ءار ۇلتتىڭ ءوزىنىڭ ۇلتتىق قۇندىلىقتارى بولادى. بۇل ورايدا قازاقتىڭ ۇلتتىق بۇيىمى بەسىكتىڭ پايداسى تۋرالى ايتسام دەيمىن. بالانىڭ تازالىعى، ۇيقىسىنىڭ تىنىش بولۋى ءوز الدىنا، بەسىك جاس نارەستەنىڭ تابيعي وسۋىنە اسەر ەتەدى. ءسابي انا قۇرساعىندا جاتىپ-اق تەربەلىسكە تۇسەدى. الايدا ءومىر ەسىگىن اشقان سوڭ جارىق دۇنيەگە بىردەن ۇيلەسە المايدى. سوندىقتان ونى انا قۇرساعىنداعىداي الديلەپ، تەربەتىپ وتىرۋ كەرەك. وكىنىشكە وراي ءقازىر (اسىرەسە قالالىق جەردە تۇراتىن) جاس كەلىنشەكتەر بالانى بەسىككە بولەۋگە ەرىنىپ، پامپەرستى كۇنى-تۇنى قولداناتىن بولىپ ءجۇر.
اقش پەن ەۋروپا ەلدەرىندە وزىق ويلى دارىگەرلەر پامپەرستى قولدانۋعا قارسى اكسيالار ۇيىمداستىرىپ، جاساندى جايالىقتان باس تارتۋعا ۇندەۋدە. ولار ونىڭ نارەستەنىڭ دەنساۋلىعىنا زيان كەلتىرەتىنىن ايتۋدا. ال بەسىك بولسا، ونىڭ قۇرىلىمى بالاعا گيگيەنالىق تاربيە بەرۋگە لايىقتالعان ءارى الىپ جۇرۋگە جەڭىل، ىقشام جانە بەرىك. ول بالانىڭ تازالىعىنا وتە قولايلى، ويتكەنى ارنايى قويىلاتىن تۇبەك پەن شۇمەك بالانىڭ دارەتىن جايماي، تازا جانە ۇزاق ۇيىقتاۋىنا جاعداي جاسايدى. بۇل ءۇي شارۋاشىلىعىمەن اينالىسىپ جۇرەتىن اناعا قالاي قولايلى بولسا، كوشىپ-قونىپ جۇرگەندە، بالانىڭ ءوزىنىڭ دە دەنىنىڭ ساۋ بولىپ وسۋىنە ءتيىمدى. جالپى اتا-بابامىز بەسىكتى قاسيەتتى، قۇتتى مۇلىك دەپ ەسەپتەگەن.
قازىرگى جان-جاقتى دامىعان زاماندا ادامنىڭ قاجەتتىلىگى ءۇشىن ءارتۇرلى زاتتار، تەحنيكا، جيھازدار شىعىپ جاتىر. ونىڭ ىشىندە سابيلەرگە ارنالعان كەرۋەتتەر دە جوق ەمەس. بۇلار اتام قازاق پايدالانعان بەسىكتىڭ ورنىن اۋىستىرا المايدى. بەسىك بالانىڭ دەنساۋلىعىنا، مي قىزمەتىنىڭ دۇرىس دامۋىنا ۇلكەن سەپتىگىن تيگىزەدى. بالا بەسىكتە تازا ءارى جىلى جاتادى. جايالىعى قۇرعاق بولعاسىن ۇيقىسى دا تىنىش بولادى. اراسىندا شەشىپ الىپ، اياق-قولىن سوزىپ، جاتتىعۋ جاساۋ كەرەك. بالا بەسىكتە جاتپاعان ۋاقىتتا بەسىك كورپەشەلەرىن دالاعا كۇننىڭ كوزىنە، قىستا ايازعا جايىپ الۋ قاجەت. بالانىڭ تاربيەلى بولىپ وسۋىنە بەرەكەلى وتباسىنىڭ اسەرى مول. وتباسىنىڭ ەڭ ماڭىزدى قىزمەتتەرىنىڭ ءبىرى – تاربيە بەرۋ. تاربيە تال بەسىكتەن باستالادى.
دەمەك، بالانى بەسىكتەن باستاپ تاربيەلەۋىمىز قاجەت. بەسىككە جاتقان بالا دەنى ساۋ، ۇيقىسى تىنىش، دۇنيەتانىمى كەڭ، ومىرگە قۇشتار بولىپ وسەدى. ءتىلى دە ەرتە شىعىپ، بالاباقشاعا بارعاندا قاتارلاستارىنان وق بويى وزىق تۇرادى. ولاي بولۋى ورىندى دا. ويتكەنى بەسىكتە جاتقان بالا انا الديىمەن ۇيىقتاپ، انا الديىمەن ويانادى. بەسىكتىڭ ۇرپاق ءۇشىن پايداسى ۇشان-تەڭىز. قول-اياعى بوس جاتقان ءسابيدىڭ ۇيقىسى تىنىش بولمايدى. ۇيقىسى قانباعان بالانىڭ زەردەسى تولىق جەتىلمەيدى. ءسابيدىڭ تۇلا بويى تازا بولىپ، تازالىققا بويى ۇيرەنەدى. بەسىكتەگى بالانىڭ دەنەسىنە دىمقىل، سىز دارىمايدى. قۇرعاق بولادى. ۇيىقتاپ جاتقان بالانى بولمەدەن بولمەگە اپارۋ قاجەت بولعان جاعدايدا كەرۋەتتەگى نەمەسە جەردە جاتقان بالادان گورى، بەسىكتە بولەۋلى ءسابي ىڭعايىراق. ءبىزدىڭ بۇگىنگى مىندەتىمىز – ەكونوميكامىزدى دامىتا وتىرىپ، ۇلتتىق قۇندىلىعىمىزدى جاڭعىرتۋ. ەگەر ۇلتتىق قۇندىلىعىمىزدى ساقتاي الماساق، جاھاندانۋعا جۇتىلىپ كەتۋىمىز مۇمكىن.
نۇرلان ەسەنعازى
اقتوبە مەديسينالىق كوللەدجىنىڭ وقىتۋشىسى، دارىگەر
"انا ءتىلى" گازەتىنەن الىندى
(سۋرەتتەگى بەسىك "كۋا" كومپانياسىنىڭ "تالبەسىگى".
زاكاز قابىلداۋ نومەرى: 87001597777)
6alash ۇسىنادى
