الماتىدا «شىعىستىڭ سونبەس جۇلدىزى – دۋبەك شالعىنباي» اتتى كىتاپ شىقتى. كىتاپتى بەلگىلى تاريحى عالىم ءالىمعازى داۋلەتحان مەن اقىن، الاشتانۋشى ادىلەت احمەت ۇلى قۇراستىرعان. كىتاپ جاقىندا عانا قۇرىلعان «ماڭگىتاس» الاش رۋحانياتىن قولداۋ قورىنىڭ قارجىلىق دەمەۋىمەن باسىلعان.
دۋبەك نۇرتازا ۇلى شالعىنبايەۆ حح عاسىر باسىنداعى جۇڭگو قازاقتارى اراسىنان شىققان اسا كورنەكتى تۇلعا، العاشقى ۋنيۆەرسيتەت تۇلەگى، جۇڭگو ءتىلىنىڭ مامانى، قازاق ءتىلى مەن مادەنيەتىنىڭ جاناشىرى، جازۋشى ءھام جۋرناليست ءارى مايتالمان اۋدارماشى، ءتىپتى سول ءداۋىردىڭ وزىندە-اق جاس تا بولسا كوپتىڭ كوڭىلىنەن ورىن العان، ەل اۋزىنا ىلىنگەن، قوعام جانە مەملەكەت قايراتكەرى. دۋبەك شالعىنبايەۆ تۋرالى زەرتتەۋلەر كەيىن باستالدى. ونىمەن بىرگە ءومىر سۇرگەن ۇزەڭگىلەس دوستارى ج.بابالىق ۇلى، ق.قانافين، ب.بافيندەر ەستى ەستەمەلەر جازىپ قالدىرعان. سونىمەن بىرگە ارعى بەتتە ءباتىش اقىن قىزى دۋبەكتىڭ ءومىرى تۋرالى جەكە كىتاپشا دايىنداعان. اۋمالى-توكپەلى ساياسي كەزەڭدەردە د.شالعىنبايەۆتىڭ شىعارمالارى تۇگەلگە جۋىق قولدى بولعان. بۇل جيناققا د.شالعىنبايەۆتىڭ قولدا بار ازىن-اۋلاقتى شىعارمالارىنان تىس، اتالعان اۆتورلاردىڭ ەستەلىكتەرى مەن ەڭبەكتەرى، سونداي-اق "ىلە تاريحي ماتەريالدارى"، «مۇرا» جۋرنالى، «القاپ» اتتى كوپتومدى الماناحتا جارىق كورگەن كەيبىر ماقالالار مەن جەكە زەرتتەۋشىلەردىڭ جازبالارى وزگەرتىلمەي سول قالپىندا ەنگىزىلىپ وتىر. وقىرمان قاۋىمعا ۇسىنىلىپ وتىرعان وسى جيناق اتى ۇمىتىلىپ بارا جاتقان تاريحي تۇلعا تۋرالى تانىمدى ۇلىقتاپ، دۋبەك تۋرالى زەرتتەۋلەردىڭ ورنىن تولتىرادى دەگەن ۇمىتتەمىز.
«بۇل كىتاپ ءالىمعازى داۋلەتحان ۇلىنىڭ 80 جىلدىق مەرەيتويىنا وراي وتكەن، «ەجەلگى جانە ورتاعاسىرلارداعى قازاقستاننىڭ جاڭا تاريحي ماسەلەلەرى» اتتى حالىقارالىق عىلىمي-تاجىريبەلىك كونفەرەنسيادا تۇساۋى كەسىلدى. الداعى ۋاقىتتا اتالعان كىتاپتىڭ ارنايى تانىستىرىلىمىن وتكىزۋدى جوسپارلاپ وتىرمىز»، – دەيدى قۇراستىرۋشىلار.
