سۋرەتتەگى حانشا – جاڭگىر حان بوكەي ۇلىنىڭ قىزى زىليحا تيەۆكەليەۆا. جالپى جاڭگىردىڭ فاتيمادان تۋعان ءۇش قىزى بولعان: زىليحا، حاديشا جانە تايشا. ۇشەۋى دە ورىنبوردا وقىپ، جوعارى ءبىلىم العان.
زىليحا جاڭگىر قىزى تيەۆكەليەۆا
زىليحا جاڭگىر قىزى 1851 جىلى سالىمگەرەي تيەۆكەليەۆكە (1805-1885) تۇرمىسقا شىققان. ەكەۋىنەن ءتورت قىز دۇنيەگە كەلدى: ءمادينا، گۇلسىم، سۋفيا، عاينۋش. گۇلسىم تيەۆكەليەۆا قۇمىقتان شىققان رەسەيدىڭ گەنەرال-مايورى ءالي شەيحالييەۆكە ۇزاتىلعان. سۋفيا تيەۆكەليەۆا الاش ارىستارىنىڭ ءبىرى سالىمگەرەي ءجانتوريننىڭ جارى بولعان.
شيحابەددين مارجاني كىتابىندا سالىمگەرەيدى ورازمۇحاممەد سۇلتاننىڭ ۇرپاعى دەپ جازادى. بىلايشا تاراتادى: وندان – ورازمۇحاممەد – داۋلەتمۇحاممەد – ماماش – تاۋەكەل – قۇتلىعمۇحاممەد – شاھينگەرەي – سالىمگەرەي. سوندا بۇلاردىڭ تيەۆكەل دەپ جۇرگەنى تاۋەكەل اۋلەتى بولىپ تۇر عوي ءيا؟
سالىمگەرەي تيەۆكەليەۆ 1828-1829 جىلدارى ورىس-تۇرىك سوعىسىنا، 1830-1831 جىلدارى پولياك كوتەرىلىسىن باسۋعا قاتىستى، 1848 جىلى وتستاۆكاعا شىقتى. 1865 جىلى ورىنبور مۇسىلماندارى ءدىني باسقارماسىنىڭ ءمۇفتيى بولدى. قايىرىمدىلىقپەن اينالىسىپ، مەشىت، مەكتەپ سالدىردى.
ايتپاقشى، ءدال وسى سالىمگەرەي ورىنبور مۇسىلماندارى ءدىني باسقارماسىنىڭ ءمۇفتيى بولعان ۋاقىتتا 1868 جىلعى اكىمشىلىك رەفورماعا سايكەس ورال، تورعاي، اقمولا جانە سەمەي وبلىستارى قازاقتارى اتالعان مۇفتيلىك قۇرامىنان شىعىپ، جەرگىلىكتى بيلىك قاراۋىنا بەرىلگەن بولاتىن. مۇنىڭ سوڭى ورىس وتارشىلارىنىڭ قازاقتاردى شوقىندىرۋ ساياساتىنا ۇلاستى. بۇل ەندى بولەك اڭگىمە...
سەرىكبول حاسان
6alash ۇسىنادى
