم ومىرگە كەلىپ، انا باقىتىن سەزىنگەن ءساتىم ۇمىتىلمايدى.
– نۇر-سۇلتانعا قاشان كوشىپ كەلدىڭىز؟
– مەنى 2015 جىلى «استانا وپەرا» تەاترىنا ەلباسىنىڭ ءوزى شاقىردى. سودان بەرى وسى ونەر ۇجىمىندا قىزمەت ىستەپ كەلەمىن. دۇنيەنىڭ كوپ جەرىن ارالادىم. الەمنىڭ ساحنالارىندا قازاقتىڭ كيىمىن كيىپ، قازاق اندەرىن ورىندادىم. مۇنى ءوزىم ۇلكەن ماقتانىش سانايمىن. فرانسيادا ەڭبەك ەتكەن كەزىمدە ولاردىڭ تەك فرانسۋز تىلىندە سويلەيتىنىن، ءوز انا ءتىلىن ەرەكشە قۇرمەتتەيتىنىن كورىپ قاتتى قىزىقتىم. قازاقتىڭ ءتىلى دە، ونەرى دە ەشكىمنەن كەم ەمەس، ماسەلە سونى باعالاۋدا تۇر. بۇلتتان بيىك بولساڭ دا، ۇلتىڭنان الاساسىڭ، ءوز ۇلتىڭا قۇرمەت انا ءتىلىن قۇرمەتتەۋدەن باستالادى. مەنىڭشە، ءاربىر وتانداسىمىز فرانسۋزداردىڭ جاڭاعى قاسيەتىن ۇيرەنۋى كەرەك دەپ ويلايمىن.
سۇحباتتاسقان قالياكبار ۇسەمحان ۇلى
اساتانا اقشامىنان الىندى
6 الاش ۇسىنادى
