قىتايدا وتكەن 2019 جىلعى كۇرەس تۇرىنەن اعا جۇلدەگەرلىككە تالاسۋ جارىسىندا قازاق بالۋانى تاعى دا توپ جاردى. اتاپ ايتقاندا، گانسۋ ولكەسىنىڭ بالۋانى ەرلانبەك كاتەي ۇلى ەركىن كۇرەستەن باسۇلدە الدى.
قىتايداعى بالۋانداردىڭ كىل مىقتىسىن سارالايتىن بۇل رەتكى رەسپۋبليكالىق جارىسقا 137 قۇراما، 1120 سپورتشى قاتىسقان. 9 كۇن بويى 10 ءتۇرلى سالماق بويىنشا ب ا ق سىناعان بايراقتى باسەكەدە قانداسىمىز ەرلانبەك 65 كەلى سالماقتاعىلار اراسىندا اعاجۇلدەگەر بولدى.
2009 جىلى جۇڭگو مەملەكەتتىك سپورت جارىسىنا تۇڭعىش رەت قاتىناسقان ەرلانبەك قارسىلاستارىن دوپشا اقتىرىپ، جۇلدەلى قايتقان بولاتىن. سودان كەيىن مەزگىلدەردە قىتايدا وتكەن جارىستاردىڭ بارىنەن جۇلدەسىز قالىپ كورمەگەن ەرلانبەك ازيا جانە الەم چەمپيوناتتارىنا دا قاتىسىپ، 2016 جىلى ريو-دە-جانەيرو وليمپيادا جولداماسىن جەڭىپ الدى. الايدا بۇل جارىستا قارسىلاسىنا ەسە جىبەردى.
ەرلانبەك كاتەي ۇلى جانە جاتتىقتىرۋشى ۇستازى سىرڭگۇلىن
ەرلانبەك كاتەي ۇلى قىتايدىڭ التاي ايماعى قىزىلتاس اۋىلىندا تۋعان. ول 2009 جىلى جۇڭگو بىرىنشىلىگىندە 65 كەلى سالماق دارەجەسى بويىنشا چەمپيون اتانىپ، قىتايدىڭ گانسۋ ولكەلىك ۇلتتىق قۇراماسىنا الىنعان. ول قويشى شاڭىراعىندا دۇنيەگە كەلگەنىن، بالا كەزدەن قوي باعىپ وسكەنىن ايتادى.
– التى اعايىندىمىز، مەن كەنجەسىمىن. كۇرەستى كەشىرەك باستادىم. باسىندا اتا-انام قارسى بولدى. ءبىراق قوي باعۋدان شارشاپ، كۇرەسكە بەت بۇرا باستادىم. ىشكى قىتايداعى كۇرەس ورتالىقتارىنا باردىم. سول جەردە كۇرەسكە تۇپكىلىكتى بەت بۇردىم، - دەيدى بالۋان.
