امىرەنىڭ اسقاق اۋەنى (ءتول داۋىسى)
1925 جىلى پاريج قالاسىندا وتكەن دۇنيەجۇزى كورمەسىندە سىڭعىر داۋىسىمەن امىرە قاشاۋبايەۆ «اعاش اياق»، «قاناپيا»، «ءۇش دوس»، «جالعىز ارشا»، «قوسبالاپان»، ت.ب. اندەرىن ورىنداپ، ەكى بايگەمەن قوسا، كۇمىس مەدالدى يەلەنەدى. ءسويتىپ، امىرە شەت ەلدە ونەر كورسەتكەن تۇڭعىش قازاق ءانشىسى بولدى.
1974 جىلى جارقىن شاكەرىم قازاق حالقىنىڭ ماڭدايىنا بىتكەن ءبىرتۋار جۇلدىزى، قايتالانباس تالانت يەسى امىرە قاشاۋبايەۆتىڭ داۋسىن العاش تاۋىپ، كوپشىلىككە ۇسىنعان ەدى. امىرەنىڭ ورىنداۋىندا فونوگرافقا جازىلعان «اعاش اياق» پەن «بالقاديشا» اندەرىنە رەستاۆراسيالىق تازارتۋ جۇمىستارى جاسالىنعان. بۇل تۋرالى جارقىن اتامىز بىلاي دەيدى.
«1974 جىلى قىرعىزستاننىڭ سول كەزدەگى ءبىرىنشى حاتشىسى ت.ۇسىبالييەۆ دەگەن كىسى د.ا.قونايەۆقا «كومپارتيانىڭ 50 جىلدىعى بولعالى جاتىر، سوعان وراي قىرعىزستاننىڭ بارلىق مىقتىلارىنىڭ – ساياقباي قارالايەۆ، ەستەمەس تۇرسىنالييەۆ، ۇرقاش مامبەتالييەۆ، تۋعانباي ابدييەۆ سەكىلدى ماناسشىلارىنىڭ جانە ايگىلى قىرعىز ورىنداۋشىلارىنىڭ كۇيتاباعىن شىعارۋعا كومەكتەسسەڭىزدەر» دەگەن مازۇندا حات جازىپ، ءوتىنىش جاسايدى. ول كەزدە كۇيتاباققا جازۋ ستۋدياسى ورتا ازيا بويىنشا الماتى مەن تاشكەنتتە عانا بار بولاتىن. سودان قازاق كسر مادەنيەت مينيسترلىگىنىڭ تاپسىرۋى بويىنشا «الماتى كۇيتاباققا جازۋ ستۋدياسىنىڭ» ديرەكتورى سەيىلحان قۇسايىنوۆ مەنى شاقىرىپ الىپ، «كىرىس» دەدى ەمەس پە؟ جۇلقىنعان جاس كەزىم، ءا دەگەنشە بولعان جوق قىرعىزستاننان ءبىر-اق شىقتىم. بىشكەكتە جارتى جىلداي تۇردىم. كولەمدى كۇيتاباق شىعارۋ ءۇشىن قىرعىز راديوسىنان ءبىراز شىعارمالاردى جازىپ الدىق. ەندى قالعانىن ماسكەۋدەن قوسپاقشىمىز. ويتكەنى وندا ساپالى جازبالار وتە كوپ بولاتىن. ءسويتىپ ماسكەۋدەگى ورتالىق مەملەكەتتىك مۇراعاتتىڭ فونو-فوتو قۇجاتتار جانە دىبىس جازۋ بولىمىندە ساقتالعان قىرعىز قورىن اقتارىپ، ماناسشىلاردى ىزدەپ جۇرگەم. سول جەردە قالىڭ شاڭنىڭ اراسىندا جاتقان قوڭىر كىتاپ قولىما ءتۇسىپ، ونداعى امىرەنىڭ ەسىمى، ول ورىنداعان اندەردىڭ ءتىزىمى، سونداي-اق فونوگرافقا جازىلعان داۋىس تاسپاسىنىڭ نومەرى كوزىمە وتتاي باسىلدى. قۋانعانىمنان كوزىمنەن قالاي جاس شىعىپ كەتكەنىن دە بىلمەي قالىپپىن.»
وكىنىشكە وراي امىرە قاشاۋبايەۆ دا ساياسي رەپرەسسيا قۇربانى بولدى. نەگىزگى سەبەپ قازاقتىڭ ۇلتتىق پاتريوتى مۇستافا شوقايمەن پاريج قالاسىندا كەزدەسۋى ەدى...
6alash ۇىندى
